Mateus 14 - Niu Testament 1956 (Manus PNG)

Herodes i daii Johanes, ndremda surhi su.

¹ Le rang ogo ndurhian Herodes ha hirong ngarnongen le Jesu.

² I vong le ndro su lao aden, i bai: Aga Johanes, ndremda surhi su, i gin ndne lie le ngad aden, i ogo i hinen gelman dagara.

³ Herodes gin daui Johanes le Kalabus le ad Herodias, nambulen ad ndern Philipus.

⁴ Johanes i gin vong le ndro i, i gin bai: uo gin ibdi Herodias gle nambulem, aga momen ge.

⁵ I leng daii i, noh su ndramed, su da gin hanguruen, Johanes i hom Provet.

⁶ Uru ad Herodes gin meher, ndurbihin ad Herodias i bo ndan, le bormarsu labenen masi, su da gin me le gous. Herodes bamugueni i.

⁷ I daui nemen le belengen, i vong le ndro i, i beg hengen le ndro i longu masi i ie lengi.

⁸ Nanen, i da gin bai le ndro i hanu, i ndemani Herodes le longu ogoro: Io ha lengi, uo hedi me ndro io balen ad Johanes, ndremda surni su, le lus si.

⁹ King ndrnen i irgu le soling ogo, i hanguruen nongen aden, i da gin daui nemen le belengan, i mbueren, ndurbihin i soling molhe, i somui ri.

¹⁰ I rendegien hom lao aden, i ogo gin sindri balen ad Johanes.

¹¹ Su gin daui balen le lus si, su gin hedi i le ndro ndurbihin. Ndurbihin i hengen i le ndro nanen.

¹² Su lao ad Johanes, su gin mehere, su hedi numbuen Johanes, su doni i le ngad. Boen su gina le ndro Jesu, su gin boharni longu ogo le ndro i.

Jesu hengen gan me ansu malibou.

¹³ Ar Jesu gin hirong i, i gin bieni gor ogo i hedi ndol heie i gina le marboga, i ge. Be su ndramed masi gin hirong leri, su ndrbon le sal aden.

¹⁴ Be Jesu gin mul le marboga, i ilndri su ndramed dsoln dagara, ndrnen i gosusngo le asu, i ibdi gahaloseli le ndro su, i regurdueni su, su da med.

¹⁵ Ibia, mernal beg lol, su lao aden su la ndro i, su vong, su boi: Ndorlaben aga marboga, baghege lobing, bai le ndro su ndramed, su iao le gor asu, su semani gan la.

¹⁶ Jesu i bode: Derbe su semani gan la, hengen i le ndro su gan.

¹⁷ Su vong le ndro i su bai: Suslong malima, e ni marmou ge aga gan anu.

¹⁸ I bode: Hedi me ndro io.

¹⁹ I vong, su ndramed su lugdo im boan, boen i hedi suslong malima, ma ni marmou, i dendrai le belengan, i bamugueni Jehova leri, i iendri suslong, boen i hengen le ndro su lao aden, su lao aden, su hengen i le ndro su ndramed.

²⁰ Su masigane su ien, su mosesu. Muren su gin hedi nogden, su nhui ndob mandob su ngolerhed.

²¹ Su gamel su da gin ien gan, su malibou, dagara su bihin ma su ndurn la born.

Jesu dogi ndre ndran.

²² Malabo Jesu i rendegien su lao aden le leng horo, su hedi ndol heie, su dogi hanu, i rendegien su ndramed masi le gor asu.

²³ Mburer aden boen, i la ndre bahali, beg lodu. Lobing gin me, i ge, i homo, i da le leng.

²⁴ Ndol i da ndran manden, noui manden ma ior manden i ngoh.

²⁵ Madourang, Jesu i la ndro su, i dogi ndre ndran.

²⁶ Be su lao aden ilndri, i dogi, su noh manden su hanguruen: Aga beld. Su loholo ndoun, noh asu dsoln.

²⁷ Malabo Jesu i vong le ndro su: Horuamu, io ie, mbue mu go noh.

²⁸ Petrus i vong le ndro i, i boi: Ndorlaben, aga uo, hian vong me ndro io, io dogi ndre ndran me ndro uo.

²⁹ Jesu i bode: Am ogo. Petrus i bieni ndol aden i dogi ndre ndran la ndro Jesu.

³⁰ Be i gin ilndri ior manden, i noh, malabo i lol, i loholo i bai: Ndorlaben osbani io.

³¹ Jesu i boro nemen, i vong le ndro i: Desa uo de danem boro ndoui ordo heb hian bui?

³² Sor la lundiendol, ior boen.

³³ Su gamel, su da ndol, su gin me, su los le boan, su vong, su bai: Ndangen uo Ndurn Jehova.

³⁴ Boen su gin me leng, le gor asu Genesared.

³⁵ Be su dansu aga Jesu, su rendegien nongen le gor ma gor bosanged, su hurdi su ndramed, su da sik, le ndro i.

³⁶ Su ogo, su ndemani Jesu, su gboro heb salo aden ge, su nrasi su gin boro i, su horuan, su mamaren lie.