Ñwaè' Beâe Koreèn Ce Entombïì 11 - Limbum New Testament

¹ Kù ce gee nè ba yuu ce m ce gèe àmbò mɛ mɛ̀ ce gèe ba buu ce Jisos Krǎis à m ce gèe.

² Mɛ̀ yòŋshi wèe njobè' wèe ce kuushi buu ce mɛ̀ m yɛ'ni wèe, a ker ce gèe buu anà yɛɛnì sê.

³ Mɛ̌ kòŋ tɛ wèe riŋ bòŋboŋ enɛ Jisos Krǎis yu tu nè mbaŋrùŋwɛ̀, mbaŋrùŋwɛ̀ à ba tu nè njeŋwɛ̀, Nyʉ̀ à ba tu nè Jisos Krâis.

⁴ Ka' ba à nfè' ce mbaŋrùŋwɛ̀ ce gèe rloo, ker ba à nfè' ce e ce cep ntuu Nyʉ̀, e ka' sop rtaa mbe tù banɛ e coosi Jisos Krǎis ce e yu tu nè ye.

⁵ Njeŋwɛ̀ ye ye ka' ce gèe rloo, kɛ̀ ce cep ntuu Nyʉ̀ ɛ̀, ke' seŋ rtaa mbe tù ka' banɛ e coosi mbaŋrùŋwɛ̀ ce e yu tu nè ye. Njeŋwɛ̀ ka' tɛ seŋ rtaa mbe tù ka' banɛ e yu àmbò njeŋwɛ̀ ce a kwàa ye tu wa'a.

⁶ Njeŋwɛ̀ ka' kani à rseŋ rtaa mbe tù banɛ e ba bòŋlàr koo tu anà koo. À ka' ba enɛ yu rìtu nè njeŋwɛ̀ à rkwàa tu kɛ̀ koo tu ɛ̀, banɛ njeŋwɛ̀ seŋ rtaa mbe tù.

⁷ Yi yu bòŋboŋ enɛ mbaŋrùŋwɛ̀ sop rtaa mbe tù ka', njobè' e yu rfeese Nyʉ̀, a ba fǒo Nyʉ̀, njeŋwɛ̀ à ba fǒo mbaŋrùŋwɛ̀.

⁸ Sèe rìŋ enɛ Nyʉ̀ à m lòr nfàŋ njeŋwɛ̀ a boo mbaŋrùŋwɛ̀ àgho ka'. E m lòr nfàŋ mbaŋrùŋwɛ̀ a boo njeŋwɛ̀ àgho.

⁹ Nyʉ̀ à m boo mbaŋrùŋwɛ̀ a fa nè njeŋwɛ̀ ka', e m boo ba njeŋwɛ̀ a fa nè mbaŋrùŋwɛ̀.

¹⁰ A mbùu ce njeŋwɛ̀ à ba seŋ rtaa mbe tù fà dì' ntee yi bo yaŋ bcìndap Nyʉ̀ ka'.

¹¹ À ka' ba yi àmbò sèe ce sèe ce cu sèe Tata Jisos Krǎis wèe, njeŋwɛ̀ yu nè yi tu ka', mbaŋrùŋwɛ̀ à ba nè yi tu ka'.

¹² Nyʉ̀ à m lòr nfàŋ mbaŋrùŋwɛ̀ a boo njeŋwɛ̀ àgho, njeŋwɛ̀ ye ye à ba ŋwɛ̀ ce e ke bi mbaŋrùŋwɛ̀. Buu ca wɛɛwɛ à m gèe ba Nyʉ̀.

¹³ Kwà'shi ka nè enɛ wà' yi yu yɛɛnì enɛ njeŋwɛ̀ gee rloo nè Nyʉ̀ ce e seŋ rtaa mbe tù ka' lɛ.

¹⁴ Bèe wɛɛwɛ a ku riŋ enɛ mbaŋrùŋwɛ̀ ka' ko'si tu, banɛ e coosi yi tu.

¹⁵ À ka' ba yi nè njeŋwɛ̀, tu ko'si à ba yuu bòŋboŋ njobè' Nyʉ̀ à m fa ye nyʉ̀'tu sàsap tɛ e bo tɛ'shi yi tu àgho.

¹⁶ Ŋwɛ̀ mò' à ka' ba ce e ce sɛr yi enɛ buu ca yu wa' ka', banɛ ŋgàŋ à ba rìŋ enɛ wèr ce gèe ba buu ca, bcor wɛɛwɛ vi ce gèe wa' foŋ.

¹⁷ Yuu ce m be fa wèe ncep àgho na yu ba yuu ce m be yòŋshi wèe àgho yòŋshi ka'. E ke ba à nfè' wèe à vʉ̀ àbee à rgèe rloo nè Nyʉ̀, wèe ce gèe ba ŋgěe bebep caa ŋgěe bòŋboŋ.

