Mateus 27 - Niu Testament 1956 (Manus PNG)

Jesu i la ndro Pilatus.

¹ Mabing, su ndurhian, ma su labenen ber gor, su gin vong le goure, beg dieni Jesu na gmed.

² Su lao asu, su hosi Jesu, su dulieni i le ndro ndorlaben Pontius Pilatus.

³ Ar Judas, i da gin hevani Jesu, gin ilndri, su gin dieni Jesu na gmed, ndrnen, i irgu le longu aden momen i da gin hineni, i hedi moni madilingul le ndro su ndurhian, ma le ndro su labenen ber gor i hengen i mul le ndro su.

⁴ I vong, i bai: Io gin hevani Jesu, io gin daui ndrai helian rosan le nemu, aga momen ge.

⁵ Su vong su bai: Aga mburer adem ge, ghinen i, dege uo lengi. I bieni moni aden le lundieum ad Jehova, boen i gina i sindrdi golen.

⁶ Su ndurhian, su hedi moni ad Judas, su boi: Dandu daui moni ogo le ndro Jehova bui, aga moni le ndrai ad homo.

⁷ Su gin vong le goure, su beg semani beleng asu ndremdalus gle numenmad le ndro su ber manan, ar homo de homo na gmed le gor Jerusalem.

⁸ Su da bosoui numenmad ogo, beleng ber ndrai, eruar lie.

⁹ Dege Provet Jeremia i gin bai: Su gin hedi moni madilingul, aga i vonei moni gle beleng asu, dege su Israel su gin bai,

¹⁰ su semani beleng asu ndremda lus, dege Jehova i gin bai le ndro su.

¹¹ Su gin dulieni Jesu le ndro ndorlaben. I ndemani Jesu i bai: Uo King asu Juda? Jesu i bode: Io ie.

¹² Su ndurhian, ma su labenen su lug bohosu, su bo gord le ndro i. Jesu i de vong heb de la ndro su bui.

¹³ Pilatus i ndemani i: Uo de hirong bui, su da bo gord le ndro uo dagara?

¹⁴ Jesu de vong heb de la ndro Pilatus bui, ndorlaben, meluan i ieb leri.

¹⁵ Uru si, su hur gous asu manden, ndorlaben i rumburdi homo ir kalabus, dege voasuiso ad homo.

¹⁶ Malabo homo ir kalabus, ngarn Barabas, hom ndramed momen ge.

¹⁷ Be su da me goure, Pilatus i vong le ndro su: Io rumburdi sie le ndro mu, Barabas, de Jesu, su da bosoui ngarn Kristo.

¹⁸ I danen i, ndrnen asu ndurhian i irgu le mburer aden mandromai, mburer ad hom ndorlaben.

¹⁹ Pilatus im logna aden, le logna gord nambulen rendegien homo le ndro i, i bai: Mbue de gob momen le ndro ndramed ogo i homo hian, monen ge, io gin inhini lobing ogo mabosanged gle aden.

²⁰ Su ndurhian, ma su labenen, su ndouo le nongen le ndro su ndramed masi, su gbode ie, su ha lengi Barabas, i gdieni Jesu na gmed.

²¹ Malabo ndorlaben i ndemani su: Ie lengi sie io grumburdi ie? Su bode: Barabas.

²² Pilatus i ndemani su lie: Io gob sa le ndro Jesu, su bosoui ngarn Kristo? Su masi su bode: E dadhe i gle beldigei.

²³ Ndorlaben i bode: Sehe longu i da gin hinen i momen ge? Su lug bohosu manden, su loholo, su bai: Ar dehe gle beldigei.

²⁴ Pilatus i ilndri, i de ndoun de la ndro su bui, su da lug bohosu mandromai, i vong le ndro su, su hedi lus le ndro i, i surhi nemen gle ndran le bormarsu masi, i vong le ndro su, i bai: Mburer ordo bui, be io gdieni ndramed ogo na gmed, ghinen i dege mu lengi.

²⁵ Su ndramed masigane su vong su bai: Ndrai aden na gmeher ndro du, le ndro su ndurdu ge.

²⁶ Boen Pilatus i rumburdi Barabas, i daui Jesu le nemesu polisboi, su rii i, su dadhe i le gei.

Su polisboi bo momen le ndro Jesu.

²⁷ Boen su polisboi ad ndorlaben, su gin dulieni Jesu le lundieum su la goure, Jesu i da dogrosu.

^28-29 Boen su hedi salo aden giao, su daui salo ramen, eluen ge. Boen su hedi borndrui, su deien Jesu le balen, su daui ndes le nemen sengen, boen su godurhu ngondrnegesu, su boii i, su hal le aden, su vong, su boi: Iou bamugueni uo, King asu Juda.

³⁰ Boen su rogumbunhi i, su hedi ndes aden su ri borbalen.

³¹ Be su gin bo momen le ndro i dagara, su hedi salo ramen gineao, su dou salo aden gle mandrn lie, boen su hedi i, dulieni i le logna be su beg dadhe i.

Su dadhe Jesu le gei.

