Amoshi 1 - Libuka Lya Kuyela

¹ Awa niwo mazu a Amoshi ou wengile umo wa balishani ba ku Tekoya. Awa atontwelele ha Ishalela ha shikati shiyo oho Uziya engile mwene wa Yunda na Yelombowami mwana Yowashi, engile mwene wa Ishalela. Ebye byamonekele munyima ya myaka yibili oho shilolo kwikale kukanka kwa kaye.

² Pe wambile ngayi, “Nyambi ya Ngula ukabulumina mu Ziyoni, kami ukakangokela lizu lyendi mu Yelushalema, pe mwila wamu mabuyishilo nimwawo ukulebuka, na mwila waha lipili lya Kamela ukayuma.”

Nyambi ukushushula matunga ali kundika na Ishalela Shiliya

³ Eshe nisho akwamba Nyambi ya Ngula ngayi, “Ndaba bantu bamu Ndamashika, banatende wubi wawingi shikuma, mwa shikuma nikubashushula. Ndaba baka bapumpula Bakangiliyande, ngonehe muntu ukupumpula loto na bipumpwisho bya byondo.

⁴ Nikayumbila mundilo ha lukena lwa Hazayelu, pe ukahokesha bipata bya mwene Mbeni Handandi.

⁵ Nikamungula tupatisho twa Ndamashika na kunongesha baya bekala mu mukulo wa Aveni na kalela wa Mbeti Endeni. Pe bantu ba ku Shiliya bakatwaliwa mu wuntapwa ku Kila.” Eshe nisho akwamba Nyambi ya Ngula.

Fwilishitina

⁶ Eshe nisho akwamba Nyambi ya Ngula ngayi, “Ndaba bantu ba Ngaza banatende wubi wawingi shikuma, pe nikubashushula, ndaba batwalile Baishalela mu wuntapwa na kuka balandisha ku Endoma.

⁷ Nikatuma mundilo ha kembi ka Ngaza, pe ukahokesha bipata byawo.

⁸ Nikanongesha baya bekala mu Ashindondi na uya unakwata muwana wa wene, mu Ashikeloni. Nikashushula bali mu Ekiloni nakuziha Bafwilishitina nimwabo.” Eshe nisho anamba Nyambi ya Ngula.

Tile

⁹ Eshe nisho akwamba Nyambi ya Ngula ngayi, “Ndaba bantu bamu Tile banatende wubi wawingi shikuma, mwa shikuma nikubashushula, ndaba batwalile bantu nimwabo mu wuntapwa ku Endoma. Kaliha banukile wuhoni uya balimamine nabo wa wushinda na Ishalela.

¹⁰ Nikatuma mundilo ha kembi ka Tile, pe ukahokesha bipata byawo.”

Endoma

¹¹ Eshe nisho akwamba Nyambi ya Ngula ngayi, “Ndaba bantu bamu Endoma banatende wubi wawingi shikuma, mwa shikuma nikubashushula, ndaba walwishile kawushinda wendi na mukwale na kubula nceshe, kaliha wekalile na shikeketima, pe wekalile na wukali shikati nimwasho.

¹² Haya nikatuma mundilo mu litunga lya Temani, owo ukahokesha bipata bya Mbozila.”

Amoni

¹³ Eshe nisho akwamba Nyambi ya Ngula ngayi, “Bantu ba Amoni banatende wubi wawingi shikuma, mwa shikuma nikubashushula, ndaba yakuloshola bana mu mavumo a bambuyama ba mu Ngiliyande ngayi baneneheshe litunga lyabo.

¹⁴ Haya nikabangiza mundilo ha twimbi twa munzi wa Lamba, pe ukahokesha bipata byawo. Kukekala miteto ha mutena uyo wa nzita ngonehe nkuli yayinene.

¹⁵ Pe mwene yabo hamo na babilolo bendi bakaya mu wuntapwa.” Eshe nisho akwamba Nyambi ya Ngula.