Mateus 19 - Niu Testament 1956 (Manus PNG)

Heb nongen le bieni nambulen.

¹ Nongen ogo boen, Jesu i bieni Galilea, i dogi le gor asu Judea, i da le horo le ndran Jordan.

² Su ndramed mabosanged su la born ndro i, i rugurdueni su.

³ Su Pharisi su la ndro i, beg seslaini i. Su ndemani i, su boi: Hom gamel i danen bieni nambulen, be i lengi, de bui?

⁴ I bode: Mu de gin ilndri Buk Helian bui, Jehova i da gin mengseni sor marmou ge, hom gamel, hom bihin.

⁵ Boen i gin bai: Hom gamel i bieni damen sor nanen, ir ndrobon nambulen, sor marmou mandrsor bersi.

⁶ Malabo sor marmou bui, sor homo ge. Ar Jehova gin daui sor marmou, mbue bieni nambulen.

⁷ Su vong le ndro i, su bode: Desa Mose gin bai, hom gamel hengen peper le robulda le ndro bihin, boen i gbieni i.

⁸ Jesu i bode: Mose i danen bergolmu ndoun ndoun ge, le longu ogo i gin bai dagara, nandugian dagara bui.

⁹ Io vong le ndro mu: Be homo i bieni nambulen, be i de gin bo longu sungsou bui, muren i ibdi homo le nambulen lie, i ogo i bo longu sungsou. Be homo i ibdi hom bihin le nambulen, goru i gin bieni gamel aden, i hinen longu sungsou lie.

¹⁰ Boen su lao aden su vong le ndro i, su bai: Be nongen adem uo da gin bai le ndro su i monen, i hian ge, be homo de ibdi bihin homo le nambulen bugane. Jesu i bode.

¹¹ Su masi de dansu nongen ogo bui, su holel ge su dansu leri.

¹² Su holel dansu ibdi bihin le nambulen bugane, mandrsu momen gle mamamei, su holel de dansu ibdi bihin le nambulen bui, su ndramed gin sindrdi mandrsu gina momen. Su holel de dansu ibdi bihin le nambulen bui, su mburesu ibdi bihin homo le nambulen, su beg hanguruen longu ber lang ge. Ar homo i danen boro nongen ogo, i gboro i.

Jesu hengen su mbunana.

¹³ Boen su la bah, su mbunana asu le ndro i, ar i gi selbe su. Su lao ad Jesu, su bangondrngondr le asu.

¹⁴ Jesu i vong le ndro su: Hian su mbunana su gam ndro io, mbue mu ga sendraini su, gor lundielang i asu.

¹⁵ Boen i daui nemen le borbalsu, i bieni gor asu i gina.

Nongen Jesu le ndro hom ulhou.

¹⁶ Homo i la ndro i, i ndemani i: Ndorlaben, sehe longu hian io ghinen i, io la lundielang gleri?

¹⁷ Jesu i bode: Desa uo ndemani io le longu hian? Homo ge i hian. Be uo leng dogi le gor lundielang, ghinen nongen ad Jehova.

¹⁸ I bode: Sehe nongen? Jesu i boi: Nongen ogoro: Mbue rii homo, mbue sungsou, mbue behena, mbue ar gogobaini homo.

¹⁹ Or gulue dam, or gulue nanem, golmisden ndramed i da baghege ndro uo, dege uo voamiso mandrm.

²⁰ Ulhou ogo i bode: Nongen ogo io gin hinen i masi sumburdi. Sehe longu masou?

²¹ Jesu i bode: Be uo leng dogi le gor lundielang, al le gor adem, semani memrad adem masigane, ghengen moni le ndro su ndramed, heb memrad asu bui, muren memrad adem i da le gor lundielang. Boen uo gmul, uo ndrobo.

²² Ar ulhou gin hirong nongen ogo, ndrnen i gosusngo, i bieni Jesu, memrad aden mabosanged.

²³ Boen Jesu i vong le ndro su lao aden: Ndangen io boi le ndro mu, i beruan manden ge, ar labenen homo, memrad aden dsoln, la gor lundielang.

²⁴ Io boi le ndro mu bersilie: Hom ndramed la ngai nduboi hanu, le ndramed, memrad aden dsoln le gor lundielang.

²⁵ Su lao aden, be su gin hirong nongen ad Jesu, meluasu i ieb. Su vong, su bai: Sie i la lundielang ar i dagara?

²⁶ Jesu i lele su, i vong le ndro su: Su ndramed de dansu i bui, Jehova ge, i ndoa le longu masigane.

Heb nongen le surian le gor lundielang.

²⁷ Boen Petrus i vong le ndro Jesu, i bai: E. lele, iou gin bieni longu adu masigane iou ndrobom, sehe surian ir belengen du?

²⁸ Jesu i bode: Ndangen io boi le ndro mu: Mu da ndrobo, mu lugdo im logna masongul e ruo, logna asu ndurhian ber Israel, mu gob gord le ndro su gor Israel masi, le rang, be ndurndramed i lugdo im logna le engerang aden, le gor lundielang.

²⁹ Ar homo ir ndrbo, i gbieni ndern e bison; damen, e nanen, de ndurn, beleng e um aden, io surien i mabersanged, io hengen le ndro i gor lundielang lie.

³⁰ Su mabosanged su hanu, su la muren. Su da muren su me hanu.