Zakaliya 1 - Libuka Lya Kuyela

Nyambi ya Ngula ukwihana bantu bendi ngayi baboke kukwendi

¹ Mu ngonda ya mutanu na zihatu mu mwaka wawubili wakulela kwa mwene Ndaliyashi, lizu lya Nyambi ya Ngula lyezile kuli muluwe Zakaliya mwana Mbelekiya, muzukulya Indo.

² Nyambi ya Ngula watongwezele Zakaliya kwamba ku bantu ngayi, “Ami Nyambi ya Ngula napilaminine batatizenu,

³ nohobene amba kukwabo ngayi, eshe nisho anamba Nyambi wa Makunge ngayi, bokenu kukwami, pe nami nikaboka kukwenu. Nisho anamba Nyambi wa Makunge.

⁴ Hinga mufweka ngonehe batatizenu, obo bamiluwe bakutatika babilikizile kukwabo. Nyambi wa Makunge unamba ngayi, ‘Fumenu ku biheka byenu byabibi naku ntendelo yenu yayibi.’ Ngoboni kaliha banyuvwile hinge kulama obyo nabatongwezele. Eshe nisho anamba Nyambi ya Ngula.

⁵ Haya batatizenu balikuti? Kami bamiluwe balikuti? Kati ba kuyoya mwaya myaka ndi?

⁶ Ngoboni mazu na ndayano zami natongwezele bakamilimo bami bamiluwe, kati zatendiwile ndi? Niho batengulukile pe bambile ngayi, ‘Obyo nimwabyo Nyambi wa Makunge afungile kutenda kukwetu ndaba ya biheka byetu, nisho atendakale kukwetu.’”

Shimono sha bambishi

⁷ Ha mutena wa 24 ku ngonda ya wulikumi na yimo niyo yenga ngonda ya Shebati, mu mwaka wa wubili wa mwene Ndaliyashi, lizu lya Nyambi ya Ngula lyezile kuli muluwe Zakaliya, mwana Mbelekiya, muzukulya Indo, lyambile ngayi,

⁸ “Nekala na mulo, wushiku namono mulume hinga akandama ha mbishi ya kufubila! Hinga emana mu mibombola ya mitondo mu mukulo, kami kunyima yendi kwekalile bambishi ba kufubila na ba kufumbuluka na ba kutuba.

⁹ Niho nepwile ngayi, kati bishini ebye hekulu? Lingeloyi olyo lyambilenga na nami lya kumbwile ngayi, ‘Nikuku monesha ebye byuma.’

¹⁰ Niho muntu uyo wemaninenga mu mitondo akumbwile ngayi, ‘Aba nibo banatumiwi kuli Nyambi ya Ngula kwiza na kwendangana hano hanci.’

¹¹ Bakumbwile lingeloyi lya Nyambi ya Ngula, liya lyemanine mukati ka mitondo ya mayiliti ngayi, ‘Tunazinguluku hanci nimwaho, pe tunawana ngayi, mukaye nimwamo munalikalili tuhu nahiya na ku mwena.’

¹² Niho lingeloyi lya Nyambi ya Ngula lyambile ngayi, ‘Obe Nyambi wa Makunge, shikati sha kukuma hati ukabula kwikala na nceshe ha Yelushalema na minzi ya Yunda, eye unapilamini mu myaka 70?’

¹³ “Nyambi ya Ngula niho ambile shiwahe na mazu a nceshe na akubengezeka ku lingeloyi ou nambilenga nendi.

¹⁴ Niho ou lingeloyi nambilenga nendi, ambile ngayi, ‘Bilika elye lizu ngayi, eshe nisho akwamba Nyambi wa Makunge, nekala na lihungu shikuma ha Yelushalema na Ziyoni.

¹⁵ Haya napilaminakale matunga awa akuliyuvwa kwikala mu ku mwena. Ndaba aha napilamine shashishe, ngoboni nibo banawezelele ku makando akuyandisha bantu bami.

¹⁶ Nohobene ebye nimwabyo anamba Nyambi wa Makunge ngayi, nikaboka ku Yelushalema na nceshe, nimo mukazikiwila litala lyami na shipimisho shikezekiwa ha Yelushalema.

¹⁷ Bilika elye lizu kami ngayi, eshe nisho akwamba Nyambi wa Makunge ngayi, minzi yami yikatangama kami, pe Nyambi ya Ngula, ukabengezeka Ziyoni na kuhata kami Yelushalema.’ ”

Shimono sha Mashengo

¹⁸ Nayimbwile meho wami pe namonene mashengo anaa.

¹⁹ Niho nepwile lingeloyi ou nambilenga nendi ngayi, “Kati bishini ebye?” Wankumbwile ngayi, “Awa niwo mashengo apanzanishile Yunda na Ishalela na Yelushalema.”

²⁰ Nyambi ya Ngula wamoneshele bamfuzi banaa.

²¹ Nepwile ngayi, “Aba banezi na kutenda Byumangani?” Wankumbwile ngayi, “Awa niwo mashengo apanzanishile Yunda, ngayi mwanga kubule wakupindula mutwe wendi, ngoboni aba bamfuzi, banezi na ku batinisha na kuyumbila hanci mashengo a bakamatunga, aba bakatwile mashengo wabo na kulwisha litunga lya Yunda na ku bapanzanisha.”