Mateus 13 - Niu Testament 1956 (Manus PNG)

Nongen ad Jesu le leng, nongen le gorn.

¹ Le rang ogo Jesu i bieni um aden i iao le leng, i lugdo im boan.

² Su ndramed mabosanged su la born ndro i. I la lundiendol gle logna aden, su ndramed masi su da leng.

³ I vong le ndro su longu hendre e hendre nongen le dohongein. I vong le ndro su i bai: E lele hom ndramed gina i lug gorn le beleng aden.

⁴ I robieni gorn, holel i los ir sal, ndorgan i me su ieni.

⁵ Holel i los ir bad, boan heb ge mandehe ndre bad. Gorn i reg roud, boan de heb manden bui.

⁶ Boen mernal i gobad, gorn i voiliu, i meng ngondrn bugane.

⁷ Holel i los le barvas, barvas i reg, i ndrodhi dohobern, sengen bui.

⁸ Holel i los le boan hian, i reg sengen mabosanged, holel madilingul, holel manonungul, holel masanged.

⁹ Homo i delengan ha hirong nongen ordo.

¹⁰ Su lao aden su me ndro Jesu, su ndemani i su boi: Desa uo vong le ndro su nongen dohongein ge.

¹¹ Jesu i bode, mu ge, mu da danmu longu ber lang mu danmu longu i da gin nhui dagara lie, su masi de dansu i bui.

¹² Ar memrad hian i da ndro homo, memrad gle ndro i, bersilie muren memrad aden bulhege. Ar memrad heb mabosanged bui i da ndro homo, su rui memrad aden bersi ma bersi, heb eluen bui memrad aden gina boen.

¹³ Io vong le ndro su nongen dohongein ge, begmarn i da ndro su, de dansu lele bui, delengan i asu, dansu hirong bugane, dansu longu ogo bui.

¹⁴ Dege Jesaia gin vong mahanu: Mu da hirong sidesi mu da hirong dahed, mu da lele sidesi mu da lele dahed.

¹⁵ Bergolsu ndramed ogo ndoun ndoun ge, delengasu momen, su gin ndrodihi begmarsu, debosan su lele hian, debosan su hirong hian, su garbelueni bern asu io regurdueni su.

¹⁶ Mu horuan ge begmarmu lele hian, delengamu hirong monen.

¹⁷ Ndangen io boi le ndro mu: Su Provet ma su lao ad Jehova mabosanged su ha lengi lele longu masi danmu lele, su de gin ilndri bui, su beg hirong, nongen uomu hirong i, de dansu hirong i bui.

Jesu i boharni nongen le dohongein.

¹⁸ Malabo io leng boharni le ndro mu nongen le dohongein ogo.

¹⁹ Homo ma homo i da hirong nongen ber lang, i de danen leri hian masou, Sadan i me, i behena gorn masigane su gin daui le bergoln: Aga gorn i da gin los le sal.

²⁰ Holel ir ndre bad, aga, su hirong nongen, su mugueni nongen,

²¹ ngondern bui, heb eluen bui muren be rang momen i gmehere, su hingismad aden le nongen ber lang i da gin hirong i, i bieni nongen ogo.

²² Su holel ir barvas i vonei: Su hirong nongen, muren su da hanguruen memrad ber boan, longu molhe ber gor ogo sidesi. Hangungrou ogo i ndrodhi nongen ad Jehova, sengen bugane.

²³ Holel i da le boan hian, aga i vonei: Ndramed ogo i hirong nongen ad Jehova i danen leri, i hinen i dege i gin hirong i, sengen aden mabosanged, holel masanged, holel manonungul, holel madilingul.

Nongen dohongein le lomondriu i da le beleng.

²⁴ Boen i bosoui le ndro su heb nongen dohongein lie: Gor lundielang i dege hom ndramed i da gin daui gorn hian le beleng aden.

²⁵ Be i da gin medir, ndremda bahun gin meher, i gin daui begen ber lomondriu le beleng, muren i gin bieni i.

²⁶ Be gorn gin reg lomondriu lie i gin me.

²⁷ Su lao ad Ndorlaben ogo su gin mehere ndro i, su vong su boi: Ndorlaben, uo da gin daui gorn hian le beleng adem de bui? Lomondriu ogo le beleng adem gin meher oho?

²⁸ I bode: Ndremda bahun gin hinen i. Su lao dandendegei aden ndemani i: Uo ha lengi iou hilou iou dirongi?

²⁹ Ndorlaben i bode: Buio, debosan mu ordi gorn hian bersi.

³⁰ Gorn e lomondriu greg bersi, i gsou le beleng. Be i gin meng, io vong le ndro su ndremda beleng: Mu hedi me goure lomondriu molhe hanu, mu singeni moan leri, moan i dilmui lomondriu molhe. Gorn hian mu daui i le um.

