Mateus 11 - Niu Testament 1956 (Manus PNG)

Heb nongen asu lao ad Johanes.

¹ Nongen boan, Jesu i bieni gor ogo i irgai le gor hoger hoger, i henunuen su gor masi, i bohernou le ndro su le longu ber lang.

² Johanes, ndremda surhi su, i do da le kalabus, i gin hirong le longu ad Jesu, i rendegien su lao aden,

³ su endemani Jesu, su boi: Uo ge ndangen, i da beg mehere, de iou belengen le homo ber muren?

⁴ Jesu i bode: Al ndro Johanes, gobharni le ndro i longu masi, begmarsu i lele i, nongen masigane delengamu hirong i:

⁵ Begmarsu bui, dansu lele hian, degesu momen, dansu irgai monen, mandrsu momen, legen ge, su rosan lie, delengasu bui, dansu hirong monen, su da gin mad, su gin ndne lie. Nongen hian, longu ber lang gle ndro su ndramed molhe ber boan.

⁶ Hian horuan ge, be homo ndrnen i de irgu le ordo bugane.

⁷ Su loa ad Johanes be su gin hirong nongen ad Jesu, su ilndri longu masi, i da gin hinen i, su iao mul. Malabo Jesu i vong le ndro su ndramed heb nongen le Johanes, i vong, i bai: Mu leng ilndri sa goru, ar mu gin irgai le marboga, mu leng ilndri heb lomondriu, hai i ndounen i?

⁸ Desa mu gin dogi la born ndro i mu leng ilndri hom ndramed salo aden hian silik ge? Su ndramed salo asu hian mabosanged, su da le um asu ndurhian ge.

⁹ Desa mu gin dogi le ndro i? Mu leng ilndri hom Provet? Ndangen io boi le ndro mu: Aga i Provet molhege bugane, i ogo i hom manden ge.

¹⁰ Dege nongen i da le Buk Helian ogoro: E lele io rendegien hom lao ordo le sal hanu, i gob sal ordo hian monen ge.

¹¹ Ndangen io boi le ndro mu: Hom bihin ber boan i de gini ndurn dege Johanes bugane, homo ber gor lundielang homo molhege, i manden hanu le ad Johanes.

¹² Le rang, be Johanes gin me mabenan malabo, gor lundielang i gmehere roud, su ge, su dansu boro i ndoun ndoun, gor lundielang i asu.

¹³ Su Provet masi ber goru, ma Mose dagara lie, su gin vong mahanu le rang ad Johanes.

¹⁴ Heb nongen le ndro mu lie: Aga Elias i da beg meher, danmu somui leri de bui.

¹⁵ Delengamu hian ha hirong nongen ordo.

Heb nongen dohongein ad Jesu.

¹⁶ Su ndramed ber range su dege sa? Su dege mbunana su da bo ndroud, su vong le ndro su mbunana, su boi:

¹⁷ Iou gin bo demi, mu mbure bo ndan, du gin bo demi, mu mbure ndang.

¹⁸ Johanes gin me, i de gin ien gan hian bui, i de gin ilmui ndrunvain bugane su gin vong, su gin bai: I hom ndramed gou i da ndrnen.

¹⁹ Malabo ndurndramed gin me, i da ien gan, i ilmui ndrunvain, su vong, su bai: E lele i hom ndramed momen ge, i da ien gan, i da ilmui ndrunvain, i de bandri bui, i hom gous asu ndramed momen ge. Hanguruen asu momen beg dieni su.

Jesu i boii su gor masi.

²⁰ Boen Jesu i boii su gor masi i da gin bo gelman ndoun le ndro su, mburer mabosanged ge, su de gin belueni bern asu bui.

²¹ I vong i bai: Gorasim uo momen ge, gor Betsaida uo gina momen. Be su ber Sidon e Tirus su gin ilndri gelman dagara, su belueni bern asu, bergolsu i dang, ndrnesu i gosusngo le longu asu momen, su da gin hinen i.

²² Ndangen io boi le ndro mu: Tirus e Sidon su hian hanu le ademu le gord ad Jehova.

²³ Gor Kapernaum uo hian hanu le su gor masi? Buio, Jehova i gbieni uo le gor moan le gord aden na gmehere. Ndangen io boi le ndro mu: Su ber gor Sodom e Gomora su ilndri goru gelman manden uo da gin ilndri Sodom e Gomora de gin lol bui su da range lie.

²⁴ Ndangen io boi le ndro mu: Gor Sodom i hian ge, hanu le adem, be gord ad Jehova i gmeher.

Jesu bamugueni Damen.

²⁵ Le rang ogo Jesu i dendrai, i lug bohon, i vong, i boi: Io bamugueni uo Bo Domo Ndorlaben ber boan, e ber lang, uo da gin nhui longu ordo le ndro su labenen le ndro su ndramed hian ber boan, uo gin boharni i le ndro su ndramed molhege.

²⁶ Ndangen Bo Domo, bern adem dagara sidegesi.

²⁷ Bo Domo gin hengen longu masigane me ndro io, homo ber boan i de danen ndurn bui, Damen ge ber lang, i danen i. Homo ber boan i de danen Damen bugane, ndurn ge, i danen i, ma homo e homo, ndurn i da boharni i le ndro i.

Jesu i loh su, su da sab longu beruan.

²⁸ Mu gam ndro io, mu masi mu da sab le ngundun beruan, io beg sobani mu.

²⁹ Ibdi mburer ordo longu ordo hian ber lang, io beg henunuen mu idbi bern ordo e lele io da belengen su, su heb ndoa bui, bergolo i de hanguruen longu manden ge asu ndramed bui. Ar mu hanguruen bern ordo hian ge bergolmu i horuan ge i hengang hian.

³⁰ Mburer ordo i de beruan bui, longu ordo i de ndounen su ndramed bugane.