2 TIMOTEO 1 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Ninzi Paulu, murumwa wa Yesu Kristo khuvirila khu lienya lia Nyasaye, warumwa khwilwatsa makhuva khulondokhana khu vulamu vwalaakwa, vwa khuli navwo mu Yesu Kristo --

² mbandichilanga Timoteo, uli khuli mwana wanje wa nayaanza. Nyasaye, uli Tata nende Mwami weru Yesu Kristo, vakhuvele tsimbavasi, vakhulolele tsimbavasi, khandi vakhuhe milembe.

Lisanditswa nende Litinyilitswa

³ Sanditsanga Nyasaye, wa ndumishilanga ni tsinganakani tsianje tsiu mukari tsindahi, khuli vakuuka vaanje vakholanga. Musanditsanga mbasu nu vutukhu lwa khwitsushitsanga shia khase khosi mu lisaala lianje.

⁴ Lwa nzitsushitsakhu khuli wali nu wavelela, nzikombanga mbasu nu vutukhu khuli nyala khukhulolakhu, khu mbe nu vuyaanzi vunyishi.

⁵ Nzitsushitsanga likhuva khulondokhana khu lisuuvila liolio liatoto, lisuuvila lilala liele, khuli lia koko wowo Loisi nende mama wowo Yunisi vavetsanga nalio. Ndi ni lisuuvila, nalio khandi lisuuvila liushitsilililanga khuva nalio.

⁶ Yaka nako kachilanga nikhwitsushitsa, khulu khwenya uvuli khukoritsa shihanwa shia Nyasaye yakhuha, lwa navikha makhono kaanje khu yivi.

⁷ Roho, wa Nyasaye yakhuha, shianyala khukhulomba khuria tawe; navutswa Roho wewe achilanga khuva ni tsingulu tsinyishi, vuyaanzi, khandi khwilinda munjila indahi.

⁸ Khulwa yako, lekha khulolakhu tsisoni, lwa uhaananga vushiahidi khulondokhana khu Mwami weru; inoho khulola tsisoni, shichila inzi, wavohwa mucheela shichila Kristo. Nikhali, unyakhane ninzi shichila Ivanjeli, Nyasaye nashikhuha tsingulu tsiu khukhola ndio.

⁹ Nyasaye yakhuhonyinya khutsi, manakhulaanga mwene khuve vandu veve; shikanyala khuva khulondokhana khu vikholwa, via khwali nu khukholi tawe, navutswa khulondokhana khu lienya lielie nende tsimbavasi. Nyasaye yakhulolela tsimbavasi tsienetso khuvirila mu Yesu Kristo, khali vindu nivishili khuraanga khuvaho;

¹⁰ navutswa nunundi khwamanyinywa, lwa Muhonyinyi weru Yesu Kristo yalolekha. Wamala khutivitsa likhutsa, khandi khuvirila mu Ivanjeli, wamala khulera mu vulavu vulamu vuliitsa khutsililila khuvaho.

¹¹ Nyasaye yandovola khuva murumwa, khandi mwechitsi khwilwatsa Ivanjeli;

¹² khandi nako kachilanga ninyakhana, shichila vindu vienevo. Navutswa shitsilililanga khuva ni ikholo indinyu, shichila namanya woyo wa nasuuvila; khandi namanya vulahi vwene ndi anyala khulinda vulahi yeshio shia yambishila khutukha Khulitukhu lienelo.

¹³ Haanda ni tsingulu tsiosi khu katoto ka na khwechitsa, khuli shimanyilu shilahi shiu khulonda; ma utsililile khumenya khulondokhana khu lisuuvila nende vuyaanzi, vwa khuli navwo mu Yesu Kristo.

¹⁴ Utsililile khulinda munjila indahi vindu vilahi, via waheelwa khuvirila mu tsingulu tsia Roho Mutakatifu, uli mwoyo mu khutsi.

¹⁵ Wamanya ndi vandu voosi vamenyanga mu lusomo lwa Asia, khali Fikelo nende Herimokenisi vanzilukha.

¹⁶ Mwami avele tsimbavasi vandu vi inzu ya Onesifora, shichila vandinyilitsa hali khanyishi mwoyo. Shiyalikhu ni tsisoni, lwa nali navohwa mucheela tawe;

¹⁷ navutswa lwa yali niyakhatukha mu litaala lia Roma, yaraanga khukhava ni tsingulu, khandi nanyola.

¹⁸ Mwami aliitsa khumuvela tsimbavasi Khulitukhu lienelo! Wamanya vulahi vwene khuli yakhonya mu vunyishi mu litaala lia Efeso.