Tîte 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Pôlo, më wätə̂ earə̂ kua ndə̂ Ndjapä, kə̈ wâ ndjë tə̂ badjângele ndə̂ Jezü Krîsiti. Ndjapä wän mê ndə̂kə̂ pa më ka la azü ndə̂ tche dɨ̂ andjê ânyë andjë zâ su andjê sə̈ Jezü, ndə̂kə̂ pa andjë wunsə̂ lëge pö gundə̂sə̂ kə̂ zatə̂ andjê gbɛ̂ sə̈ Ndjapä,

² ndə̂kə̂ pa su andjê wa pâ tchîsûwu ndə̂ logbɛ̂ logbɛ̂, ndə̂ Ndjapä zâ bâlâ nə̈ alême, dokʉ̈tchê ndə̂kə̂ pa tche mbo arə gbɛ̂. Ndjapä ndə̂ tche tô pö lâme, tche môâbo yepa-a.

³ Ndə̂ lo nə̈ tâ tâ, Ndjapä ndə̂ tche wâtə̂ Earə̂ kə̂ tcha azə̂, tche nyîsə̂ pö ndə̂ yê nə̈. Tche nyïsə̂ nə̈ lə̂ köbosə̂ pö ndə̂ yê, ndə̂ tche zâ rə̂ sə̈ mê, gundə̂sə̂ kə̂ zama ndə̂ tche zâ rə̂ sə̈ mê.

⁴ Më mbö mbëtï âtə sə̈ mö Tîte, ndə̂ mo wâtə̂ lëge modô ndə̂ mê, ndə̂kə̂ za su mê la mö sə̈ Krîsiti wâ balë. Äfü pä Ndjapä Bha azə̂, la Jezü Krîsiti Earə̂ kə̂ tcha azə̂, mbo tchôtchô su tə̂ zə̈, kə̂ za zɨtɨ su sə̈ mö.

Kua ndə̂ Tîte mbô rə̂ lə̂ Egilîze ndə̂ Kërête

⁵ Më gbötə̂ zə̈ lə̂ dälä ndə̂ Kërête ndə̂kə̂ pa mo nyikrə arə ndə̂ gbô rə̂ wâ ndə̂kə̂ pa a nyikrə rə̂ lâme. Kə̂ kʉ akpôkpô azü pâ a-Egilîze lə̂ agö nə̈ balë balë, gundə̂sə̂ kə̂ zama ndə̂ më zâ rə̂ sə̈ mö.

⁶ Âwâbo pä a gbo ngâ pö ndə̂kə̂ gbɨtɨ tü balë lə̂ küma ngâ kpôkpô akrə-a, äwäpä tche watə̂ köchë ndə̂ ɛ̈chë kütû balë, äwäpä abechë ndə̂ yê watə̂ azü ndə̂ Krîsiti, ânyë âwâbo pä a yi pö lə̂ küma andjê tə̂ pö ndə̂ mbə̈lï-a, la pö ndə̂kə̂ kosə̂ ma-a.

⁷ Akrə ndə̂ tche sə̂ tə̂ küma Egilîze, tche wätə̂ akrə ndə̂ tche wun tchô pâ arə ndə̂ Ndjapä, âwâbo pä ngâ pö ndə̂kə̂ gbɨtɨ tü balë wa lə̂ küma yê-a. Tche də̂âbo akrə ndə̂ tche bhi gogo yê-a, âdəndjë akrə ndə̂ mêrâ-a. Tche də̂âbo akrə ndə̂ tche zâtə̂ yê gbɛ̂ ndə̂kə̂ djo pî-a, âdəndjë akrə ndə̂kə̂ mbo kʉ̈ʉ̈-a. Tche də̂âbo akrə ndə̂ tche gbo arə ndə̂ yê lə̂ köbosə̂ ngbongbo kə̂ gbo rə-a.

⁸ Praâbalë tche wünsə̂ kə̂ kʉ azü gbɛ̂ bhândə̂ yê, tche nyïndə̂ kə̂ mbo dâkâ, tche tö pö la köbo nə̈, tche wätə̂ djîrə̂ akrə, tche wä ngbî bëte Ndjapä, tche wünsə̂ kə̂ kitə̂ gʉ tə̂ su yê.

