Aysaya 1 - ŊWÀʼ NYÙY

¹ Ŋwàʼ və̀ne naarì vinyo ve Nyùy‑iì ghemen ndzə, e dìn e Aysaya woo wan Amot, kùm wír veé Juda wùn à ŋkàlaʼ yee Jerusalem. Wù‑uù yèn vinyo vìn e ghan sí jeéy jeéy mo afone‑eè sáʼ e Juda, wùmòʼ e wùmǒʼ bàm. Wù‑uù yèn vímóʼ vee vinyo e ghan se Ussiya‑aà sáʼ vifon, e yèn vímóʼ ví é ghan se Jotam‑eè sáʼá, vímóʼ ví e Ahas ghan, vímóʼ ví e Hesekiya ghan.

Nyùy roómé wír və́

² Éè yùv, yuúrí. Éè nsay, yuúrí, e yù. Nyùy Tàr suuy jii, «M lìy wón, e gèʼ shó, á kúykír, e nèn bìnkìr, a tsəy kóy vèr áwune.

³ Nyàm yee mbòŋ kì wír wo wù kér wun, a kimbèʼbìy kí kì wír wo wù yiir wun. Yii bèy, a wír veé Israyi yòʼ kì fo á binè. Bó wír vémé yòʼ kiiy kinyo ke m yii aáwune.»

⁴ Yìiy, kitúm ke Nyùy sháʼnin kinyo, aá kù yii a dzə̀ kíwun. Wír, aá jáy vinyo e ŋgeʼ, a ví rə́ʼəy áwune rəʼəyín. Wón, aá kù buʼtì vinyo moo atàr vév, táti kifá kidzə̀m, kuvrì kùvrìn. Áwune màʼày ne Nyùy Tàr, a ŋway wun woo Ŋgaà wo Ranén woó Isray ŋwáyín. Á bìn ne ndzə̀m e wun, e lèʼ wun léʼén.

⁵ Vèn taʼ ji Nyùy kú a ker ven a dzə̀ é wo ye tavíné ji ka? Vèn shaa fo mbìy, tsə́y kóy vèn à Nyùy bìʼ ka? Vèn sí kér vileémé é kitu, mo wù dzə̀vìn ven, a vifií vén ví kù sí bvəə́ri bvəə̀rín.

⁶ Kèʼ fo věn wuù, e koʼ, e meé e kitu, bó kirə́ʼ kén ke kí tár kímóʼ kí yòʼ dzə̀. Virə́ʼ vén ví dzə̀ visorkìn, a dzə vibuvrìn, a viváv ví jeʼèmè, a bó wìr wóo sə ven, e kam vimbùvrì yòʼ dzə̀, e bóo jòkìnyàʼ, e way shív sho, e kur.

⁷ Á màʼày ne kitúm kén, kí kfə́n é vifə̀m, aàŋgaà vén vibàné tòn ne ŋkà sén sé laʼ. Áwune kù sí káv vifá fo věn sum sí, yí e věn si. Vitúm ve sən ví sə̀ʼsí ne viyíkìr fo věn nsay, e bìvír nsay yen.

⁸ Wír veé Jerusaleme kù sí tíy ji gérkíkí, tíy amòʼón moo táv shìy woó súm vitiír vé *vayin. Tíy amòʼón moo kibàn ké shìy keé súm bòʼ. Tíy là ŋgaà benben moo ŋkàlaʼ ye á gìŋèn e rə́r sí.

⁹ A là fo Nyùy Tàr woo Taà Mànjòŋ wáa ber wír ámóʼó fo vèsə́n ram, bo vé‑eè laàr ne vèsən moo wír veé Sodom, e sə̀ʼsí vèsən moo wír veé Gomorra.

¹⁰ Ven vee atǎr saʼ ve á noon fo atǎr saʼ veé Sodomé loŋ, vèn yuúrí kinyo ke Nyùy Tàr suuy ki. Ven vee anjiì vinyò ve bi ví moo wír veé Gomorra, vèn fó vituʼùr ví, e yuùrí ntir se Nyùy wòsən sí kijuŋ.

