Salmos 8 - La'aqtaqa Ñim Lo'onatac 'Enauacna 2013

Da llo'oxoyec Ñim Lo'onatac 'Enauacna

¹ 'Am Nataxala', maye 'am qarta'a, da 'are'enaxat ỹataqta imattalec 'enauac ana 'alhua, da 'ayo'oxoyec qalaq npa'axanañi na ỹataqta qaỹoqotcheguemec piguem.

² Qaq souaxat na 'ampa'aguenaxauapi, nache 'auachegoxotchigui da llo'oxonnataxanaxac na ñaqpiolecpi qataq natai' ñaq lleptacpi, da 'ano'oxoosheguem ca ñi'iguenaxaqui, da yaqto' vi'iiguet 'anqa'en da ltaxaỹaxac na sa ỹalaqpi qataq na depa'aguenataxaatacpi.

³ Qaq naxa da semeteetac na piguem maye 'aro'onatac, qataq so ca'agoxoic qataq ana huaqaañipi maye 'aỹa'ano'ot co'ollaxa na piguem,

⁴ nache aỹem sheeta': «¿Negue'to' ca naigui ca shiỹaxaua da 'auennatega? ¿Qataq cam shiỹaxaua llalec da sa 'aucoua'ai?»

⁵ Cha'aye co'ollaq 'auo'ot, qalaq huac da 'eeta'am 'anqa'en na namaxashecpi piguem le'ecpi, nache 'aỹa'anem da la'amaqchec qataq da llo'oxoyec,

⁶ qataq 'aỹa'anem da huo'o naq 'enec da ilo'ogue nam 'aro'onatacpi co'ollaxa, qataq 'aỹa'anem da imata da ilo'ogue 'enauac namayepi.

⁷ Qaguetapi, nauegaxanaxala'pi huaca, shiguiỹacpi maye huauec,

⁸ qataq na maỹopi maye hueto'ot na piguem da huaỹotac, qataq na nỹaqpi maye huetangui aso auaxai, qataq 'enauac na queuotapigui' huetaigui na 'etaxat aso auaxai.

⁹ 'Am Nataxala', maye 'Am Qanatamnaxala', da 'are'enaxat ỹataqta lta'araic imattalec 'enauac ana 'alhua.