³² Su da le sal, hom ndramed ber Kirene, ngarn Simon i sohal sal le ndro su su boro i, su ndoun le ndro i, i sab gei ad Jesu.

³³ Su gin me ndre bahali Golgada, i vonei: longna bobalen le nongen asu.

³⁴ Su hengen ndrunvain le ndro i, su daui nosun leri, i hengen le ndro i, i gilmui. Jesu i ni hebe, i mbueren.

³⁵ Boen su dadhe Jesu le gei, su hedi salo aden, homo i hedi hasel, homo i hedi hasel.

³⁶ Boen su lugdo im boan, su bogulue Jesu.

³⁷ Su gin daui nongen le gei mburbalen, i da bosoui longu aden, i da gin hinen i. Nongen ogo dogoro: Aga Jesu, King asu Juda.

³⁸ Boen su dadhe sor daiandramed, homo le nemen sengen ad Jesu, homo le nemen gameao aden.

³⁹ Su da gin irgai bage, su boii i, su mounuei borbalsu.

⁴⁰ Su vong, su bai: Uo beg ndumbue um ad Jehova, uo beg mengseni lie, le bing madolo muren, be uo ndoa dagara, osbani uo. Be uo ndur Jehova, bieni gei, am boan.

⁴¹ Su ndurhian, ma su ndremda hernou, dagara su labenen ber gor, su boii Jesu lie, su boi:

⁴² I gin sobani su masi, de danen sobani i bui. I King asu Israel, i gbieni gei, i me boan, boen iou lao aden lie.

⁴³ I gin belengeni Jehova, i grumburdi i malabo, be i lengi. I gin bai: Io ndur Jehova.

⁴⁴ Sor daiandramed sor boii Jesu lie.

⁴⁵ I mesar, gor masi ndrogum sumburdi, i roh ibia.

⁴⁶ Ibia Jesu i loholo, i bodeie: Eli, Eli, Lama Sabagdani, i vonei: Ndorlaben ordo, Ndorlaben ordo, desa uo gin bieni io ie?

⁴⁷ Su holel, be su gin hirong nongen aden, su bai: I loh Elia.

⁴⁸ Boen homo i hilou, i hedi bermanda, ilgi i le ndrunvain, i daui i le ndes, i hengen Jesu.

⁴⁹ Su holel su vong, su bai: Malabo iou beg ilndri, Elias na gmeher ndangen, beg rumburdi i, de bui

⁵⁰ Jesu i loholo bersilie ndoundoun, boen meluan i bieni mandrn.

⁵¹ Malabo salo eluen i da le Lundieum Helian i mbuser lege marnder, ber belengan me boan.

⁵² Boan i nunueie, bad i ndumbue, ngai i ndeh, numbuesu ndramed, asu lao ad Jehova hohunan, gin ndne le lundiengad.

⁵³ Su gina su mbsig le ndro su ndramed ber gor Jerusalem.

⁵⁴ Polismaster, ma su lao aden, su da gin bogulue Jesu, be su gin ilndri, boan i nunueie, i rerr, noh asu dsoln, su vong: I ogo i Ndur Jehova ndangen.

⁵⁵ Su bihin mabosanged, su da manan hebe, su lele longu masi ogo, su ogo, su bihilou ad Jesu, su ndrbon Jesu, su gin bo mburer le gan anen.

⁵⁶ Homo asu, Maria Magdalena, e Maria, nanen ad Jakobus sor Jose, dagara nanen le ndursor Sebedeus.

Su doni Jesu le ngad.

⁵⁷ Mernal beg lol, hom labenen gin me, homo ber Arimatia, ngarn Josev, memrad aden dsoln, i hom lao ad Jesu lie.

⁵⁸ I iao le ndro Pilatus, i ndemani i le numbuen Jesu. Pilatus i bai le ndro polismaster, i ghengen i le ndro i.

⁵⁹ Josev i hedi numbuen Jesu, i nhui i le salo beren rosan ge,

⁶⁰ boen i daui i le ngaibad houen. Aga ngaibad aden, su gin mengseni le ndro i le bad mandromai. Be su gin doni Jesu le ngad, su daui bad manden le marbohonngai, boen su gina.

⁶¹ Maria Magdalena, ma hom Maria lie, sor baghege le ngaibad.

⁶² Bing si aga sabbath asu Juda, su ndurhian ma su Pharisi su la ndro Pilatus,

⁶³ su vong le ndro i, su bai: Ndorlaben, iou hanguruen i malabo ndramed ogo momen, be i da mamaren le boan, i gin vong: Io gedne lie le bing madolo muren.

⁶⁴ Hian, orgulue ngaibad le bing madolo, debosan su lao aden su gme, su behena numbuen. Boen su vong le ndro su ndramed: I gin ndne lie le ngad aden. Muren bahilou aden i hinen su ndramed gina momen ge.

⁶⁵ Pilatus i bode, hedi polisboi ogo, gobgulue ngaibad hian ge.

⁶⁶ Su gina, su hosi ngaibad ndoundoun, muren su daui polisboi baghege le ngaibad, su gobgulue i hian ge.