¹¹ Nyùy Tàr dzə́r jii, «Vèn seéri nyám sigháʼán, cu mo shó. Vèn cu bèy, kwaʼtì ji kí boŋ mo é gha? M yòʼ dzəə́ taʼ feyì ji vèn kfə́n a tòn viyáʼ, a cù mo shó, a tòn fóm se nyàm, nyám se vèn yiirin kijuŋ. M yòʼ dzəə́ yú vijuŋ ve mensə me ambòŋ, kìn me wón njiì, kìn me bvəy si, mensə́ me nyàm se vèn yii cu sho e mò.

¹² Vèn rə́si láŋ táakìbùʼ wóm, kù rə́si meʼèm, wiy e cúu ben, a kì diy la vifá vee shoon feyì?

¹³ Cu yéné dzə̀ kifá kisáŋ, lá vèn dzə́ə a wìy sho ji á yii e mò. Kiláy ke vèn ton ki dzə̀ kfə́ ji *kifàn fo mò. Ŋwee wo fíyi fəə́, vèn wàa yiì cu, e kfə̀n a meèmè e vishiíy vé bam. Kiyá ki kúmé, vèn kù yì ŋkàʼ sí. Bó yòʼ dzə̀ féyì m lèéy ŋkàʼ sén, a vèn yii, laarì a dzə̀ sí yém shó.

¹⁴ Ké ru kí, m ban ŋkàʼ seé kitu ke ŋwee se vèn lemè, ban vishiíy ve vèn lem ji vee jeéy féyì. Ŋkàʼ se vèn lem sìn si sí tínsin mo tinsín. M dòr ne sho, a bó m yòʼ dzəə́ koŋ e yu.

¹⁵ Vèn wíy nàn wó e yuv ji á bunrì, é la m yòʼ lèéy, à leéyi shó. Fə̀m mo vèn gísin, bunrì mo akàŋ akàŋ, bó m yòʼ wíy yuurí ven. Vèn yùyrí ne wíri, a wó yéné kù sì wó mensəə.

¹⁶ Vèn fə́tí wó yéné fó yiì ye bií, e lèm vitú vén, é ví wáa dzə viránén. M yòʼ dzəə́ taʼ, e kfə̀n yen, a vèn buʼ kinyo. Vèn ku neèr yii ye bií,

¹⁷ e yèʼéy yii a dzə̀ ye juŋe. Vèn ku wày ŋàŋ, a yiì vinyo a dzə̀ vee tìítiy. Vèn yén wír wo wù nyavrì e wíri, vèn kàntì ŋgaàŋ. Vèn ku kìŋsìn gháy wón tsə̀ə́, e tòm vinyo ve vikǐy ŋkfəə.

¹⁸ «Mo woo Nyùy Tàr nén a suúy e vèn jii, vèn wiy, é vèsən tar, e yèn mo dzə̀ kí wàa dzə. Fə̀m mo ajay véné gháʼ fóo sù moo vishim veé ndzə̀y, bo dzə̀ á sù, é vèn rán, a fər ji páv moo mentíy me mè gbu fo yuv. Fə̀m mo ajay véné baŋ, səə́ne moo nshòm ye á wáy e ndzə̀y, bo dzə̀ á sù, vèn ràn, a fər moo wuy ye á komen fo njiì wùn.

¹⁹ A vèn fèn dzə̀ kibáʼtín yé a yiì mo m suuyì, a yunín mo, bo vèn yíi a yi vifá ve yi ve ntay, ve nsay fəərì.

²⁰ Yii bèy, a vèn tèn ji á yòʼ‑óò yúnín mo, e kù a tsəy a dzə̀ kóy vèsən, bo vèn kù‑úù kpú yé rər. Kù suuy mo woo Nyùy Tàr jí sìn e vèn.»