⁹ Äwäpä tche zatə̂ yê gbɛ̂ pâ pö Ndjapä, ndə̂ âwâtə̂ pö ndə̂kə̂ za su sə̈ Krîsiti, ânyë kə̈ wâ gundə̂sə̂ pö ndə̂ a nyîsə̂ nə̈ dokʉ̈tchê. Käko tchê wadje tə̂ akrə ndə̂ tche kʉ̂sə̂ kə̂ za wängö sə̈ azü tə̂ pö ndə̂ lëge pö ndə̂ a nyîsə̂ nə̈ sə̈ andjê, ndjë kə̂ nyisə̂ nə̈ sə̈ a-earə̂ kə̂ kosə̂ lëge pö pä, andjë tchâ köbo nə̂.

¹⁰ Angâ angbängbä azü kä tâ ndə̂ andjë kôsə̂ kə̂ dje ma, andjë dɨ̈ awünwün apö lakə̂ bôlo azü. A gbö azü nə̈ lâme tə̂ gbogbôsə̂nə̈ lə̂ gbâtə̂ ajuîfu ndə̂ andjë zâ su andjê sə̈ Krîsiti.

¹¹ Äwäpä mo ngbo ma andjê ëtâ, bëte andjë kä lakə̂ djingɨli tchə̂lə̂ küma azü lə̂ abûngrɨ̂ gbɛ̂ lakə̂ nyisə̂ rə ndə̂ âwâbô wâ ndə̂kə̂ pa andjë nyisə̂ nə̈-ê, bëte andjë wä la gʉ ndə̂kə̂ gbo arə lə̂ ngbongbo köbo kə̂ gbo rə.

¹² Ngâ akrə balë lə̂ gbâtə̂ andjê, ndə̂ tche wâtə̂ ngâ earə̂ ndə̂ma ndjapä ndə̂ andjê la tə̂ andjê, tche tö rə̂ päkëdə̂: «Azü gö ndə̂ Kërête wätə̂ a-earə̂ yepa logbɛ̂, andjë mbö rə batə̂ akïkï agia güsü, andjë də̈ a-earə̂ dö, kə̈ nyî kütû ndə̂kə̂ zɨ rə.»

¹³ Pö ndə̂ earə̂ ndə̂ma Ndjapä tô rə̂ lâme wätə̂ lëge pö. Djusə̂nə̈ kä, äwäpä mo hro la andjê tə̂ gbölösə̂nə̈ ndə̂kə̂ pa kə̂ za su andjê sə̈ Krîsiti lâme daka gbɛ̂.

¹⁴ Âwâbo pä andjë dje andə̂ma pö ndə̂ ajuîfu lâme-a, la andïɛ̈ ndə̂ azü ndə̂ andjë djê tchêngbâ andjê tə̂ lëge pö lâme.

¹⁵ Rə wätə̂ grôgrô nə̈ tchâtchu azü ndə̂ andjë wâ la grôgrô su. Praâbalë andə̂ andjanə̈ ndə̂ andjë wâ la kâkpö, ânyë kə̈ kôsə̂ kə̂ za su andjê sə̈ Krîsiti, ngâ rə ndə̂ âwâtə̂ grôgrô nə̈ lə̂ la andjê balë wâbo-a, praâbalë kə̂ wunsə̂ rə ndə̂ andjê lakə̂ rɨ tchə̂lə̂ su andjê wä la kâkpö.

¹⁶ Andjë tö rə̂ la ma andjê pä, anyë wûnsə̂ Ndjapä nə̂, dëkë kua ndə̂ andjê nyïsə̂ nə̈ pä andjë vûsə̂ yê nə̂. Ngbongbo rə ndə̂ andjê rö masə̂nə̈, azü ndə̂ andjë kôsə̂ Ndjapä, andjë wâbo ndjë ndə̂kə̂ mbo tchôtchô rə balë-a.