Mateus 2 - Niu Testament 1956 (Manus PNG)

Su ndurhian ber east

¹ Be Jesu gin me boan le gor Betlehem, Herodes i King asu Juda. Su ndurhian ber east su gin me Jerusalem, su ndemani su, su boi:

² King houen asu Juda i da gin meher le boan, i da oho? Du gin ilndri biri aden, gelman aden ber lang gin meher ndro du, iou gin meher, beg ilndri i, beg bamugueni i.

³ King Herodes i hirong nongen asu, meluan i ieb leri, su masigane ber gor Jerusalem meluasu i ieb dagara lie.

⁴ Herodes i loh su ndremda hernou, su ndremda dirhor le ndro Jehova le goure, i ndemani su, Messias i gmehere oho?

^5-6 Su vong, su bode: Betlehem i da gor Judea, aga gor ad Messias, dege Provet Miga gin hondre: Uo Betlehem i da le gor Juda, gor mandehe, uo gor molhege le dogrosu gor masi ber Juda bugane. Ndorlaben i gmeher ndro uo, irgulue su Israel masi.

⁷ Boen Herodes i loh su ndurhian ber east i gorni nongen aden, i ndemani su, gehere biri i gin mbsig le ndro su.

⁸ Muren i rendegien su le gor Betlehem, i vong le ndro su, i boi: Mu gal gor Betlehem gahi mbunana ogo be mu gin danoni i, mu gabui me ndro io, io gu leri, io gabmugueni i lie,

⁹ Be su gin hirong nongen ad King, su la gor Betlehem. E lele, biri, su da gin lele hanu, su ilndri i malabo lie. I la sal asu le lang. Su la gor, biri i de dogi bui, i hengang ndre um, mbunana Jesu i dari.

¹⁰ Be su gin ilndri biri ogo, su mugmug manden.

¹¹ Su la lundieum, su lele mbunana i da le berlalen ad nanen Maria, su godurhu ngondrnegesu su bamugueni i, su hengen le ndro i, le memrad asu, moni, e longu ngohondonreen, aga gle gous asu.

¹² Lobing, Jehova, i meher ndro su le inhini asu, i vong le ndro su, mbue su gal ndro Herodes lie. Su la sal hasl la gor asu.

Josev i vob le gor Egipten

¹³ Be su gineao, hom Angelo ad Ndorlaben i la ndro Josev le nihini aden, i vong i boi: edne, hedi mbunana ma nanen la born ndro uo, ha vob le gor Egipten mu gal dari, io bo ndoun nongen le ndro uo lie. Herodes i gahi mbunana, i beg daii i.

¹⁴ Josev i dne, i hedi mbunana ma nanen lie, su vob lobing le gor Egipten.

¹⁵ I dandon gor mabenan Herodes i gin mad. Longu ogo masi gin meher, dege Jehova gin vong le bohon ad Provet, i da gin bai: Io gin loh nduro le gor Egipten.

Herodes i daii su mbunana ber gor Betlehem.

¹⁶ Herodes be i gin ilndri su ndurhian ber east su de gin meher ndro i bui ndrnen i mah manden, i rendegien su lao aden, su rii su ndurgamel masi ber gor Betlehem, su mbunana masi, uru asu si de maruo, dege su ndurhian ber east gin vong le ndro i, le rang, su gin lele biri le lang.

¹⁷ Aga longu, dege Provet Jeremia gin vong mahanu.

¹⁸ Iou da gin hirong le gor Rama, su da reng, su da dang manden. Rahel i da dang gle ndurn, homo i danen rederhi i bui. Ndurn asu masi su gin mad.

Josev i mul la gor Nasaret.

¹⁹ Herodes, be i gin mad, Angelo ad Ndorlaben i meher ndro Josev, i da le gor Egipten, i vong, i boi:

²⁰ Edne, hedi mbunana e nanen, naiu, gal gor Israel. Su gin mad su da beg daii mbunana.

²¹ Josev i dne, i hedi mbunana e nanen sor la born ndro i, su iou mul le gor asu Israel.

²² Be i gin hirong ndur Herodes Argelaus i King ber Juda, i noh, i dogi le gor Betlehem. Jehova i rendegien i le gor Galilea.

²³ I iao le gor Nasaret. Aga le hanguruen nongen ad Provet, i da gin hondre: Su absoui homo asu Nasaret.