Salmos 9 - La'aqtaqa Ñim Lo'onatac 'Enauacna 2013

Da ño'oxonnataguec Ñim Lo'onatac 'Enauacna

¹ 'Am Nataxala', ñeshetaique da imauec da iquiyaqteỹaxac da 'am sho'oxoreetac, qataq da sa'axattac da qalota 'ayo'oxoyec.

² 'Am maye 'Anataỹaña 'enauacna, sauotaique da so'on da 'are'enaxat souaxat da samachiguiñi qataq ñetootapigui', qataq so'ootac da llo'oxoyec da 'are'enaxat.

³ Na ñepa'aguenaxauapi qalaq 'am dataueeguesop, nache 'auauaachigui da huañi qataq ileu.

⁴ 'Am maye no'oiteguelo naua 'auo'o't da 'anmit na nasouaxashetpi, nache 'anso'ongui aca 'anso'onaxaqui da aỹem 'auo'otec ca ỹaỹamaqchiguiñi lataxac.

⁵ Qataq 'aviraxato'ot co'ollaxa na ỹotta'a't shiỹaxauapi, qataq 'anlaxaañi na qauemaicpi, qataq 'auapalaxat, nache saishet da qaiuennatega.

⁶ So depa'aguenataxaatac qalaq mashe ileu, qataq somaye nache l-llañe' so lalamaxat huaqta'a't nỹecpi, cha'aye 'am 'anlaxaañi, nache da na'aqtaguec somayepi qaica da huo'o ca no'onañi.

⁷ Qaq Ñim Nataxala' qalaq nache 'eetai' da nta'a, nache ỹa'ayiñi so nso'onqa' da yaqto' nmit na nasouaxashetpi.

⁸ Ñimaye ỹaỹamaxatchiguiñi da 'eetec da nmit na shiỹaxauapi, qataq da ilo'ogue na ỹotta'a't nhuo' le'ecpi qalaq qaica ca iỹotauga.

⁹ Ñim Nataxala' nacheñi Ñim lle'eguenaxala' na choxoraqpi, qataq mpaxattalec namayepi da huaigui da nque'eenaxac.

¹⁰ 'Am Nataxala' ỹataqta 'am pi'iỹa'a na 'am ỹauatton, cha'aye 'am saỹauano' da 'aualat ca 'am nmittaique.

¹¹ Qauo'oñi ca qaro'oñiqui da qavio'oxoyiñi Ñim Nataxala' maye ilotague' na netaña ye Sión, qataq qaua'axachem na ỹotta'a't nhuo' le'ecpi na ỹo'otpi Ñimaye.

¹² Ñim Lo'onatac 'Enauacna, saishet da icoua'ai na huo'o da nqui'ic, qataq saishet da icoua'ai da nnoinaxac namayepi.

¹³ 'Am Nataxala' aỹem 'auchoxoren qome, ñaq 'aumeten na aỹem ỹachoxoreetacpi qataq aỹem nquiỹatega, ñaq aỹem 'anqateeguesop ñi lasom da nleuaxa.

¹⁴ Yaqto' da huaña ñi lasom ye Jerusalén, nache sa'axattac qome da 'año'oxonnataguec, cha'aye samachiguiñi souaxat da aỹem 'anca'alaxatec.

¹⁵ Na ỹotta'a't shiỹaxauapi qalaq tangui aca maiche lshere, naua lchel qalaq lpachiguilo ca laleguec maye ỹoxottañi namayepi.

¹⁶ Ñim Nataxala' nachaxan da yaqto' qaỹauatton, souaxat da ỹo'ot na ỹaỹamaqchiguiñi lataxac, qaq na qauemaicpi qalaq tangui aca lqoina maye maiche lo'onata.

¹⁷ Na qauemaicpi qalaq taỹa'a da tangui aca huachiqui, qataq 'enauac na ỹotta'a't shiỹaxauapi maye icoua'ai Ñim Lo'onatac 'Enauacna.

¹⁸ Cha'aye saishet da nache 'eetai' da qaicoua'ai na choxoraq, qataq saishet da nache 'eetai' da deqat da naquitaxac namayepi.

¹⁹ Ñaq 'anachaañi 'Am Nataxala', saishet qome da 'aua'aqta'a da na'amqaanaxac ca ỹale, ñaq 'am dataỹot qome da yaqto' 'anmit na ỹotta'a't shiỹaxauapi.

²⁰ 'Am Nataxala' ñaq 'auauo'o qome da lcolanaxa namayepi, yaqto' namayepi ỹaỹaten da choche shiỹaxauapi.