Maliko 16 - IBAYIBOLO 2024

Ukuzyuka kubufwe ukwa Yesu

¹ Bo lyachila Isiku Ilyakutuzya, u Maliya Magadalena nu Maliya unyina uwa Yakobo nu Salome bakaghula amafuta aghakununkila ukuti babukaye pakughupakazya umuvimba uwa Yesu.

² Pandabindabi nkani pisiku ilyakwanda mwa sabata, bo izuba lyafuma, bakabuka kwipumpa.

³ Bo bakwenda muzila bakalalusannyanga bakatinji, “Nkimba wewenu akwiza pakutubunguluzizya ibwe ukulyefya pamulyango wipumpa?”

⁴ Ibwe lila likaba likulu nkani. Loli bo bennya, bakagha ibwe libunguluziwe kale pamulyango pala.

⁵ Bo binjila mwipumpa, bakennya umulumendo, yuyo akavwala inkazo iswepu ikaye kunyobe indilo, po bakachenuka nkani.

⁶ Umulumendo yula akababuzya akati, “Mutakachenukaye. Inzimenye ukuti mukumulonda u Yesu uwamu Nazaleti, yuyo akakomeliwa pachipinjika. Atalimo muno, azyukite! Ennya, ubuzilo bubo bakamughonekapo bo ubu.

⁷ Losi ulu bukagha mubabuzye abamanyili bache, nkaninkani u Pitala muti, ‘U Yesu alongolela ku Galileya. Kulakula mukwiza pakumwennya ukuyana namumo akababuzizya.’ ”

⁸ Bakachenuka nukutetema, bakafuma mwipumpa nukuchimbila. Batakamubuzyapo nu muntu yumo papo bakanyilagha. [

Ubumalilo ubwakale ubwa Mazyu Amiza 16.9-20 U Yesu akumubonekela u Maliya Magadalena

⁹ Bo u Yesu azyuka pandabindabi pisiku ilinji bo lyachila Isiku Ilyakutuzya, akamubonekela tasi u Maliya Magadalena, yuyo mumwache akefyamo imizimu imibibi seveni.

¹⁰ U Maliya akabuka pakubabuzya babo bakamukonkagha u Yesu. Bakaba ni chitima nukulila.

¹¹ Bo bivwa ukuti u Yesu mumi nukuti u Maliya amwenizye, batakasubila zizyo u Maliya akanenagha.

U Yesu akubabonekela abamanyili babili

¹² Pisinda pache u Yesu akababonekela mubunji bulo abamanyili babili, babo bakaba pabulendo bwabo ubwakubuka mukaya.

¹³ Bakanyokela nukubabuzya abamwabo, loli batakabasubila.

U Yesu akubabonekela abamanyili 11

¹⁴ Pabumalilo, u Yesu akababonekela abamanyili 11 bo bali pakulya. Akabachemela pakuti batakaba nu lwitiko, sona bakaba bakafu nkani amoyo pakubasubila babo bakamwennya ukuti mumi.

¹⁵ Akababuzya akati, “Bukagha muchisu chosi ichapasi nukulumbilila Amazyu Amiza pakasi pabantu bosi.

¹⁶ Umuntu wesi yuyo akusubila nukoziwa akwiza pakupokiwa; sona umuntu wesi yuyo atakusubila akwiza pakufundiwa.

¹⁷ Abantu babo bakunsubila bakwiza pakupeghiwa amaka aghakupelela ivyika. Bakwiza pakwefya imizimu imibibi pakubombezya itabwa lyane nukunenela muneno injeni.

¹⁸ Nanti balema injoka pamo bang'wela chimo chicho chikughogha, bate bakavulale. Bakwiza pakubika inyobe zyabo pa babine, po bakwiza pakupola.”

U Yesu akusendiwa pakubuka kumwanya

¹⁹ Bo u Mwene u Yesu amala pakunena nabo, akasendiwa pakubuka kumwanya nukwikala kunyobe indilo iya Chala.

²⁰ Abamanyili bakabuka nukulumbilila posi na posi. U Mwene akabombagha nabo nukusimikizya ukuti ubulumbilili bwabo bwanaloli, chifukwa icha vyika vivyo bakabombagha.] [

Ubumalilo ubunji ubwakale ubwa Mazyu Amiza 16.9-10

²¹ Abakolo bakabuka kwa Pitala na ku bamanyani bache nukubapangila mubupimpa ivintu vyosi vivyo bakabuziwa.

²² Pisinda pazinizi, u Yesu umwenecho akafumusya amazyu agha bupoki ubwa bwila na bwila, amapaghuliwa, sona nagha bwila na bwila ukufuma kubufumilo mupaka kubwinjililo bwizuba ukwendela mu bamanyili bache.]