Mateus 18 - Niu Testament 1956 (Manus PNG)

Nongen Jesu le ndro su lao aden.

¹ Boen su lao aden su la ndro Jesu, su ndemani i: Sie i hom labenen ber gor lundielang?

² Jesu i loh hom mbunana, i lugi le molengasu.

³ I vong le ndro su, i bai: Ndangen io boi le ndro mu, ar mu belueni bern ademu bui, bern ademu i dege bern asu mbunana, danmu le lundielang bui.

⁴ Be homo i da hanguruen dege mbunana ogo, i de danen hanguruen bui, sie i labenen ber gor lundielang, i ogo i manden ge, hanu le asu masi ber gor lundielang.

⁵ Be homo i sobani mbunana homo le ngoro, i sobani io.

⁶ Be homo i da seslaini su ndramed ogo molhege le longu momen, i monen ge, be su hosi i, su daui bad manden le vas, su gbieni i le ndas manden.

⁷ Su gina momen ge, su gor masi, su da seslaini su. Longu momen i da le gor boan ndangen, aga logna le longu momen, ndramed homo, i da seslaini su leri i gina momen gane.

⁸ Be nemem de ndegem beg seslaini uo le longu momen, e sindrdi giao, e bieni i gle manan, i hian hanu, mandrm i momen ge, ma meluam i mamaren sidesi, de nemem e ndegem marge, uo al moan manden, moan de somad bui.

⁹ Be begmarm i seslaini uo le longu momen, ede i, gbieni giao. I hian begmarm si ge, uo la gor lundielang, de begmarm maruo, uo al moan manden.

¹⁰ Gobgulue meluamu, debosan mu hanguruen momen le su mbunana ogo. Io vong le ndro mu, su Angelo asu, su da lundielang, su ilndri sidesi bormarn ad Bo Domo le lang.

¹¹ Ndurndramed i gin meher, beg gahi su, su da gina malold.

¹² Mu hanguruen sa? Hom ndramed, meh aden masanged, homo i gin bieni i, i gina momen, i gina malold, ndramed ogo i bieni su meh manondrsungul e nondrsi, i la bahali, i gahi meh aden, i da gin bieni i.

¹³ Be i gin danoni i, i da mugmug manden ge, le meh da gin danoni i, hanu le su meh manondrsungul e nondrsi, su da horuan ge.

¹⁴ Damu ber lang i mburen homo asu mbunana ogo na glos.

¹⁵ Be nderm gin bo momen le ndro uo, al ndro i, vong le ndro i gleri, uo ma i ge. Be i delengan le nongen adem aga i hian.

¹⁶ I de delengan le nongen adem bui, hedi homo, de sor marmou, ma hinen gord le ndro i, le bormar so marmou.

¹⁷ Be i de delengan le nongen asor marmou bui, bosoui longu ogo le ndro su lao masi ber lodu. Be i da delengan le nongen asu ndern masi bui, hanguruen i, i homo asu Haiden, i hom ndramed gina momen gane.

¹⁸ Ndangen io boi le ndro mu: Longu masi mu da hosi i le boan, i gina hosi le lang lie. Longu masi, mu rumburdi i le boan, i gina horuan le lang lie.

¹⁹ Heb nongen le ndro mu lie: Be sor marmou ber gor boan beg soling le longu hendre, Bo Domo ber lang i hengen asor.

²⁰ Be sor marmou, de su madilmou su me goure le ngoro, io da le dogrosu.

Heb nongen le suria.

²¹ Boen Petrus i la ndro Jesu, i ndemani, i bai: Ndorlaben mabersehe golo i ndud longu momen ad ndere i da gin bo longu momen me ndro io ie? I vonei maberndrdolo, de bui?

²² Jesu i bode: Io vong le ndro uo: Maberndrdolo, aga i de vonei bui, manondrdilingul maberndrdolo, aga i vonei.

²³ Gor lundielang i dege King homo, i da gin loh su lao aden le um peper aden.

²⁴ I beg hanguruen memrad, i da gin hengen le ndro su. Homo gin meher, moni mabosungul ad King i da ndro i.

²⁵ I de danen surien moni mabosanged dagara bui, ndorlaben aden i beg semani nambuln, ma ndurn, ma memrad aden masi sumburdi, aga heb surian le memrad aden.

²⁶ Lao aden ogo i da godurhu ngondrnegen, i soling le ndro ndorlaben, i bai: Ndorlaben ir belengeni io, io beg surien moni adem masigane.

²⁷ Ndorlaben i ibdi gahaloseli le ndro lao aden, hengen le ndro i moni aden masigane sumburdi.

²⁸ Ndramed ogo, be i gin bieni um ad ndorlaben, hom lao ad ndorlaben lie i sohal sal aden, moni masanged ad ndramed ogo i da ndro i, de gin surieni masou. Ndramed ogo, i hosi i, i bo iil le ndro i, i bordaui bergoln, i vong le ndro i, i bai: E surien moni ordo malabo.

²⁹ Lao ogo i los le boan, i soling, i bai: Ir belengen io, io beg surieni sumburdi.

³⁰ Ndramed ogo i mburen belengeni, i gina, i bo gord le ndro i, i daui i le kalabus na gsurien moni aden.

³¹ Be su lao masi ad King su gin ilndri longu ogo, bergolsu i irgu. Su gina, su bosoui longu ogo masi le ndro ndorlaben asu.

³² King i gin loh ndramed ogo i vong le ndro i, i bai: Uo ndramed momen ge, io gin hengen le ndro uo moni ordo masi sumburdi, uo da gin soling me ndro io.

³³ Desa uo da gin ibdi heb gahaloseli de la ndro nderm bugane, dege io da gin ibdi i le ndro uo?

³⁴ Gus ad ndorlaben manden ge, i daui ndramed ogo le nemesu polisboi, su daui i le kalabus, le surien moni ad ndorlaben masigane sumburdi,

³⁵ dagara Bo Domo ber lang i ghinen i le ndro mu, be golmu de ndud longu ad nderm bugane, i da gin hinen le ndro homo ma homo.