Mateus 4 - Niu Testament 1956 (Manus PNG)

Satan i seslaini Jesu.

¹ Boen Meluan ad Jehova i dulieni Jesu le marboga. Satan i me beg seslaini i.

² Gan ad Jesu bui, i gin bandri mahangul, malabo i mundrul.

³ Satan i la born ndro Jesu, i vong, i boi: Be uo ndur Jehova, hian uo vong gle bad ogo, i gbelueni gle suslong adem.

⁴ Jesu i bode: I da le Buk Helian nongen ogoro: Hom ndramed i de horuan ge gle gan bui, gle nongen ad Jehova hendre e hendre bohon ad Jehova gin bai:

⁵ Boen Satan i dulieni Jesu le gor Jerusalem, sor gina le balndo um ad Jehova.

⁶ I vong le ndro Jesu, i boi: Be uo Ndur Jehova, gohis gle boan, nongen i da Buk Helian ogoro: I beg rendegien su Angelo aden, su ha huri uo le nemesu, su gobgulue uo, degem i de bud de la bad bui.

⁷ Jesu i bode: Nongen i da Buk Helian lie, i vong, a bai: Mbue seslaini Jehova, i Ndorlaben adem.

⁸ Malabo Satan i dulieni Jesu, sor gobad ndre bahali manden. I bosilieni gor masi e memrad masi ber boan.

⁹ I vong le ndro i, i boi Longu ogo masigane gle ndro uo, be uo godurhu ngondernegem, be uo lodu me ndro io.

¹⁰ Jesu i bode: Alndi Satan, nongen helian i da le Buk ogoro: Gob lodu le ndro Jehova ge, i Ndorlaben adem, gob mburer aden ge.

¹¹ Malabo Satan i bieni Jesu i gineao. Su Angelo ber lang su meher, su sobani Jesu.

Jesu i da le gor Kapernaum.

¹² Be Jesu gin hirong, su gin daui Johanes le kalabus, i bieni gor asu Judea, i irgai le gor Galilea.

¹³ I gina le gor Nasaret hanu, boen i dogi le gor Kapernaum. Aga gor aden, Kapernaum i da baghege le leng, le gor asu Navtali e Sebulon,

¹⁴ dege nongen ad Proved Jesaia i boi:

¹⁵ Gor Sebulon ma gor Navtali i da baghege le leng, i da le horo le ndran Jordan, aga Galilea asu Haiden.

¹⁶ Su masi su da lug im ndrogum, su gin ilndri sul manden, su da lug im gor asu, su da gin mad, mandri ad Jehova i gobad le ndro su.

¹⁷ Jesu i boharni nongen ber lang le ndro su, i vong i boi: Garbelueni bern ademu, gor lundielang i mehere, i da baghege malabo.

Jesu i Ioh su lao aden.

¹⁸ Bersi Jesu irgai le leng ber ndran Galilea. I ilndri sor marmou, Simon, ngarn Petrus lie, ma bison Andreas. Sor gin bieni gahu le ndran, beg hur ni. Sor marmou, sor ndremda ni.

¹⁹ Jesu i boi le ndro sor: Mor gam ndro io, mo dondrbo. Io lengi, mor hur ndramed le gor lundielang.

²⁰ Sor bienii gahu asor, sor la ndro Jesu, sor dondrbon.

²¹ Heb eluen bui muren, i ilndri sor marmou lie, Jakobus, ndur Sebedeus, ma bison Johanes sor do da sasngeni gahu le lundienlol, ma damsor lie. Jesu i loh sor.

²² Sor bieni gahu, ma ndol, e damsor, sor dondrbon Jesu.

Jesu i sobani su ndramed.

²³ Jesu irgai le gor masi ber Galilea. I la numohernou asu, i henunuen su le nongen hian ber lang, i regurdueni su masi, su da med, mandrsu momen, su horuan lie.

²⁴ Ngarnongen ogo i hilou le gor masi ber Sirien, su hur su ndramed, su sik, su ndramed masi, ngongong i da ndrnesu, su ndramed degesu bui, i regurdueni su masigane.

²⁵ Su ndramed mabosanged su dondrbon Jesu, su ber Galilea, su ber gor masongul, su ber Jerusalem, su ber Judea su ber gor i da le horo le ndran Jordan.