Mateus 23 - Niu Testament 1956 (Manus PNG)

Jesu i boii su ndremda hernou ma su Pharisi.

¹ Jesu i vong le ndro su ndramed masi, ma le ndro su lao aden nongen ogo:

² Su Pharisi, ma su ndremda hernou su lugdo im logna ad Mose.

³ Longu masi su vong le ndro mu, mu ghinen i, delengamu le nongen asu. Mbue hinen mburer asu. Su da bosoui, mu ghinen i, su ge, su de hinen i bui.

⁴ Su daui gundun beruan le hauesu ndramed, su ge, su de boro i gle gobdegesu gairi bugane.

⁵ Longu masi su da hinen i, su lengi su ndramed ilndri i: Su da daui salo le lodu eluen ge.

⁶ Voasuiso logna hian ge le gous asu, le numo hernou asu.

⁷ Su ha lengi su ndramed masi, su gabmugueni su le logna bah, su ie lengi, su ndramed, su bosoui su ndorlaben.

⁸ Mu dagara bui, mbue homo i bosoui mu Ndorlaben. Homo ge, i ge, i Ndorlaben ademu, mu masi mu ndern ge.

⁹ Mbue homo i bosoui homo ber boan Bo Domo. Homo ge i Damu, i da le gor lundielang.

¹⁰ Mbue homo i bosoui mu ndremda hernou, homo ge I henunuen mu, aga Kristo.

¹¹ Homo manden le dogromu, i gob mburer ad hom lao dandendegei le ndro mu.

¹² Be homo i hanguruen manden gle aden, io ndounen i. Be homo i da bo mburer ad hom lao dandendegei io ghinen i le hom labenen.

¹³ Mu Pharisi, mu ndremda hernou, mu gina momen ge. Mu vadi babi ber gor lundielang, debosan homo ir dogi ri, mu danmu dogi le gor lundielang bui, mbueremu, hom i dogi ri.

¹⁴ Mu Pharisi, mu ndremda hernou, mu gina momen ge, mu behena um asu bihinao, muren mu bahilou le lodu ademu eluen. Gord manden ge ir belegen mu.

¹⁵ Mu Pharisi, mu ndremda hernou, mu gina momen ge. Mu dogi le gor manan manan, beg rui homo ge le lodu admu. Be i gin belueni bern aden, i homo asu Juda malabo, mu hinen i gina momen ge, i dege ndur Satan, i gina momen gane, hanu le ademu.

¹⁶ Mu gina momen ge, mu da beg dulieni su ndramed, begmarmu bui. Mu bai: Be homo i daui nemen le belengan, i vong i bai: Ndangen um ad Jehova: Aga nongen molhege. Ar homo i bai: Ndangen moni ber um ad Jehova, nongen ogo i ghinen i.

¹⁷ Mu ndramed momen ge, hanguruen ademu momen gane, begmarmu bui, sehe longu i hian hanu: Moni i da um ad Jehova, de um ad Jehova?

¹⁸ Mu bai lie, be homo i daui nemen le belengan, i bai: Ndangen logna dirho ad Jehova, aga nongen molhege. Be homo i bai: Ndangen le longu, le gan i da ndre logna dirhor, nongen aden i vonei, i ghinen i dege i gin bai.

¹⁹ Begmarmu bui, sehe longu i hian hanu: Logna dirhor ad Jehova, de longu ber dirhor? Logna dirhor, i ge, i hinen longu le dirhor helian ge?

²⁰ Be homo i da bosoui: Ndangen logna dirhor, i da bosoui nongen ogo le longu masi i da ndre logna dirhor lie.

²¹ Be homo i da bai: Ndangen um ad Jehova, i da bosoui nongen ogo le ndro i, logna aden i da lundieum.

^22-23 Be homo i da daui nemen le belengan, i daui nemen le ndro Jehova logna aden i da gor lundielang. Mu Pharisi, mu ndremda hernou, mu gina momen ge. Mu hengen le ndro Jehova heb le gan anmu, heb le memrad ademu, mu de hanguruen nongen ad Jehova bugane, mu de gob gord monen bui, mu de ibdi gahaloseli de la ndro su bugane. Ghinen longu hendre ogoro, mbue golmu i ndud longu hendre ogoro lie.

²⁴ Mu beg dulieni su ndramed, begmarmu bui mu da gbieni giao legmad i da gin los le gan anmu, mu de ilndri mui bui i da gin los le ndrelgei mu gieni.

²⁵ Mu Pharisi, mu ndremda hernou, mu momen ge. Mu surhi lus e bondran gle rosan lundielus, e lundiebondran i segdan, momen ge le gan anmu, mu da gin behena.

²⁶ Mu Pharisi, begmarm bui, e bieni longu masi i da le lundielus, muren surhi i gle rosan, boen i rosan gane.

²⁷ Mu Pharisi, mu ndremda hernou, mu gina momen ge. Mu da gobgulue ngai asu ndramed, mu daui nonou gleri, lundiengad gina momen ge, i borah, ndrun asu ndramed i dari.

²⁸ Mu dagara lie mandrmu i horuan ge, bergolmu gina momen gane, bahilou ge, hangaini nongen ad Jehova ge.

²⁹ Mu Pharisi, mu ndremda hernou, mu gina momen ge, mu da mengseni um ndre ngai asu Provet, mu nouni ngai asu lao ad Jehova.

³⁰ Mu vong, mu bai: Be iou da le boan goru le rang asu damdu ber mahanu, iou de rii su Provet, dege su gin hinen i bugane.

³¹ Nongen ademu derbe, de danmu bui, mu ndursu daian ndramed, su da gin rii su Provet?

³² Longu momen ademu gle longu momen asu, i hinen lus beb le longu momen.

³³ Mu moad, mu ndurmoad, mu beg vob le gord ad Jehova derbe?

³⁴ E lele, io rendegien su Provet, su ndremda hernou le ndro mu. Mu gdaii su holel, mu dadhe su le gei, mu rii su holel le numo hernou ademu, mu hingismad su le gor hoger e hoger.

³⁵ Ndrai asu rosan monen ge, mu da gin harengi le boan, i reng le ndro Jehova, i gob gord le ndro mu. Ndrai ad Abel, i da monen ge mabenan ndrai ad Sagarias, ndur Bergia, mu da gin daii le um ad Jehova, baghege le logna dirhor aden.

³⁶ Ndangen io boi le ndro mu: Surian masi le longu ogo momen ir belengen mu.

³⁷ Jerusalem, Jerusalem, uo da daii su Provet, uo da bieni bad le ndro su, io da gin rendegien su. Mabersehe io gin loh su ndurm, su me goure bage ndro io, dege goho nanen i da gorni su ndurgoho aden le lomon aden. Mu mbueremu.

³⁸ Su gndumbue um ademu.

³⁹ Io vong le ndro mu: De danmu ilndri io bugane mabenan mu vong, mu loholo: Iou bamugueni i, i da meher le ngarn ad Ndorlaben.