Salmos 147 - La'aqtaqa Ñim Lo'onatac 'Enauacna 2013

Da ño'oxonnataguec Ñim Lo'onatac 'Enauacna

¹ ¡Qaỹo'oxoren qome Ñim Nataxala'! Ỹataqta sa no'onolec da qaỹo'on na no'onecpi da qaỹo'onaxaato'ot Ñim Qanatamnaxala', cha'aye huo'o da lyacỹaxac qataq da lamaicỹaxac da qaỹo'oxoren Ñimaye.

² Ñim Nataxala' qaltaq no'oxoosheguem ye Jerusalén, qataq laỹona't na Israel le'ecpi maye laga't co'ollaxa.

³ Ñimaye nataren na dolata da lquiyaqteỹaxac, qataq ỹauo'o na laxataxat da ỹapolec na lque'emaxapi.

⁴ Ñimaye ỹaỹaten ye lcata ana huaqaañipi, qataq ỹauo'o na le'enaxat añi 'oonole anamayepi.

⁵ Ñim Qarataxala', ỹataqta lta'araic qataq 'añaxaic, qataq qaica ca loga't da laỹaanataxanaxac.

⁶ Ñim Nataxala', nauaxaỹaxaasheguem na choxoraqpi, qalaxaye huetaiya' naqa'en na qauemaicpi.

⁷ Qauo'onaxañeeto'ot Ñim Nataxala' da qaỹa'añiỹot da qana'achecỹaxaqui, qataq qauauoita'a aca nvique arpa, da qauo'onaxañiito'ot Ñim Qanatamnaxala'.

⁸ Ñimaye ỹapolec naqa'en na lo'oc na piguem, qataq talec naqa'en ana 'alhua na auot, qataq ana qasoxonaxapi ñaxaalec naqa'en na 'auaqpi.

⁹ Ñimaye ỹanem da lquia'axac na shiguiỹacpi, qataq na llalaqpi na teguesanpi naxa da iỹaxanaique ca aloq.

¹⁰ Ñim Nataxala', saishet da nachera da la'añaxac ca caaỹo, qataq da la'añaxac ca shiỹaxaua da ỹamaateguet,

¹¹ Ñim Nataxala', ỹamaateguet cam huo'o naq 'enec naqa'en Ñimaye, qataq cam pi'iỹa'a da lta'araic lauotaxanaqtaic Ñimaye.

¹² 'Am Jerusalén, 'avio'oxoren qome Ñim Nataxala', qataq 'am Sión, 'avio'oxoren qome Ñim 'Anatamnaxala'.

¹³ Cha'aye Ñimaye, ỹa'añaxatchiyiñi co'ollaxa naua 'anaso'omi, qataq ỹasaxalec da lchoxonnataxanaxa nam 'am netaiguipi.

¹⁴ Ñimaye ỹauo'o da nlagaxayec na 'ana'alhua, qataq 'am iquia'axanec na no'on ala na trigo.

¹⁵ Ñimaye namaxa na 'alhua da la'aqtac, qaq dam la'aqtac ỹataqta sa ilaua'ague da jec.

¹⁶ Ñimaye ilagaxaañi ana aloñi 'eeta'am naqa'en ca qagueta laue, qataq ilagaxaañi ana isaxa't aloñi 'eeta'am naqa'en ca alo.

¹⁷ Qataq namaq ana lache 'eeta'am naqa'en na loiquiaxa, qaq ¿negue'tom ca nala'aguet na latomaxa anamaye?

¹⁸ Qalaxaye da namaq la'aqtac nache quiguiñi naqa'en anamaye, qataq da ỹasheerelec naqa'en na la'at nache jec na 'etaxat.

¹⁹ Ñimaye, ỹachaxanalo co'ollaxa naua la'aqtaqa so Jacob, qataq ỹachaxanalo naua lqataxaco qataq naua lamaxasoxonaxaco so Israel.

²⁰ Ñimaye saishet da 'eetec de'era na laỹepi ỹotta'a't shiỹaxauapi, qaq saishet da huo'o lỹa ỹauatton nam lapaxañipi co'ollaxa Ñimaye. ¡Qaỹo'oxoren qome Ñim Nataxala'!