Ñwaè' Beâe Koreèn Ce Entombïì 3 - Limbum New Testament

¹ Bfʉr wâ, à m ba mbe nfè' ce mɛ̀ m vʉ̀ yɛ wèe nà, àde' mɛ̀ m ba laa nè wèe àmbò bèe ce a tʉr Yʉ' Nyʉ̀ njep wǎp mntee ka'. Mɛ̀ m làa nè wèe ba àmbò mɛ̌ ke làa nè bèe ce a ce yu' rbòŋ à buu enjep ŋgòŋ na. Mɛ̀ m làa wa'a njobè' wèe à m bii boo bkɛ' à buu Jisos Krâis, wèe à m ba àmbò boo ce a bii nyoŋ mmbee wa'a.

² Mɛ̀ m nyoŋsi wèe nyoŋsi, a ke' fa wèe ba yuu ye ka' njobè' wèe à m be ghɛɛte à rye yuu ka'. Ka' sè'ni na, wèe à be ghɛɛte ka'.

³ Wèe ku bii yu' rbòŋ à buu enjep ŋgòŋ na. Ŋko'ndoŋ yu a wěe mʉ, ŋgàpni yi ba a wěe mʉ, banɛ mbò wèe ku bii yu' rbòŋ à buu enjep ŋgòŋ na a? Mbò ye ŋgèe yi ku ba àmbò yi bèe enjep ŋgòŋ na a?

⁴ Ŋwɛ̀ mò' ka' laa yi enɛ̂. “M yu ya wèr Pôl,” mò' ker laa yi enɛ̂, “M yu ya wèr Àpolòs.” Wà' banɛ wèe yu jɛɛ efa bèe enjep ŋgòŋ na a?

⁵ Àpolòs yu nda, Pol à ba nda? Wèr ku ba ba ŋgǎa mfà' nè Tata Nyʉ̀. Nyʉ̀ à m tuu wèr enɛ wèr gee tɛ wèe byemi nè Jisos krâis. Ŋwɛ̀ wɛɛwɛ à m ku gee ba li rfà' ce Tata à m fa nè ye enɛ e gêe.

⁶ Mɛ̀ m byè ŋgʉ̀ buu, Àpolòs à ŋwaŋshì mdip àgho. Ŋwɛ̀ ce e m gèe ŋgʉ̀ buu ca à fʉʉ a ku', à m ba ba Nyʉ̀.

⁷ Ŋwɛ̀ rbyè yu yuu mo' ka', ŋwɛ̀ rŋwaŋshi nè mdip à ba yuu mo' foŋ ka'. Ŋwɛ̌ ŋgòr ku ba ba Nyʉ̀ ce e gèe buu ce a byè vi ce kù'.

⁸ Ŋwɛ̀ rbyè ba ŋwɛ̀ rŋwaŋshi nè mdip a ku ba yɛɛnì. Nyʉ̀ be là' ŋwɛ̀ wɛɛwɛ à rfà' ce ŋgàŋ à gèe.

⁹ Wèr yu ŋgǎa mfà', a ce fà' àbee nè Nyʉ̀. Wèe yu ŋkʉ̀ Nyʉ̀, a ba ndap ce Nyʉ̀ à bà'ri.

¹⁰ À ka' ba njo' bfee ce Nyʉ̀ à fa mɛ̀, mɛ̀ boo kùundap àmbò ŋwɛ̀ ce e rìŋ à rboo yuu sê. Bèe mo' a ce boo ndap mbe kùundap anà. Ŋwɛ̀ wɛɛwɛ ce e ce boo, lor nfè'.

¹¹ Àde' ŋwɛ̀ mò' ker boo kùundap mo' jɛɛ caa efa yì ce a boo war ce yu Jisos Krǎis na ka'.

¹² À ka' ba àmbò buu ce bèe a be bà'ri ndap anà àgho, bèe mo' a be bà'ri nè bco' ce a too enɛ gûl, ba bco' ce a too enɛ silvà, ba blùr ce vi lùu ntaa sê. Bèe mo' a be bà'ri yap nè mntaaŋguu ba bvʉp msaŋ, ba bbuu.

¹³ Mfà' ŋwɛ̀ wɛɛwɛ mi be kè yɛɛti àwaŋ njobè' be kè ba à nòŋ mnsa' tɛ a mooshi mfà' ŋwɛ̀ wɛɛwɛ. Mor yi be kè ce kɛti à nòŋ anà, gèe tɛ a riŋ njɛ̀ɛ mfà' ce ŋwɛ̀ wɛɛwɛ à m ce gèe.

¹⁴ Yuu ce ŋwɛ̀ à bà'ri ndap anà àgho yi ka' tɛ she ka' banɛ ŋgàŋ be koo blà'.

¹⁵ Yuu anà yi ka' she, banɛ ŋgàŋ be bʉ à cicì, koni yuu ka'. Geewa'a, ŋgàŋ be lùŋ, kù lùŋ ba àmbò ŋwɛ̀ ce e caŋ mor, a coo njep mncùŋ mor a tose.

¹⁶ Mbò wèe rìŋ weenɛ wèe yu Ndap Nyʉ̀, Yʉ' Nyʉ̀ yi ce cu njep wèe a?

¹⁷ Ŋwɛ̀ à ka' bepsi Ndap Nyʉ̀ banɛ Nyʉ̀ be bepsi ŋgàŋ. Yi yu wa'a njobè' Ndap Nyʉ̀ yu nrara, Ndap Nyʉ̀ anà à ba wèe.

¹⁸ Ŋwɛ̀ mò' fa bo' yi tu ka'. Ŋwɛ̀ mò' efa wěe mʉ ka' ce kwà'shi enɛ e tʉr njɛ̀ɛ bfee ce ŋgòŋ ca yi rìŋ enɛ a bfee, ŋgàŋ à ba kʉti lʉr tɛ e bo tʉr bfee nè mini-ŋwɛ̀.

¹⁹ Yi yu wa'a njobè' bfee enjep ŋgòŋ na yu ba blʉr à bsii Nyʉ̀. Yi ku ba àmbò a saŋ mbe Ŋwǎ' Nyʉ̀ enɛ̂, “Nyʉ̀ e ke lòr bfee ŋgǎa bfee, koo ŋgǎa bfee anà àgho.”

²⁰ A ker saŋ mbo enɛ̂, “Tata Nyʉ̀ rìŋ enɛ mkwà'shì bèe ce a tʉr bfee mi yu à cicì.”

²¹ Àmbò yi yu na banɛ ŋwɛ̀ mò' fa kèr kùu ŋgùŋ njo' ŋwɛ̀ mò' ka'. Buu wɛɛwɛ yu yè buu.

²² Pol ba Àpolòs ba Pità a yu yè bèe, ŋgòŋ ca yu ye, ryòŋ yu le, rkwe à ba le, buu ce vi yu sè'ni na, ba buu ce vi be kè ba, vi wɛɛwɛ a yè buu.

²³ Yi yu enɛ wèe yu bèe Krâis, Krǎis à ba ŋwɛ̀ yì Nyʉ̀.