Ñwaè' Beâe Koreèn Ce Embenjïì 3 - Limbum New Testament

¹ Wà' wèr ce làa buu ca wa'a tɛ wèe bo rìŋ enɛ wèr yu ba běe mini a? Yi yu wa' ka'. Wà' yi yu enɛ wer à ba fa ba ŋwà' nè wèe tɛ wee wèe saŋ ŋwà' nè wèr tɛ bèe a riŋ àmbò wèr ce fà' a wěe mʉ, àmbò bèe mo' a ke gèe nà a? Yi yu wa' ka'.

² Wèe yu njep wěr mntee àmbò ŋwà' ce a saŋ, ŋwɛ̀ wɛɛwɛ à ce bè', a riŋ yuu ce a saŋ mbo wa'a,

³ a ce yɛ bòŋboŋ enɛ wèe yu ŋwà' ce à saŋ ba Jisos Krâis, a ka' tuu wèr àgho. Ŋwà' ca yu ŋwà' ce a saŋ ba nè mdip ŋwà' ka'. A saŋ ba nè Yʉ' Nyʉ̌ ntèe. A saŋ ba mbe lǔr mbɛ̀mbɛr ka', a saŋ ba njep mntee bèe.

⁴ Wèr ce làa buu ca àmbò bèe ce a Jisos Krǎis wèe a yu àbee, a riŋ wernɛ ku ba Nyʉ̀ ce e be jà' wèr tɛ wèr ka' gèe buu ca.

⁵ Wèr tʉr ŋger à rgèe yuu mo' nè yer tu ka'. Yer ŋger yi lò ba ese Nyʉ̀.

⁶ E gèe sèe à ghɛɛtè à ŋgǎa mfà' ce a ce fè'shi àmbò lě' fi. Lě' fi ca yi ce làa enɛ sèe yu' sè'ni ba ese Yʉ' Nyʉ̀, ke' yu' ba ese mncir ce a saŋ mbe ŋwà' ka'. Ncir yi vʉ̀ nè rkwe, Yʉ' Nyʉ̀ yi ce fa rlùŋ.

⁷ Wèe rìŋ nfè' ce Nyʉ̀ à m lɛ̀ mncir a duŋshi yi fòo. E m saŋ mncir mbe lǔr mbɛ̀mbɛr a fa nè Musìs. E ka' ce vʉ̀ nè mncir ca, rraa Nyʉ̀ li raa a yě bsii sê, ce àde' bèe Isrɛ̀l a m ba fyɛ' nè mmir ka'. Ka' rraa anà li m lò a ker ce raa àmbò li m ce raa nà ka' wa'a. Àmbò yi yu sè'ni enɛ rsa' rrʉ̀ʉ ce li m ce vʉ̀ ba nè rkwe li m ce dùŋshi fòo Nyʉ̀ na,

⁸ banɛ rsa' rfi ce li vʉ̀ yi ba nè Yʉ' Rara, li càa lǐ rrʉ̀ʉ à njɛ̀ɛ njì ce e ce dùŋshi fòo Nyʉ̀.

⁹ Ka' ba enɛ rsa' rrʉ̀ʉ ce li m ce gèe bèe a gwe mnsa' Nyʉ̀ nà li m ce dùŋshi fòo Nyʉ̀, banɛ rsa' rfi ce li ce gèe bèe a ba byɛɛnì à bsii Nyʉ̀ li càa lǐ rrʉ̀ʉ à njɛ̀ɛ njì ce e ce dùŋshi fòo Nyʉ̀.

¹⁰ Àde' sèe laa sè'ni enɛ rraa ce li m ba njep rsa' rrʉ̀ʉ na li ker ce yɛɛti à yuu ka' njobè' sèe ce jɛ̀r sè'ni ba njep rsa' rfi ce li ce raa a caa ŋger.

¹¹ Yi yu enɛ àmbò rsa' rrʉ̀ʉ anà li m cu njìsàp ka', a ku ce dùŋshi fòo Nyʉ̀ nà, banɛ rsa' rfi ce li be cu yi nfesè na, li be dùŋshi fòo Nyʉ̀ càa lǐ rrʉ̀ʉ anà.

¹² À ka' ba njobè' wèr rìŋ buu ca, wèr ce suŋ bèe buu Nyʉ̀ rara sê, a ke' ce sʉ̀ti yuu mo' ka'.

¹³ Wèr yu àmbò Musìs ka'. Musìs à m ce lò cete vi bsii nè cɛ̀' fà dì' bèe Isrɛ̀l a bo yɛ àmbò rraa efa yě bsii anà li ce liiti ka'.

¹⁴ Yap ntee yi yinì. Kɛ' ese à nfè' anà vʉ ba' sè'ni na, yuu mo' yi ce cete wap bfee. E ke ba à nfè' ce a ce bè' ŋwà' mncir embe ŋwǎ' rʉ̀ʉ nè wowèe, wowèe a ke' ce yu' yuu ce a ce bè' ka'. Bfee ŋwɛ̀ vi ke mʉ̀'ti ba à nfè' ce ŋwɛ̀ anà ba Krǎis a yu àbee.

¹⁵ Yi yu mini wa'a enɛ kɛ' ese à nfè' anà vʉ ba' sè'ni na, wowèe a ke bè' mncir Musìs, yuu mo' yi ce cete wap bfee, wowèe a ke' riŋ yuu ce a ce bè' ka'.

¹⁶ Geewa'a, ŋwɛ̀ à ka' beesi yi ntee byemi nè Tata Jisòs banɛ Nyʉ̀ be cà'si yuu ce yi cete ye bfee anà.

¹⁷ Tata ce sèe ce làa na yu Yʉ'. Fà dì' wɛɛwɛ ce Yʉ' Tata yi ka' ba, banɛ bèe anà a lùŋ.

¹⁸ À ka' ba njobè' yuu mo' yi ker ce cete sèe mmir ka', banɛ rraa Nyʉ̀ ca li ce raa sèe à nyòr, sèe à ce raa, a kɛ' a ce kupse, kù ce kupse caar, lò ba foŋ àmbò Tata Jisòs, ba ŋgǎa fòo àmbò Krǎis yu nà. Cena yu ba rfà' Tata ce e yu Yʉ'.