Salmos 145 - La'aqtaqa Ñim Lo'onatac 'Enauacna 2013

Da ño'oxonnataguec Ñim Lo'onatac 'Enauacna

¹ Aỹem huo'o ñaqa'en da 'ara'amaqchec, 'Am Ñatamnaxala' maye 'am Nta'a, chochaq tatec qome da sho'oxoreetac da 'are'enaxat.

² 'Enauaque qome naua na'axa'te da 'am sho'oxoreetac, chochaq tatec qome da sho'oxoreetac da 'are'enaxat.

³ Ñim Nataxala' ỹataqta lta'araic da la'amaqchec, qaq 'itchiguiñi qome da ño'oxonnataguec, cha'aye da qarauattonaxanaxac sa ivi' da la'amaqchec Ñimaye.

⁴ Na nta'alpi qataq cam llalaqpi ỹo'oxoreetac qome na 'aro'onatacpi, qataq ỹa'axattac na lta'araicpi maye 'auo'otpi.

⁵ Qataq ỹa'axattac qome da llo'oxoyec da 'ara'amaqchec, aỹem qalaq sa'axattac qome da llo'oxoyec nam 'auo'otpi co'ollaxa.

⁶ Ỹa'axattac qome da lta'araic la'añaxac na 'aro'onatacpi, aỹem qalaq sa'axattac qome da 'ara'amaqchec.

⁷ Nataqa'en ỹa'axatec qome da qalochiguiñi 'arsoxoyec, qataq do'onaxaatalec da no'on 'arataxac.

⁸ Ñim Nataxala' ỹataqta soxoraic qataq choxonnataxanaxaic, hualaxaunaxaic qataq huotaxanaqtaqaic.

⁹ Ñim Nataxala', ichoxoren 'enauac nam huo'o, da lchoxonnataxanaxa huetalec 'enauac na lo'onatacpi.

¹⁰ 'Am Nataxala', ñaq 'am ỹo'oxoren qome 'enauac na 'aro'onatacpi, qataq 'am ichoxoren qome nam 'am ỹa'amaqteetacpi.

¹¹ Ñaq ỹa'axat qome da llo'oxoyec da 'aro'onataxanaxac, qataq ỹa'axat qome da 'ara'añaxac.

¹² Yaqto' 'enauac na shiỹaxauapi ỹauatton da 'ara'añaxac, qataq da lta'araic llo'oxoyec da 'aro'onataxanaxac.

¹³ Cha'aye de'era 'aro'onataxanaxac chochaq tatec, qataq imattrec naua vi'iye de'era 'aramaxasoxonaxac.

¹⁴ Ñim Nataxala', nauaxaỹaxaasheguem ca mashe huañi, qataq nasoqtañi ca mashe qaica ca la'añaxac.

¹⁵ Da lmeenaxanaxac 'enauac namayepi 'am ỹalamaqtot, nache iuatta'a ca laloqo' da 'aỹa'anem ca aloq.

¹⁶ Qaq da 'auauachigui na 'arhuaq lauel, nache da 'arqouagaxanaqtaic talec 'enauac nam huo'o da lca'alaxa.

¹⁷ Ñim Nataxala' nalochiguiñi da nqa'aicỹaxac, da lchoxonnataxanaxa huetalec 'enauac na lo'onatacpi.

¹⁸ Ñim Nataxala' sa qaỹapeque naqa'en nam iỹaxaatacot Ñimaye, nam ỹoqta 'eesa da iỹaaxaatacot Ñimaye.

¹⁹ Ñimaye ipacchigui naqa'en nam 'eetapeguecpi nam huo'o naq 'enec naqa'en Ñimaye, qataq hua'axaỹa da lỹaxanaxac namayepi nache nca'alaxatec.

²⁰ Ñim Nataxala', ntela'a 'enauac nam ỹauotec Ñimaye, qalaxaye taỹa'a da nlaxaañi 'enauac na 'etaxaloxoicpi.

²¹ ¡Ñaq nauoigui qome na aỹap da ỹo'oxonnataxanaxa Ñim Nataxala'! ¡Ñaq 'enauac qome na shiỹaxauapi da ỹo'oxoren da qui'itta le'enaxat Ñimaye, chegoqchiguiña nagui qataq nache 'eetai' qome!