Ŋkàlaʼ vinyò ve bi ví

²¹ Yìiy, á wír veé Jerusalem a? Wír, a vé‑eè ghán e Nyùy mbòv, e lò lèn, a ghvəm a dzə̀ anyùy kisaŋe, kù moo wiíy wo wù leʼen lúm, e dù visàkì. Ŋkàlaʼ, a vé‑eè yii a dzə̀ vinyo vee réŋ ví fó, yúnin Nyùy fo, ghán e wun mbòv. Ké lèn ki, á kòytí ne a dzə̀ kinjuyrì.

²² Abaày, wìr veé Jerusalem, vèn‑eè dzə̀ é shií moo *kisha ke mbàm kee wúntí kíwun. Yii bèy, ké lèn ki, vèn kfə̀n ne ji kisá ké kishà. Vèn‑eè dzə̀ moo shiluʼ she shí yuumen é shuù, ké lèn ki, vèn kfə̀n ne ji meluʼ me á bìŋrìn e mendzə́v mè.

²³ Atǎr wòŋ véné tsə́y kóy wùn à Nyùy, kfə̀n suúsin wùn aàshóŋé. Áwune adzə̀me kù diy a dzə̀ kòyàr, leey ji wìr bvə́n kiwó aáwune. Bó á yòʼ fə̀m kiŋsìn gháy wón tsə̀, a bó á yòʼ bin nsaʼ, fó e wiíy ŋkfə.

²⁴ Bìʼ vinyo vìn, Nyùy Tàr, wun woo Taà Mànjòŋ nén a suŋnín, wun woo Nyùy woó Isray wo wù kér vitaáví yoŋ jii, «Mo vèn kfənen ji aŋgaà vém vibàn, m yíi lovtí e vèn, e meé mo dòʼshwíiy wom yíi rə̀sìn. Mo vèn sə́ kóy vèsən, m yíi siìr ŋkfə́tir nyar ye vèn yiìn, m wáa yu.

²⁵ M yíi nàn kiwó kém, e màʼ ŋgeʼ e věn kitu, e fíʼ yiì, é vèn maʼti vinyo ve bi ví. M yíi shèŋrì ven moo kisha ke á liìn ghán, e tòn, é liì won kisaŋ may e dzə̀m.

²⁶ M wíy siìr atǎr saʼ vén fó, aá wáa dzə moo vee fó mbìy, é vé ntir véné wáa dzə moo veé ghan sé mbìy si, é wíri nèn a yòŋ ven veé Jerusalem jii, ŋkàlaʼ wìr ve á yúnin Nyùy, a yòŋ ji ŋkàlaʼ wìr ve á tíy e Nyùy wùn.»

²⁷ Wír veé Jerusaleme kfə̀n wíy lò, a yiì vinyo vee tìítiy, lóo yiì, é Nyùy Tàr nèn tìn áwune fó ŋgeʼ. Áwune wíy kfən e Nyùy Tǎr wùn, a yunín wun, é wù nèn fə̀ə́r áwune fó ŋgeʼ ye á yéné.

²⁸ Yii bèy, wù wíy tatí wír ve á tsə́y kóy wùn áwune, à ve á yii vinyo ve bi ví, e màʼ ŋgeʼ aáwuné kitu. Á bèy, a wù wíy laàr wír ve á méŋ wun láarin.

²⁹ Rúrú, vèn wíy a woomé bìʼ vicí vé *terebint ve vèn‑eè yáŋri, cu anyùy fo. Vèn wíy a beʼ dzə̀rkìtu bìʼ viboó ve vèn‑eè du e shií shií, cu anyùy fo.

³⁰ Á bèy, bo vèn kù wíy a dzə ji kicí ké terebint, a dzə̀ ke vav si sooyin ne, a dzə ji kiboó ke mendzə́v mè yumen ne fo fo.

³¹ Fə̀m wír vén ve kuʼkìné, á kù wíy a dzə ji vidaànè ve və̀y, é fer yéví kfə́n ji sáy se və̀y. Nyùy Tàr wíy tatí ŋgaà fèr wùn à fer rəə́, e tòn, a bó wìr wo wù wíy ndzəmér yòʼ wíy a dzə.