Markus 15 - Niu Testament 1956 (Manus PNG)

Jesu i la ndro Pilatus.

¹ Mabing ge mandourang su ndurhian ma su labenen su ndremda bohernou su hian masi su vong le goure, su hosi Jesu su dulieni le ndro Pilatus.

² Pilatus i ndemani i: Uo ndorlaben asu Juda? Jesu i vong i bode: Uo abui.

³ Su ndurhian su hur nanenongen. i de vong bui.

⁴ Pilatus i ndemani i lie i bodeie: Uo de vong mul bui? Uo de hirong bui su hur nanenongen?

⁵ Jesu i de vong mul bui, melua Pilatus i ieb leri le.

⁶ Uru si uru si su hur gous asu manden. Pilatus i rumburdi homo ir kalabus dege voasuiso ad homo.

⁷ Malabo homo ir kalabus ngarn Barabas i hangaini Kiap, i rii hom ndramed le il.

⁸ Su ndramed la ndro Pilatus su ndemani i, a i grumburdi homo lie.

⁹ Pilatus i bodeie: Desa, voamuiso ad Jesu i ndorlaben asu Juda?

¹⁰ I danen le dieni asu ndurhian momen, su mamalo ad Jesu ge.

¹¹ Su ndurhian su ndouo le nongen le ndro su ndramed su bodeie: Du ge ndemani i le Barabas.

¹² Pilatus i vong mul lie i bodeie: Hisa, io gbo sa gle ndro Jesu, mu bode i ndorlaben asu Juda?

¹³ Su lug bohosu manden su bodeie: Ar dehe gle beldigei.

¹⁴ Pilatus i boi: Desa i hinen sa momen? Su lug bohosu manden ge lie, su boi: Ar dehe gle beldigei.

¹⁵ Pilatus beg i hirong nongen asu, ilgi Barabas me ndro su, su polisman su daii Jesu le ndelgi, boen i dieni, su dadehe le beldigei.

¹⁶ Su polisman su huri Jesu me lundieum, su loh su masigane.

¹⁷ Su lug salo ramen le mandrn, su da dehien borndrui le balen,

¹⁸ su godurhu me ndro i su bodeie: Hian uo ndorlaben asu Juda.

¹⁹ Su mur balen le vusu su rogumbunhi i, su godurhu lie, su bo lodu me ndro i.

²⁰ Su hal i dagara, boen su hur salo ramen lendi su daui salo aden lie, su huri be su gal dadhe i gle gei.

Su dadhe Jesu le gei.

²¹ Hom ndramed ngarn Simon ber Kirene damen Aleksander e Ruvus i sohal ndro su, su boro i su ndoun aden le sab gei ad Jesu.

²² Su me bahali si, ngarn Golgata, i vonei logna bobalen le nongen adu.

²³ Be su ghedi ndrunvain me ndro i, Jesu i mbueren i gilmui.

²⁴ Su dadhe ir gei su hur salo aden su ha lug le asu, homo hedi hasl, homo hedi hasl.

²⁵ Mernal ma de me belengan i ma de masar.

²⁶ Su gin hondre longu aden se da gei mburbalen: OGO KING ASU JUDA!

²⁷ Su dadhe sor marmou la born ndro Jesu, sor daiandramed homo ir gei aden le nemen sengen, homo ir gei aden le nemen gameao.

²⁸ Dege hom lao ad Jehova gin hondre dugian: Su dou Jesu le born ndro su daiandramed.

²⁹ Su masi su dogi ri, su habai i Jesu su hal aden su bodeie: Nongen adem derbe, uo mbuserei numo lodu adu e mengseni houen bing ge madolo?

³⁰ Hian e sobani uo, am boan e bieni gei.

³¹ Su ndurhian, su ndremda bohernou su hal aden dogoro su bode: Goru i sobani su mabosanged, malabo i danen le sobani i bui.

³² Gle i Kristo, Ndorlaben adu Israel, hian i gme boan i bieni gei, io ge ilndri iou ga lao aden lie. Sor marmou, sor da gei sor boii i lie.

³³ I mesar gor i ndrogum sumburdi, i roh ibia.

³⁴ Ibia Jesu ilgi bohon manden i bodeie: Eli, Eli, Lama Sabagdani! I vonei: Ndorlaben ordo, Ndorlaben ordo, desa uo gin bieni io ie?

³⁵ Su da baghege su hirong i su bode: I loh Elias.

³⁶ Homo hilou hedi longu si, lumiandrunvain, hedi gle ndre bermenda ilgi me ndro Jesu, Jesu i iin. I ndramed i boi: Du ge ilndri la, Elias me boan e rumburdi i de bugane?

³⁷ Malabo Jesu ilgi bohon manden, i med.

³⁸ Salo mandromai le babi le um ad Jehova i mbuser le ge marndre ber belengan me boan.

³⁹ Polismaster asu i da gulue Jesu, i ilndri i med dagara, i bodeie: I ndramed ogoro, i Ndur Jehova ndangen!

⁴⁰ Su bihin degen su lele ber manan, homo asu Maria Magdalena, hom lie Maria nanen Jakobus sor Joses ma Salome,

⁴¹ su da ndrbon le gor Galilea, su hengen i, su bihin mabosanged lie su do da ndrbon su la Jerusalem.

Su doni Jesu le ngad.

⁴² Mernal beg le lol, bing manona, sabbath mo,

⁴³ Josev ber Arimatia hom labenen asu i hian, i belengen longu ad Jehova le, de noh bui, i le ndro Pilatus i ndemani i le numbuen Jesu.

⁴⁴ Pilatus i danen bui Jesu ginemad, i loh polismaster, i ndemani i, i med gehere.

⁴⁵ I gin hirong ndro polismaster ilgi numbuen Jesu le ndro Josev.

⁴⁶ Josev gin semani salo hian, hedi Jesu le boan i nhui le salo, ilgi le ngad si su da ro i le bad, su da durngi ngaibad le bad si.

⁴⁷ Maria Magdalena e Maria nanen Joses sor do lele su dou i derbe.