Obadia 1 - ŊWÀʼ NYÙY

Nyùy Tàr wíy màʼ ŋgeʼ e Edom kitu

¹ Vinyo vìn vi dzə̀ ve Nyùy‑iì ghemen ndzə e Obadia, wù yén é njà kinjeenjèm, a dzə̀ vinyo ve Nyùy Tàr woo Taà Ndzə‑əə̀ suuyin kùm kitúm kee Edom. Ví dzə̀ jii: Nyùy Tàr tùm ne ŋgaà ntum və e vitúm ví mvəm, vèr yú, a wù fúŋ ji á ŋáʼáy, aá du, e màʼ a Edom e rə́r sí. Ké Edom, Nyùy Tàr suuy jii:

² «Yuúrí e yù, m yíi sèn wò, áà wáa dzə shintèʼ e vitúm ví mvəm. Vitúm vi yíi a kay wò káyín.

³ Kiŋkoʼòrwùn ké ki bòʼtí ne wò, wò, wo à dzə́ e mvə̀m vilála, wò, wo à bàʼrìn é ntoò yùv, sévti jii, ‹A dzə̀ sèn la mo é nsay.›

⁴ Aà fə̀m bevbèv e yuv moo lùŋ, a láʼ yée fə̀m sə́ŋ e nsàn mejìy, bo m kù yíi ker wò fo fo, áà sə́y é nsay. Yoŋ mo woo Nyùy Tàr.

⁵ «A vishóŋ ví nə̀ə́ wír, kìn nə̀ə́ vé kimfaàsìi vitsə́ʼ, á yòʼ kù yíi shoŋ a dzə̀ vifá ve á kér shií shó à? A nə̀ə́ vé ŋkavi é sum, la á yòʼ kù kàv, e màʼtì viŋkwir à? Á bèy, Edom, á kù wíy yèr wò yérin.

⁶ «Vèn yén búʼú mo ashóŋé suùn rám Esav. Vèn yén mo á yèrìn kéŋ yév.

⁷ Edom, ŋkar sé sidzə̀m si wíy boʼtí wò, e dù, e nəʼə́r e bìíy. Wír ve á tomen wò, a màʼ rə́rí wíy bìnkìr, e sèn wò. Ŋkar sé se tim sí wíy way vitám vé, a bó à yòʼ wíy gwàrìr.

⁸ «Kishiíy ke m maʼ ŋgeʼ e Edom kitu, é m laar akiíy vév adzə̀m, é vifií ví may fó Gwan Esav. Suuy mo woo Nyùy Tàr.

⁹ Éè Teman, vé rər vée wíy a fàn, a yàʼ. Á wíy laàr wír fo Gwan Esav e dzə̀m.»

Edom‑eè nyavrì e fər və

¹⁰ «Yiì nyavrì ye wò‑oò nyàvrìn e fər wò Jakov, aá wíy laàr ven, e shoór ŋkuuŋkùŋ.

¹¹ Kishiíy ke vitúm vi‑iì bvəʼən shúu kày fər wò, e kùúy vifá və́, wò‑oò tíy, leey leèyín. Viŋgwìy vi‑iì nə̀ə́ é Jerusalem, a tsəm kàŋ, a jàv fó, aà kù kár fo mvəm moo wír woo áwuné ŋgoo.

¹² À yòʼ‑oò yíi a seŋ e fər wò kishiíy, kishiíy ke vishí və́ ví‑iì birin. À yòʼ‑oò yíi a sheʼ Juda e kishiíy ke vé‑eè siir fó e vifə̀m. À yòʼ‑oò yíi a sheʼrí sheʼrín e wun kishiíy ké mendzə̀n.

¹³ À yòʼ‑oò yíi to shúu kày ŋkàlaʼ wìr vém é kishiíy ke ŋgeʼ si‑iì nəən áwune. À yòʼ‑oò yíi a seŋ bìʼ kilày kfə́, kishiíy ke kilày ki‑iì nəən wun. À yòʼ‑oò yíi kuúy vifá və́ e wun kishiíy ké ŋgeʼ.

¹⁴ A bó à yòʼ‑oò yíi a tiy e mentàrnín é kishiíy ke ŋgeʼ si‑iì nəən wun, a kàrìr wír və́, aá woóne, nyéŋé, a dùŋrì wír ve vé‑eè sénin ji á boy.

¹⁵ «Kishiíy ké Nyùy Tàr kí sì fó mentsə̀m, dzə̀ kishiíy ke m tínen nsaʼ vitum vidzə̀m. Edom, kinyo ke vèn yiìn kí dzə̀ kíwun ke á yíi yiì sa e vèn. Yii yéné yíi bìnkìr e věn kitu.

¹⁶ Mo vèn‑eè koʼon e mǒ gwan wo ranén, a no fo noón, dzə̀ mo vèn à vitúm vidzə̀m vi wíy a no bàr ŋgeʼlàʼ, a no, a rəvkír, e meé mo á wíy taʼrí e mày.»

Nyùy Tàr wíy koʼór Isray

¹⁷ «Yii bèy, Gwan Sion wíy a dzə kibeèy ké wìr ve á wíy bòy, a fóo wíy a dzə jeéy ji kirə́ʼ kém, é rám Jakovi nèn yì vitsə́ʼ vév.

¹⁸ Rám Jakovi wíy a dzə və́y, é rám Joosevi wáa dzə kiliímé ke və̀y. Yii bèy, é rám Esavi wáa dzə kfə́ wúy, aáwune nèn tòn rám Esav, aá shwí, e rèŋ. Bó wìr yòʼ wíy bòy fo Esav ram.» Á mo Nyùy Tàr yòŋèn.

¹⁹ Lóo dzə e ghan see shooy, é wír veé Negevi nèn yòv Gwan Esav, é veé Shefelàa yov nsay wìr veé Filistia, e kfə̀n yòv nsay Efrayim, à ye Samaria, é rám Benjamine nèn yòv kfə́ Gilead.

²⁰ Wír veé Isray ve vé‑eè koon, e dù sho e Hala, á wíy yòv Fənisia, e dù, e meé e Tsarefat. Wír veé Jerusalem ve vé‑eè koon, e dù sho e Sardis, á wíy yòv ŋkà se laʼ seé Negev.

²¹ A vé saʼa kù wíy a koʼ e Gwan Sion, é wír veé Gwan Esavi kú a yu sáʼ a dzə̀ fó fo, é vifon vi wáa dzə vé Nyùy Tàr.