3 Yɔni 1 - Mȧyukunande Maŋama Maŋ

¹ Maŋaye ka bakalaŋ woŋ. Yama gbali kuthagba koŋ koŋ ka Keiyusi wo thimo yaŋ woŋ mathimo maseŋa maŋ.

² Wɛndaŋ wo thimo yaŋ woŋ, yaŋ ni kuraminɛ haliko wuyɔhɔy wu be niyɔ iŋ yi, e yi niyɔ iŋ kɔtɔ kupethɔy. Yaŋ kɔthɛŋ ba dɔma na yindo pethɔy na ka yina.

³ Yaŋ yehitɔkɔy nde wumandiŋ naa see mbɛnda ntuŋ binɔndi beŋ, e bindɛ mina si tepe na yehe yi niyo lanɛya ka bohitɔkɔ nɔndi baŋ, nɔŋ na bare nɔŋ yi bɛŋ bohe na.

⁴ Ntha kihɛna kutɛ niyɛ ba yaŋ yehitɔkɔ nɔŋ ba yuyɛ ba dɔma na mpati bikiyaŋ beŋ bi yemeŋ gboŋa baseŋa baŋ.

Keiyusi gbuŋunuwo

⁵ Wɛndaŋ woŋ, yi ayɔhɔ niyo lanɛya ka wali bakɛnda ba yi ni ba mbɛnda biKristɛni beŋ, hali na niyɔy wuŋ na yi kɔthɛta bindɛ.

⁶ Bindɛ tepe mina dondo baŋ ka mathuŋande ntuŋ maŋ ba mathimo makɛnda maŋ. Yaandi, mase bindɛ ba kaa ka kɔtɔkɔy iŋ biyasi namɛŋ haŋ naa yehe wuŋ Masaala na.

⁷ Ba bindɛ kei biyasi namɛŋ haŋ ba ka niya wali ba ka Masaala baŋ, awa bindɛ tha yɛrɔkɔ ntha o ntha maŋaye ka biya bi be ni lanɛya beŋ.

⁸ Awa mindo Kristɛni beŋ, miŋ kiŋ ba mase biya beŋ beŋ baŋ, haliko miŋ be ni kufɛŋ kukɛntuŋ ka wali namɛŋ ba gboŋa baseŋa baŋ.

Dayaturɔfisi mɛnɛ Dɛmitirɔsi

⁹ Yaŋ gbale nde kuthagba kuthurɔy ka mathuŋande nda maŋ, kɛrɛ Dayaturɔfisi, wo thimo ba niyɔkɔ bayaha woŋ, wundɛ tha yama poniyɛ kuiha.

¹⁰ Huna, naa yaŋ see, yaŋ kɔŋ si gbonkoi ba bɛyiniŋ fooma ba thanki wundɛ niya baŋ. Wundɛ kɔŋ kei kaŋ tɛpa bɛyiniŋ banɛnɔy e ndɛ kɔ kaa kaŋ kɛrinkiyɛ mina hothi. Kɛrɛ wuŋ kutɛ thankɛ hɔkɔŋ ba wundɛ; ndɛ yereketa mbɛnda ntuŋ biKristɛni beŋ naa bindɛ see. Wundɛ kɔŋ pindi biya bi thimo ba bindɛ yɛrɔkɔ beŋ, e ndɛ kɔ yɔla ba bindɛ funkuta ka mathuŋande nda maŋ.

¹¹ Wɛndaŋ wo thimo yaŋ, ba yemitɔ bɛyiniŋ banɛnɔy, kɛrɛ yemitɔ bɛyiniŋ bayɔhɔy. Wɔ o wɔ wo ni bɛyi bayɔhɔy, ndɛ na kɔthɛ Masaala na; kɛrɛ wo ni bɛyi banɛnɔy, wɔ bɛina kutiyeketa hɛ Masaala na.

¹² Biya beŋ fooma bi kɔŋ gbonkoi wuyɔhɔy ba Dɛmitirɔsi; nɔndi baŋ gbeeŋ bɛŋ gbonkoi wuyɔhɔy ba wundɛ. Awa miŋ hɛlɛŋ miŋ gbonkoi wuyɔhɔy ba wundɛ. Yi kɔthɛŋ magbonkoi makɛntuŋ maŋ, ma kiŋ maseŋa.

Ŋamaani ŋamankɛ ŋaŋ

¹³ Yaŋ kiŋ iŋ bɛyiniŋ babɔyɛ ba yina tepe, kɛrɛ yaŋ sa thimo ba wuŋ niya ka kuthagba.

¹⁴ Ba yaŋ tuteŋ thukuma ba yina kuta ka wuthurɔy wuŋ baŋ. Miŋ be gbonkoi bɛŋ ka tha banthe.

¹⁵ Haliko mathɛbɛ ma niyɔ iŋ yi. Binyathikiŋ nda beŋ fooma maaŋ yina, awa maaniyɛ yama binyathikiŋ bikiyaŋ beŋ fooma.