Ñwaè' Beâe Koreèn Ce Embenjïì 2 - Limbum New Testament

¹ A mbùu ce mɛ̀ m kwà'shi mɛnɛ àde' m ker vʉ ca'ni wèe ka', fà dì' m lo gèe tɛ nyor bep wèe ka'.

² M ka' gee nyor bep wèe, ŋwɛ̀ ce àde' e ka' gee nyor boŋ mɛ̀ ba nda, caa efa wèe ce mɛ̀ gèe nyor à bep wèe nà?

³ A mbùu ce mɛ̀ m saŋ ŋwà' anà nè wèe, fà dì' m ka' vʉ ca'ni wèe tɛ yi lo ba enɛ bèe ce m ce kwà'shi mɛnɛ wowèe a ba gèe nyor boŋ mɛ̀, a lo ba ba bèe ce a be gèe tɛ m lo yu' ba ryaŋ ka'. M rìŋ mɛnɛ m ka' ce yu' rbòŋ banɛ wèe ce yu' rbòŋ foŋ.

⁴ Mɛ̀ m saŋ ŋwà' anà nè wèe, a ce koosimnse, ntee yi ce fa mɛ̀ ŋgɛ', mŋgoommir mi ce sùu mɛ̀ ekù tù. Mɛ̀ m ce saŋ yi tɛ m bo gèe tɛ nyor bep wèe bep ka'. Mɛ̀ m saŋ yi tɛ wèe bo rìŋ enɛ m kòŋ wèe sê.

⁵ Ŋwɛ̀ ka' gee yuu ce ntee yi bep bèe, banɛ ŋgàŋ à gèe ba nè mɛ̀ ka'. E gèe yuu anà gòr ba nè wèe wɛɛwɛ. Banɛ m ker laa tatap àmbò yuu anà ka'.

⁶ Ŋgɛ' ce bèe magòr efa wěe mʉ a fa nè ŋgàŋ à ghɛɛ.

⁷ Banɛ yuu ce wèe à ba gèe nè ŋwɛ̀ anà sè'ni yi yu enɛ wèe à ba fòosi ye, fa ye ŋger fà dì' bsɛ̀ vi lo koo ye ka'.

⁸ M ce bu' mmbo nè wèe enɛ wèe gee tɛ ŋgàŋ riŋ enɛ wèe ku bii kòŋ ye.

⁹ Mɛ̀ m saŋ ŋwà' anà tɛ m bo mòoshi wèe, yɛ mɛnɛ wà' wèe ce yu'ni nè mɛ̀ à buu bsìp lɛ.

¹⁰ Wèe à ka' foosi ŋwɛ̀, banɛ mɛ̀ fòosi ye foŋ. Yi ka' ba enɛ ŋwɛ̀ à gèe yuu ce m foosi ye, m foosì ye à bsii Krǎis njo' wèe,

¹¹ fà dì' Satàn lo tʉr ŋger mbe sěe ndù ka'. Sèe rìŋ enɛ Satàn yu kwɛ̀ɛ.

¹² Mɛ̀ m dù à rfè'shi Nsuŋ Mbòŋmboŋ àmbò Jisos Krǎis à rla' Trowàs, a ka' ba àfo, a yɛ mɛnɛ Tata Nyʉ̀ à mʉ̀' nduunjì nè mɛ̀ àfo à rfà' nè ye.

¹³ Ka' yi m ba wa'a, ntee yi bu' mɛ̀ se njobè' mɛ̀ m yɛ nfʉr yà ce Taitòs ka'. Mɛ̀ ka' yɛ ye ka', a daasi wowèe a du à ŋgǒŋ Mɛ̀sɛ̀donìyà.

¹⁴ Banɛ sèe yoŋshi Nyʉ̀ njobè' sèe à ka' ce dù ba fɛ, e ku tɛɛ kùntombì nè sèe. E tɛɛ wa'a, sèe ce jɛ̀r àmbò bèe ce a ce jɛ̀r mbe ŋgoo bèe Jisòs, Jisòs à tɛɛ entombì a ce vʉni. Nyʉ̀ à lòr sèe a gee nsuŋ àmbò Jisòs à du à bdì' wɛɛwɛ àmbò nrɛ̀ɛ ce a too e rʉʉ bòŋboŋ sê, a du à bdì' wɛɛwɛ.

¹⁵ Nrɛ̀ɛ ce Jisòs ce tòo nè Nyʉ̀ anà yuu sèe. Nrɛ̀ɛ anà yi ce rʉ̀ʉ à mʉ̀ bèe wɛɛwɛ, kɛ̀ yu bèe ce a be lùŋ ɛ̀, kɛ̀ yu bèe ce a be bʉ ɛ̀.

¹⁶ Rʉ̀ʉ efa gho yi yu nè bèe ce a ce bʉ àmbò rʉ̀ʉ ce àde' yi yʉ ŋwɛ̀, a ba nè bèe ce a be lùŋ àmbò yuu ce àde' yi gee ŋwɛ̀ e cu ntèe. Àmbò yi yu wa' na, banɛ ŋwɛ̀ ce e ghɛɛte à rgèe njɛ̀ɛ rfà' ca yu nda?

¹⁷ À ka' ba yi àmbò wèr, wèr yu àmbò bèe mo' ce a lòr blǎa Nyʉ̀ à ba yuu ntaa nà ka'. À tuu ba Nyʉ̀ a tuu wèr, wèr à ce fè'shi vi blàa a yě bsii nè mini-ŋwɛ̀, à rlii Krâis.