Lwimbo 1 - Libuka Lya Kuyela

¹ Lwimbo lwa Sholomoni, lwimbo lwa lu wahe shikuma lukupitakana nyimbo nimwazo.

Lwimbo lwa kutatika Mbuyama

² Nzupeze, nzupeze na kanwa kobe, ndaba ku haka kwobe kwakuwahe shikuma kupitakana waine.

³ Mazi wobe akuwaba akunuka livumba lyaliwahe shikuma, lizina lyobe linengi ngonehe mazi akunuka livumba lyaliwahe, nibyo ba kuhakila bambuyama.

⁴ Ntulumune, tunyankupe na wanguwangu yinga hekulyami, nyingize mu kampenci kobe. Tuwahilile na kutangala hamo, tuyemeze ku haka kwobe kupitakana waine. Kufwako kukomokesha oho bambuyama nimwabo ba ku haka.

Mbuyama

⁵ Enu bambuyama ba mu Yelushalema, hinge ndi ami nili wakushipa, ngoboni nili wamuwahe, wakushipa ngonehe Ntanda ya mu libelelengwa lya Kenda, ngonehe makwiza amu wumbo a Sholomoni.

⁶ Hinga mukomoka oho nenga wakushipa, ndaba mutena niwo washipisha shikonde shami, bawushinda wami bampilaminine, pe bantendeshele milimo mu mfuba ya mikolobozi ya mikabo ya shinyanca. Kami kaliha nekalile na shikati sha kuliwahisha amimwine.

⁷ Ntongweze obe moyo wami wahaka, oku wabuyishilanga bambelele bobe, oku za kwangulukilanga shikati sha mwana, haya shumangani nikuzembokela ku kushingashinga hakati ka matanga a balishani bamina?

Mulume

⁸ Obe uli wamuwahe shikuma hakati ka bambuyama nimwabo, ndi wufwako kulimuka kuyo, konkezeka zintambo za bambelele. Pe lishilako bana ba bampongo bobe kwakwipi na zintanda za balishani.

⁹ Obe mukakuhakiwa wami, ukuluwanganisha bihanganiko bya balume, unaliyenge shiwahe ngonehe bambishi bali ku koloyi ya Fwalo.

¹⁰ Huki zobe zinengi zaziwahe, zina zebuku kukuma naku matanta, zina zebukili na mu ncingo ngonehe mukali wa mamanya a ndando yayinene.

¹¹ Ngoboni tukakutendela muhanga wa ngolinde, uli na bya kuyenga bya shiliva.

Mbuyama

¹² Oho mwene wekalile kutebulu, mazi na wabile atutwishile livumba lyaliwahe.

¹³ Mukakuhakiwa wami, kukwami nafweke ngonehe kalifundwa ka mazi a miila, aka kalangananga mukati ka mabele wami.

¹⁴ Mukakuhakiwa wami, kukwami nafweke ngonehe a mahozozo a maluba, amu mfuba ya mikolobozi ya mikabo ya shinyanca bya mu Engendi.

Mulume

¹⁵ Mona, uli wamuwahe wakuhakiwa wami, mona uli wamuwahe shikuma, meho wobe ngonehe matela.

Mbuyama

¹⁶ Mona, uli wamuwahe wakuhakiwa wami, mwa shikuma uli wamuwahe, wulili wetu wukenga mwila wakulembuka.

¹⁷ Mikambo ya litala lyetu yikenga ya mitondo ya shinda, pe mashoko etu, akenga a mitondo ya Paini.