Filimoni 1 - Ulufingo Ulupya

Ukulamuka

¹ Ane ne Pabuli, ne indi mujele pachifukwa icha Kilisitu u Yesu, sona na mubuzilo ubwa Timoti umukamu witu. Inkumusimbila u Filimoni, yuyo mumanyani witu, sona nu mubombi uwamwitu.

² Inkumusimbila sona umuyemba witu u Afiya nu Alikipo umusikali uwamwitu, sona ni chipanga chicho chikukomana munyumba yako.

³ Ichisa nu mutende ivyakufuma kwa Chala u Tata witu, nu Mwene u Yesu Kilisitu vibanje namwe.

Nizya lughano nu lwitiko ulwa Filimoni

⁴ Mukamu witu Filimoni, inkumupalizya u Chala wane akabalilo kosi, bo inkukukumbuka munyiputo zyane.

⁵ Pakuti nkwivwa nizya lwitiko lwako mwa Mwene u Yesu, sona nukuti ukubaghana nkani abantu bosi abazelu aba Chala.

⁶ Nkwiputa ukuti ubupoka bubo tukugabana namwe butupeleye ukuti twivwisye nkani ulusayo losi, lulo lwitu pakumamatilana poka nu Kilisitu.

⁷ Mukamu witu, ulughano lwako lwampa ubuhobosu nkani nu lukazyo, pakuti waghasangalusya amoyo agha bantu abazelu aba Chala.

Ukumulambilizya u Filimoni pachifukwa icha Onesimo

⁸ Polelo napapo ne mujivu nkani mwa Kilisitu ukukulamula ukuti ubombe zizyo ubaghiye pakuzibomba,

⁹ loli pachifukwa icha lughano, inkwiza pakukulambilizya bulo. Ane ne Pabuli umuntu umughosi, sona pakabalilo aka indi mujele pachifukwa icha Kilisitu u Yesu.

¹⁰ Inkukulambilizya pachifukwa icha mwana wane u Onesimo, yuyo inkaba ne wise pakabalilo kako bo indi mujele.

¹¹ Kale umwene atakaba ni mbombo kukwako, loli ilelo anganyavwa ane nawe bulo.

¹² Inkumutuma sona kukwako, kokuti inkukutumila umoyo uwane nu wane.

¹³ Ane nalondagha ukuti imbanje nawe kuno, umwakuti anganyavwa mubuzilo bwako pakabalilo kako, bo indi mujele pachifukwa ichakulumbilila Amazyu Amiza.

¹⁴ Loli ntakalondagha pakukufyenga bulo pakubomba ichi, loli ukuti uchibombaye bulo mubwighane ubwako nu bwako.

¹⁵ Lumo ichifukwa chicho u Onesimo akepukako kukwako pakabalilo akapimpa bulo, chikaba chakuti abanje nawe bwila.

¹⁶ Ilelo ate muzya sona, loli achilapo pa buzya, nkani-nkani mukamu wane umughaniwa. Imughanite nkani, loli awe ubaghiye umughane ukuchilapo, pakuti mukamu mwa Kilisitu.

¹⁷ Nanti ukunsenda pakuba ne mumanyani wako naloliloli, umupokele ukuyana na mumo ungampokelela.

¹⁸ Nanti akunangiye chimo, pamo nanti ali ni nkongole nawe, inkongole yiniyi yibanje yane.

¹⁹ Ane ne Pabuli inkusimba izi ni nyobe iyane ni yane. Inkwiza pakulipila inkongole yilayila. Chitakulondiwa pakukukumbusya ukuti awe uli ni nkongole nane, bubo bumi bwako.

²⁰ Ee, mukamu wane, nalamba unyavweko pachifukwa icha Mwene. Unsangalusyeko ngati ne mukamu mwa Kilisitu.

²¹ Bo inkukusimbila ukalata uyu, inkusubila ukuti naloli ukwiza pakubomba zizyo nakulaba. Inzimenye ukuti ukwiza pakubomba ukuchilapo pa zizyo nakulaba.

²² Ehee, akantu akanji ko aka: Unjanizye ichipinda, pakuti inkusubila ukuti u Chala akwiza pakwamula inyiputo zyinyu mwebosi, nukuntuma sona kukwinyu.

Ukulamuka ukwabumalilo

²³ U Epafula, yuyo ali poka nane mujele pachifukwa icha Kilisitu u Yesu, akukulamuka.

²⁴ Ababombi abamwitu, u Maliko, nu Alisitalika, nu Dema, sona nu Luka bope bakukulamuka.

²⁵ Ichisa icha Mwene u Yesu Kilisitu chibanje namwe mwebosi.