¹⁸ Yuu entombì ce mɛ̀ yu' yi yu enɛ e ke ba à nfè' ce wèe à vʉ̀ àbee à rgèe rloo nè Nyʉ̀, ŋgàpni yi ba a wěe mʉ. Mɛ̀ yɛ mɛnɛ seemò' yi yu mini wa'a.

¹⁹ Yi yu yɛɛnì enɛ ŋgàpni yi ba a wěe mʉ, njobè' e ke ba ne à nfè' ce ŋgàpni yi niŋ wa'a, wèe ka' yɛ bèe ce a yuu běe mini.

²⁰ Mɛ̀ yɛ mɛnɛ wee ke vʉ̀ àbee, vʉ ba à rye byee Tata Nyʉ̀ ka'.

²¹ Mɛ̀ làa wa'a njobè' e ke ba à nfè' ce a ce ye byee, ŋwɛ̀ ku ce ye vi byee, ke' ce kwà'shi àmbò bèe mo' ka'. Yi lò ba wa'a, njè ce yaŋ bèe mò', bèe mò' a no mrù' mi koo wowèe.

²² Njɛ̀ɛ yuu ce yi koni wèe na yu ba njɛ̀ɛ kɛ? Mbò wèe tʉr mndap ce wee ke fʉʉ embo wèe à banì yeŋger, a ker noŋger a? Yi yu bòŋboŋ enɛ wèe lor cor Nyʉ̀ à yuu cicì ker gee tɛ rìtu yi koo bèe ce a buu byee ba buu mno ka'. Yuu ce m be làa nè wèe yu kɛ? Wà' m be yòŋshi wèe a? Ka', àde' m yoŋshì wèe ka'.

²³ Mɛ̀ m yɛ'ni wèe buu ce Tata à m gèe mɛ̀ rîŋ. Buu anà yu enɛ, à m ba nètʉ' ce a be fyèni Tata Jisòs nà, e lor brɛ̂d,

²⁴ a yoŋshi Nyʉ̀, a bɛ'shi, a laa enɛ̂, “Ca yu yà nyor ce mɛ̀ fa a wěe btù. Ce gee nè àmbò sèe ce gèe na tɛ wèe bo ce kuushi mɛ̀.”

²⁵ Wowèe a ka' ye wɛɛ, e lor ndoŋ a laa enɛ̂, “Ndoŋ ca tɛɛ àtu lě' fi ce Nyʉ̀ à ye a bèe nè wa blɛɛ. Kuushi nè mɛ̀ à nfè' wɛɛwɛ ce wèe ka' ce no enjep ndoŋ ca.”

²⁶ Banɛ ka' ba à nfè' efɛ ce wèe ce ye byee ca, ce no enjep ndoŋ ca, wèe ce suŋ bèe àmbò rkwe Tata Jisòs, caar tɛ e ke vʉ̀.

²⁷ Banɛ ŋwɛ̀ ce e ka' tɛ ye brɛ̌d ca, ker ce no enjep ndoŋ ca à njǐ yɛɛnì ka', banɛ ŋgàŋ à lòr nyor ba blɛɛ Tata à yuu cicì.

²⁸ Tɛ ŋwɛ̀ ka' ye brɛ̌d ca, kèr no enjep ndoŋ ca, ŋgàŋ fyɛ' yì nyor bòŋboŋ ka' gee wa'a.

²⁹ Ŋwɛ̀ ce e ka' ye brɛ̂d, ker no enjep ndoŋ ca, ke' ce kuushi enɛ buu ca tɛɛ àtu nyor ba blɛɛ Tata Jisòs ka', banɛ ŋgàŋ à lòr ndòo mbe yě tù.

³⁰ A mbùu ce bèe magòr a wěe mʉ a sɛ̀, bèe mo' a ce yaŋ, bèe mo' a kweŋgèr.

³¹ Sèe ka' fyɛ' visèe mnyor ka' ye brɛ̌d ca, ker no enjep ndoŋ ca, Nyʉ̀ sa' sèe àmbò bèe ce a gèe yuu bebep ka'.

³² Tata Nyʉ̀ e ke sa' sèe wa'a ce nàshi sèe nàshi fà dì' sèe bo kè gwè mnsa', yɛ ŋgɛ' à nfè' ce e be sa' ŋgòŋ nà ka'.

³³ Bfʉr wâ, yi ka' ba wa'a, ka' ba à nfè' wèe à vʉ̀ àbee à rye byee Nyʉ̀, bèe mo' a fa kù kɛ̀' ce ye entombì nè bèe mò' ka'.

³⁴ Njè ka' ce yaŋ ŋwɛ̀, banɛ ŋgàŋ ye byee mbe yě ndàp ka' vʉ̂, fà dì' wèe vʉ àbee lò gèe ŋgěe bebep tɛ Nyʉ̀ sa' wèe ka'. M be fa wèe ncep à buu mo' foŋ, à nfè' ce m ka' vʉ ca'ni wèe.