Ñwaè' Táèsaèlonikaè Ce Entombïì 5 - Limbum New Testament

¹ Bfʉr wâ, mbùu mò' ker ba àgho nè wèr à rsaŋ nè wèe àmbò nfè' kɛ̀ nòŋ ce Jisòs be vʉ̀ ka'.

² Wèe à rìŋ bòŋboŋ enɛ nòŋ ce Tata Jisòs be vʉ̀ yi be kè ba àmbò nyɛ̀ɛ ce e ke bʉ̀ʉ ŋwɛ̀ nètʉ' nà.

³ Be ba à nfè' ce bèe a ce làa enɛ buu wɛɛwɛ yu yɛɛnì, cumʉnyaŋ à ba se nà, tɛ ŋgɛ' mò' lo vʉ̀ nè wowèe. Ŋgɛ' ca be kè lɛ'si wowèe àmbò à nfè' ce njeŋwɛ̀ e ke kɛ̀' ce luuti muu nà, tɛ wowèe a tʉr njì mò' ce àde' a caŋ ka'.

⁴ À ka' ba yi àmbò wèe, bfʉr wâ, wèe yu bèe ce wèe ce cu à tʉ̀'nji tɛ nòŋ anà yi bo bʉ̀ʉ wèe àmbò nyɛ̀ɛ e ke bʉ̀ʉ ŋwɛ̀ nà ka'.

⁵ Wèe yu bèe ce wèe ce cu ba à rraa, a ker ba àmbò bèe ce a ce jɛ̀r ba nèmootì. Sèe yu bèe ce sèe ce cu ba à tʉ̀'nji ka'. Sèe tʉr yuu mo' à rgèe nè tʉ̀'nji ka'.

⁶ Banɛ sèe fa ce buumi àmbò bèe mo' a ce gèe nà ka'. Sèe ce ke'se, tami nyor.

⁷ Bèe ce a ke buumi a ke buumi ba nètʉ', buu mno vi ke gha' koo ŋgǎa no buu ba nètʉ'.

⁸ Àmbò sèe yu yi sèe bèe ce sèe ce cu ba à rraa, banɛ sèe tami nyor. Sèe tɛ'shi visèe mnyor àmbò bsoogɛ̀ a ke tɛ'shi wap mnyor à ŋkʉ̀ bìr nà. Sèe lɛ visèe mntee njep Nyʉ̀, ker koŋ ye foŋ tɛ cena yi bo ba àmbò kaŋ ce sèe à tɛ'shi visèe mŋgùŋ àgho. Yi yu foŋ enɛ àmbò sèe cu a ce kè' nfè' ce Nyʉ̀ be jà' sèe, cena yi yu nè sèe àmbò rtaa bco' ce sèe à sòp mbe tù tɛ li bo tɛ'shi tu wa'a.

⁹ Nyʉ̀ à m ce sèe tɛ e bo mà' ŋgɛ' mbe sěe ndù ka'. E m ce sèe enɛ sèe bo koni rlùŋ njì enjep Tata Jisos Krâis,

¹⁰ ce e m kwe nè sèe. E m kwe nè sèe tɛ sèe wowèe bo cu àbee à nfè' wɛɛwɛ. E ka' vʉ̂, kɛ̀ sèe cu btèe ɛ̀, kɛ̀ sèe à kweŋger ɛ̀, tɛ sèe wowèe bo cu àbee.

¹¹ Àmbò wèe à rìŋ buu ca wɛɛ na, wèe ku ce gee bòŋboŋ àmbò wèe ce gèe nà. Ŋwɛ̀ wɛɛwɛ efa wěe mʉ fa ŋger nè nfʉr mò', ja' nfʉr mò' tɛ e tɛɛ tatap.

¹² Bfʉr wâ, wèr ce loo nè wèe enɛ wèe yu'ni nè bèe ce a ce fà' a wěe mʉ, à ba bèe ce Tata Nyʉ̀ à ce enɛ wowèe a ke'ni ker ce yɛ'ni wèe nà.

¹³ Yu'ni nè nè wowèe bòŋboŋ sê, koŋ wowèe nè ye ntee-ŋwɛ̀ njo' rfà' ce wowèe a ce gèe. Cu nè rcu ce li yu nè rfʉtè-ŋwɛ̀.

¹⁴ Bfʉr wâ, wèr ce làa nè wèe enɛ wèe fa ncep nè bèe ce a yu bbor, fa ŋger nè bèe ce wap mntee vi ce bu', ja' bèe ce a sɛ̀, tʉr ntee bòŋboŋ nè ŋwɛ̀ wɛɛwɛ.

¹⁵ Yɛ nè enɛ ŋwɛ̀ fa kʉsi yuu bebep nè yuu bebep ka'. Ghèter nè à rgèe ba buu bbòŋboŋ. Gèe nè buu bbòŋboŋ ca nè ŋwɛ̀ wɛɛwɛ ce e yu a wěe mʉ ker ba bèe enjepmbè foŋ.

¹⁶ Lu'shi nè à nfè' wɛɛwɛ,

¹⁷ loo nè nè Nyʉ̀ à nfè' wɛɛwɛ,

¹⁸ yoŋshi nè Nyʉ̀ à buu wɛɛwɛ ce vi ka' koni wèe. Buu ca a buu ce Nyʉ̀ ce kòŋ enɛ bèe ce a ce dù àmbùu Jisos Krǎis a gêe.

¹⁹ Fa kani nè Yʉ' Rara efa rfà' njep wèe ka',

²⁰ wèe fa jàasi ŋwɛ̀ ce e ce suŋ buu ce Yʉ' Rara yi gèe e riŋ ka'.

²¹ Taase nè buu wɛɛwɛ ce bèe a ce làa nè wèe, koo vǐ bbòŋboŋ,

²² ba ànjìsàp efa buu bbebep wɛɛwɛ.

²³ Nyʉ̀ ce e ke fa sèe cumʉnyaŋ, gee tɛ wèe cu rcu rrara, tʉr fàa koo mʉcàr ka', ker gee tɛ fàa ba à yuu ce wèe ce gèe kɛ̀ à yuu ce wèe ce kwà'shi ka', kù ba bbòŋboŋ à buu wɛɛwɛ du ba' à nfè' ce Tata Jisos Krǎis be vʉ̀.

²⁴ Nyʉ̀ ce e kɛ' wèe, yu ŋwɛ̌ mini. E be gèe tɛ yi ba wa'a.

²⁵ Bfʉr wâ, loo nè nè wèr.

²⁶ Cà'ni nè bfʉr wer wɛɛwɛ nè wèr. Baa wowèe nje nyòr à bèe Nyʉ̀.

²⁷ M ce làa nè wèe à rlii Tata Jisòs enɛ wèe be' ŋwà' ca nè bfʉr wɛɛwɛ.

²⁸ M ce loo mɛnɛ Tata Jisòs tʉr wèe à ntee bòŋboŋ.