Mateus 10 - Niu Testament 1956 (Manus PNG)

Jesu i eloh su lao aden e rendegien su le mburer aden.

¹ Boen Jesu i eloh su lao aden masongul e rumou, i hengen ndoui le ndro su, le robuldi beld, e regurdueni iab asu ndramed e mandrsu i da momen.

² Aga ngarsu asu masongul e rumou: Simon, ngarn Petrus, ndern Andreas, Jakobus ndur Sebedeus, ma ndern Johanes.

³ Philipus e Bartolomus, Tomas e Mateus ndremda moni, Jakobus ndur Alveus, Lebeus ngarn Tadeus lie.

⁴ Simon ber Kana, e Judas Isgariot, i da gin hevani Jesu.

⁵ Boen Jesu i rendegien su masongul e rumou ogo; i vong le ndro su, i bai: Mbue irgai le gor asu Haiden, mbue dogi le gor asu Samaria.

⁶ Hian gal gor asu Israel ge, su dege meh, su gina momen, su gina malold.

⁷ Ar mu hilou ndro su, vong le ndro su nongen dagara: Gor lundielang gin mehere, i da baghege malabo.

⁸ Regurdueni su, su da med, hingen su, su da gin mad, robuldi su beld gregurdueni su, mandrsu i momen, legen ge. Mbue hedi heb moni gleri. Ghengen i, dege io gin hengen i le ndro mu gle gous ge. Mbue hanguruen surien asu.

⁹ Mbue hedi moni le ndob ademu.

¹⁰ Memrad mabosanged i da le ndob ademu bugane, salo hendre ge, sumianegen bui, ndes bugane. Homo i da bo mburer, i vonei le gan anen.

¹¹ Ar mu la gor si, hirong i, homo i da somui le ademu, mu iao le um aden, mu gorge um hom, mabenan mu gbieni gor.

¹² Ar mu la gor si, mu da bosoui nongen hian ge le ndro su.

¹³ Be su ber um ogo su da vonei le ademu, su somui le ademu, io leng bo hian le ndro su, be su de vonei le ademu, bui, io de hanguruen su bui, nongen ademu i la gmul.

¹⁴ Ar su de delengasu le nongen ademu bui, su mbure mu e bieni um asu e gor asu giao. Mbue hur heb longu asu.

¹⁵ Ndangen io boi le ndro mu, su ber gor Sodom ma Gomora su hian ge le asu be gord ad Jehova i gmehere.

¹⁶ E lele io rendegien mu, mu dege meh hian, su da le molengasu mui momen, su da beg ien su. Hanguruen ademu i ndoa ge, mu dege moad, hanguruen ademu i hian monen gane, mu dege bal si.

Heb nongen le ngendian asu.

¹⁷ Hian gobgulue meluamu. Su ndramed momen su da bage ndro mu. Su gob gord le ndro mu. Su grii mu le numo lodu asu.

¹⁸ Su rui mu le ndro su ndurhian asu, le ndro su King asu, aga mu da hanguruen mburer ordo ge.

¹⁹ Be su rui mu le gord, mbue hanguruen, mu vong sa le ndro su. Meluan Helian i ghenunuen mu le nongen hian monen ge.

²⁰ Mu do da vong bui, Meluan ad Jehova i da vong le bohomu.

²¹ Ndern homo i rui ndern, i garii i na gmed ge, damen i da daii ndurn, su ndurn su rii su damsu e nanesu.

²² Su masi, su gob iil le ndro umu. Homo ma homo i da ndoa le longu ordo, io beg rumburdi.

²³ Be su hingismad ademu le gor, mbue dandon, hilou e vob le gor si manan. Ndangen io boi le ndro mu, su gor masi su gob iil le ndro mu sidegesi, mabenan ndurndramed na gmeher lie.

²⁴ Hom lao i de hian hanu le Ndorlaben aden bui, ndangen hom lao i de ndoa hanu le Ndorlaben aden bugane.

²⁵ Longu masi i da gmeher le ndro Ndorlaben aden, i gmeher ndro lao dandendegei aden dagara lie. Ma lao aden i da somui ri. Be su gin boii i Ndorlaben, su bosoui Belsebub, i vonei Satan, su ghinen i le ndro su lao dandendegei aden dagara lie.

²⁶ Mbue mu go noh, longu masi su da gorni, io gobharni i, longu masi su da ndrodhi, bersi muren su dansu leri.

²⁷ Longu masigane i da gin nhui le nongen dohongein mu gobharni le ndro su longu masi, io da gin vong le delengamu ge, io da gin bahurhuh ge, loholo leri le balndro um.

²⁸ Mbue mu go noh, su masi su dansu daii mandrmu ge, de dansu daii bergolmu e meluamu bui. Hian mu noh le ad homo ge, i da danen bieni meluamu e mandrmu le moan manden.

²⁹ Su da semani ndorgan le moni sehendr ge, ndorgan i longu hendre molhege. Ha hirong i, dorgan i de los le boan bui, Damen ber lang ir bogulue i.

³⁰ Lomon i da le balmu Ndorlaben gin ha nemeni masigane.

³¹ Mbue mu go noh, mu hian hanu le ndorgan molhe ber lang.

^32-33 Homo ma homo i da boharni nongen ordo, bombulen de mesi leri bui, muren io gobharni ngarsu le ndro Bo Domo ber belengan. Homo ma homo i da hangaini io, bombulen i mesi le nongen ordo, io da hangaini su lie, io de boharni ngarsu le ndro Bo Domo le belengan bui.

³⁴ Mbue hanguruen, io gin me boan le lug benu le gor asu, ndangen io gin me leri bui, io daui mordo borla le nemesu, bahun ge le gor asu.

³⁵ Ndurn i gob iil le ndro damen, ndurbihin i bo bahun le ndro nanen, naloson ndrnen i ma le ad naborson.

³⁶ Su loun ad homo masigane su gob iil le ndro i.

³⁷ Be homo i golnisden damen e nanen hanu, i de vonei io bugane, be homo i da voaniso ndurgamel de ndurbihin hanu i de vonei io bugane.

³⁸ Be homo i de hedi beldigei aden ie hauen bui, i da ndrbon le sal ordo bugane, i ogo i de vonei io bui.

³⁹ Be homo i da hanguruen mandrn ge i na glos, be homo i da momen le mburer ordo, i da gin hinen i mandrn heb ndoa bui leri, i ogo i horuan ndangen.

⁴⁰ Ar homo i somui le ademu, i somui le ordo lie. Ar homo i somui le ordo, i somui le aden ge, i da gin rendegien io.

⁴¹ Be homo i hanguruen hom Provet, i vong, i bai: Aga hom Provet io somui le aden, i me le um ordo. Surien i belengeni, aga i vonei le ad Provet. Be homo i bo hian le ndro hom lao ordo i hanguruen le bergoln, aga hom lao ad Jehova, surien hian i da belengen i, surien le ad hom lao ad Jehova.

⁴² Ar homo i hengen le ndro hom lao ordo molhege, dege su ndere ordo, heb ndran le ngoro, i hanguruen le bergoln aga hom lao ad Jesu, ndangen io boi le ndro mu: Surien ber lang ir belengen i.