Heb nongen dohongein le begen mandehe ma le drib.

³¹ Jesu i vong le ndro su heb nongen dohongein lie, i vong i bai: Gor lundielang i dege begen mandehege, hom gamel i hedi i, i daui i le beleng aden.

³² I mandehege be i da reg i manden ge, hanu le gan masi ber beleng, i dege gei heie, ndorgan ber lang i me su daui numen ri.

³³ Boen i vong le ndro su heb nongen dohongein lie i bai: Gor lundielang i dege drib i da le bobir, bihin homo i hedi flouer i daui i ri, heb eluen bui muren drib ogo gina le flouer masi.

Jesu boharni le ndro su nongen dohongein.

³⁴ Nongen ogo masi Jesu i da bosoui le ndro su, aga nongen dohongein ge. I da gin vong dagara le ndro su.

³⁵ Dege hom Provet i vong mahanu: Io da lug boho, io da vong le ndro su nongen dohongein ge. Io gin nhui longu ordo io da gorni i, io beg bosouri leri.

³⁶ Boen i vong le ndro su ndramed, su iao le gor asu, i ge i gina le um aden. Su lao aden su la born ndro i, su soling ndro i, su bai: Hian boharni me ndro du nongen dohongein le lomondriu molhe ber beleng.

³⁷ Jesus i bode: Ndramed i da gin daui gorn hian, aga Ndurndramed ber lang.

³⁸ Beleng aga gor boan. Gorn hian aga su mbunana ber gor ad Jehova, lomondriu molhege aga su mbunana ad Sadan ge.

³⁹ Ndremda bahun i da gin daui lomondriu le beleng, aga Satan. Rang be gorn gin meng i hian, aga rang manden i da beg mehere, rang le gord ad Jehova. Su ndremda beleng aga su Angelo.

⁴⁰ Dege su ndremda beleng su gin daui lomondriu molhe le goure, su gin bieni le moan, dagara su ghinen i le gord ad Jehova.

⁴¹ Ndurndramed i rendegien su Angelo aden su rui le geherong su ndramed momen masi, dagara su da gin seslaini su le longu momen.

⁴² I gbieni su le moan manden. Su dang, su gundrdi lehesu ndoun ndoun.

⁴³ Su ndramed hian monen su da le gor ad Damsu ber lang, su hinganen dege mernal ber lang. Delengamu, hian ha hirong nongen ordo.

Heb nongen dohongein lie.

⁴⁴ Gor lundielang i dege memrad, homo i da gin daui le ngai ber boan mahanu, gamel homo i gin danoni memrad ogo bersi muren, muren i gin gorni i lie le ngai ogo. I mugmug manden, i gina i semani memrad aden masi sumburdi, boen i iao i semani beleng ogo gle aden.

⁴⁵ Gor lundielang i dege ndremda simsim, i da gahi neldun suh.

⁴⁶ Be i gin danoni si hian ge, i gina, i semani memrad aden masi sumburdi, muren i hedi neldun sun ogo.

⁴⁷ Gor lundielang i dege gahu su da gin bieni le ndas su da bor ni.

⁴⁸ Ni dsoln i dari, su gin rui le leng. Boen su lugdo im boan su hedi ni hian le ndro gao asu. Gongon su gbieni le ndas.

⁴⁹ Dagara be gord ad Jehova i gmeher, su Angelo su iao su da hedi su ndramed momen su da le molengasu hian ge.

⁵⁰ Su gbieni, su le moan manden, su da gu dang, su da gundrai lehesu.

⁵¹ Umu danmu longu masi ogo? Su bode: Ehe dandu i.

⁵² Boen i vong le ndro su: Ndremda henunuen su, homo ma homo, i da gina le skul ad Jehova, i dege labenen ber um hom, i da daui memrad aden le nemesu, memrad ber mahanu, e memrad houen lie.

Su ber Nasared hangaini Jesu.

^53-54 Nongen dohongein ad Jesu boen, i bieni gor ogo, i gina le gor ad damen, Nasared. I do da ri, i iao le numo hernou asu, i henunuen su. Su masi su hirong i, meluasu i ieb, su ndemani: Sie gin henunuen i le nongen dagara, le gelman ndoun.

⁵⁵ I ogo i ndurn ad ndremda marbahar ber gor adu, de bui? Nanen aga Maria, su ndern aga Jakobus, Josev, Simon e Judas de bugane?

⁵⁶ Su bison aden su da le gor adu lie? Sie gin henunuen i le longu masi ogo ie?

⁵⁷ De dansu le aden heb hian monen bugane. Jesu i vong le ndro su, i boi: Su de bamugueni hom Provet le gor aden bui.

⁵⁸ I de danen bo gelman mabosanged de la ndro su boi.