Ñwaè' Táèsaèlonikaè Ce Entombïì 3 - Limbum New Testament

^1-2 Wèr à ka' càni à ryɛ wèe gòr wa'a, a moo à rcu làr. Yi ka' ba wa'a, wèr à kwa'shì enɛ wèr be tuu Timotì tɛ e vʉ yɛ wèe tɛ wèr ku di' bòŋlàr cu à rla' Atɛ̀n. Timotì yu nfʉr wèr ce wèr wowèe e ke fà' nè Nyʉ̀. Ye ye e ke fè'shi Nsuŋ Mbòŋmboŋ àmbò Jisos Krǎis nè bèe. Wèr à tuu ye enɛ e vʉ yɛ wèe tɛ e bo fa wèe ŋger, gèe tɛ wèe tɛɛ tatap njep le rbyemì,

³ fà dì' ŋwɛ̀ mò' efa wěe mʉ lo jep njo' ŋgɛ' ce bèe a ce fa wèe na ka'. Wèe à rìŋ foŋ enɛ ŋgɛ' ca yu ŋgɛ' ce e be kù ba nè bèe wɛɛwɛ ce a byemi nè Jisòs.

⁴ Wèr à m suŋ wèe wɛɛ à nfè' ce sèe à m ba nà enɛ ŋgɛ' be koni. Wèe à riŋ foŋ enɛ ŋgɛ' anà à koni wèe wɛɛ.

⁵ A mbùu ce mɛ̀ tuu Timotì enɛ e vʉ yɛ wèe. Mɛ̀ tuu ye enɛ e vʉ yɛ enɛ wèe ku tɛɛ tatap njep le rbyemì lɛ. Mɛ̀ gèe wa'a njobè' mɛ̀ kwà'shi àmbò buu ce vi koni wèe na, vi caa ya ŋger, mɛ̀ riŋ àmbò m ku cu wa' ka'. Mɛ̀ m ce wɛp mɛnɛ seemò' Satàn à mòoshi wèe gòr sê, tɛ yi lo ba sè'ni enɛ rfà' ce wèr à m gèe li bʉ à cicì.

⁶ Timotì à kʉti a vʉ a yɛ wèr a suŋ wèr nsuŋ mbòŋmboŋ. E suŋ wèr enɛ le rbyemì li ku bii tatap, wèe à ku koŋ Nyʉ̀ àmbò wèe à m kòŋ nà. E suŋ foŋ enɛ wèe tʉr wèr à ntee bòŋboŋ, a ce kòŋ à ryɛ wèr àmbò wèr ce kòŋ à ryɛ wèe foŋ nà.

⁷ Bfʉr wêr, àmbò yi yu wa' sè'ni na, wèr ka' ce yɛ ŋgɛ' ce wèr ce yɛ na, ce yu' ryaŋ ce wèr ce yu' na, wèr ce yu' rbòŋ nè wèe, ntee yi fʉte wèr njobè' wèe ku tɛɛ tatap njep le rbyemì.

⁸ Àmbò wèr à rìŋ sè'ni enɛ wèe tɛɛ tatap njep Tata na, wèr be cu sè'ni yɛɛnì.

⁹ Nyʉ̀ à gèe wèr à ce yu' rbòŋ à njɛ̀ɛ bèe ce wèe yu sê. Wèr à rìŋ àmbò àde' wèr yoŋshì ye ka'.

¹⁰ Wèr ce loo nè Nyʉ̀ nètʉ' ba nèmootì enɛ e fa wèr fɛŋ tɛ wèr vʉ̂, tɛ sèe yɛni, tɛ wèr yɛ'ni wèe buu mò' ce wèe à be riŋ ka' nà, tɛ le rbyemì li bo ruusi.

¹¹ Wèr ce loo enɛ Nyʉ̀ ce e yu yìsèe Ta ker ba Tata Jisòs, gee tɛ wèr koni fɛŋ vʉ̀ yɛ wèe.

¹² Tɛ Tata Jisòs gee tɛ rkòŋnì ce wèe tʉr a wěe mʉ nà, li du kùntombì, ker gee tɛ wèe koŋ bèe wɛɛwɛ àmbò wèr à kòŋ wèe foŋ nà.

¹³ Wèe à ka' gee wa'a, Nyʉ̀ gee wee mntee vi tap. E kè ba à nfè' ce Tata Jisòs à vʉ̀ a yì bèe wèe nà, tɛ wèe bo ba brara, kè' tʉr fàa à bsii Nyʉ̀ ce e yu yìsèe Ta ka'.