YEREMIA 1 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Shitabu yishi shilimu na makhuva kalomolomwa na Yeremia mwana wa Hilikia, wali mulala khu vasalisi vi litaala lia Anatsotsi mu lusomo lwa Benyamini.

² Mwami Nyasaye yalomoloma khu Yeremia khumuhika kwi likhomi na chivaka muliamiha liu Mwami Yosia mwana wa Amoni wamihanga Yuda.

³ Mwami Nyasaye yalomoloma khandi khuye mumatukhu kiliamiha liu Mwami Yehoyakimu mwana wa Yosia, wamihanga Yuda. Nikamali khwikholekha kario, yalomoloma hali khanyishi khuye, khutukha khumuhika kwi likhomi nu mulala muliamiha liu Mwami Zedekia mwana wa Yosia wamihanga Yuda. Vandu va Yerusalemi vahilwa mu vuhaambe khu mweli kwa kharanu khumuhika kwenoko.

Khuli Yeremia Yalaangwa

⁴ Mwami Nyasaye yambolela,

⁵ “Khali nushili khuvelekhwa, nali nakhumanya, khali nushili khwivulwa, nali nakhutakaasa; nali nakhurovola khuva muprofeti wa vandu vi tsimbia tsiosi.”

⁶ Nalwo lwa nachipa, “Yivi Mwami Nyasaye, ni kilikali, inzi shinamanyakhu khuli nyala khulomoloma tawe; shichila ndi mwana wi shiyayi vutswa.”

⁷ Mwami Nyasaye yambolela, “Ukhavoolakhu, ‘Ndi mwana wi shiyayi vutswa,’ tawe; shichila uliitsa khutsia khu vandu voosi va niitsa khukhurumakhu, khandi shia shindu shiosi shiambola nashio shia uliitsa khuvoola.

⁸ Ukhavaria tawe, shichila ndi nivi khukhulinda. Inzi Mwami Nyasaye mali khuvoola!”

⁹ Nalwo lwa Mwami Nyasaye yanyiila mukhono kwekwe, natiila khu munwa kwanje, manambolela, “Nunundi mali khukhuha makhuva ka nulomolome.

¹⁰ Lola, nunundi mali khukhurovola khusinjilila vandu vi tsimbia tsiosi nende vwami, khurinyuula nu khusambula, khwononyinya nu khutivitsa, khumbakha nu khuraaka.”

Malolo ki Vindu Vivili

¹¹ Mwami Nyasaye yandeva, “Yeremia, ni shina shia uloli?” Namuchipa, “Lusia lu musala kwa alumondi.”

¹² Mwami Nyasaye yavoola, “Uloli vulahi, khandi nindililanga ndole likhuva lianje ni limali khurweshitswa.”

¹³ Mwami Nyasaye yalomoloma khwinzi khandi. Yareeva, “Ni shina shindi shia uloli?” Namuchipa, “Ndoli inyungu niyitsanga khu mulilu khuluveka luli ivuluka, khandi ili himbi khwinaminywa.”

¹⁴ Yambolela, “Matiinyu kaliitsa khuraanjila khuluveka luli ivuluka khukwila vandu voosi vamenyanga mu shivala shinu.

¹⁵ Shichila nanganga halala vandu vi tsimbia tsiosi khurula mu vwami khuluveka luli ivuluka khwitsa. Vami vavo valiitsa khwitsa; khandi shia mulala khuvo, aliitsa khurecheshitsa shisoko shieshie shiu vwami mu vwinjililu vwi vilivwa via Yerusalemi. Valiitsa khuvotokhana masisi kalio nu khuvotokhana shia litaala liosi mu lusomo lwa Yuda.

¹⁶ Niitsa khukhalachila vandu vaanje, shichila vutamanu vwavo vwosi. Vanzivilila khandi nivakhola misango chiu khusamba vubani khu vanyasaye vandi, khandi nivasaala khu misambwa chia vo vene valomba.

¹⁷ Navutswa yivi Yeremia, wirecheshe; simukha utsi khuvavoolela shia shindu shiosi shia khuvoolela. Uvuli khuvaria nunundi, shichila lwa uliitsa khuva nuli navo uliitsa khuria khuvira shichelo.

¹⁸ Mali khukhukhola khuva khuli litaala liavotokhanwa ni imbinga, irilu yalombwa khu shivia, masisi kalombwa khu mukasa, khusinjila shia havundu hosi mu shivala shinu, khusinjila imbeli wa vami va Yuda, vimilili vavo, vasalisi vavo, nende vandu vi shivala shienesho.

¹⁹ Valiitsa khukhukwana; navutswa shivaliitsa khukhukuura tawe; shichila ndi nivi khukhuhonyinya. Inzi Mwami Nyasaye mali khuvoola.”