Markus 14 - Niu Testament 1956 (Manus PNG)

Nongen le ngendian ad Jesu.

¹ Bing maruo muren su bo gous le ndurme le suslong. Su ndurhian, su ndremda bohernou be su ge behenou i Jesu, be su ga rii i.

² Su bode: Mbue de du ga ri i gir margous, debosan su lao adu su gob iil ndro du.

Heb gous ber Betanien.

³ Jesu i da Betanien i da um ad Simon, mandrn momen ge. Su ian gan, hom bihin hedi ndran ngohodonreen i rebohoueni bobiri, ilgi ndran le mburbalen.

⁴ Su holel ndrnesu i mah su boi: Desa su robieni ndran ngohodonreen molhe dagara?

⁵ Hian su gilgi gle moni madilingad, su ghengen su gleri longu asu bui. Su bangondrngondr aden.

⁶ Jesu i boi: Desa mu bangondrngondr aden, i girge. I bo memrad hian me ndro io.

⁷ Su ndramed longu asu bui, so do da ge ndro mu sidesi, be mu gob memrad hian me ndro su, mu ghineni ge. Io or ndro mu heb eluen bui.

⁸ I bo longu hian i vonei aden, i genouni io gle ngad.

⁹ Ndangen io boi me ndro mu: Le gor masigane su bohernou Nongen Helian ri, su hanguruen i bihin, i bo memrad hian me ndro io.

¹⁰ Boen Judas Isgariot i homo asu masongul e rumou la ndro su ndurhian, beg hevani Jesu le ndro su.

¹¹ Su hirong i, su mugmug be su ghengen i gle moni. Muren Judas i da bogulue Jesu beg ilgi gle ndro su.

Gous ad Jesu le ndurme e suslong.

¹² Bing le gous asu meher, su lao ad Jesu su ndemani i: Voamiso sa, du gain ndurme anu girn oho?

¹³ I rendegien sor lao aden marmou i boi le asoro: Mor gal gor, mor gu sohal hom gamel i hedi lumiandran le hauen mor gorndrbon.

¹⁴ I gle um hom mor gabui gle ad ndramed ber um, mor gabde: Ndorlaben i ndemani uo, um i da oho io gle bo gous leri ma su lao ordo.

¹⁵ I bosilien um hom me ndro mor, longu masi i dari, boen mor sueri gous adu.

¹⁶ Sor lao aden sor la, sor me gor, sor danoni longu dege Jesu gin boi; su dueni ndurme ge i roh.

¹⁷ Ibia Jesu ma su masongul e rumou su me.

¹⁸ Su im boan su ian gan, Jesu i boi me ndro su: Ndangen io boi me ndro mu: Homo ademu i ian gan ordo na gi hevani io.

¹⁹ Ndrnesu irgu su ndemani i, homo i bode: Io ie? Homo i bode: Io ie?

²⁰ Jesu i vong le ndro su, i boi: Homo ademu i gilgi nemen le ndrugou le bor nemo.

²¹ Ndurndramed na gmed dege su hondre dugian, i ndramed i hevani Ndurndramed gina momen! Hian mbue de gmeher ndrnen nanen.

²² Su ian gan, Jesu hedi suslong le nemen i bo lodu leri, boen i iendri hengen su lao aden i bode: Mu ghedi mu gu ni, ogo mondro.

²³ I hedi lumiandrunvain i bo lodu leri, hengen su, su masi su ilmui.

²⁴ I boi: Ogo ndrai ordo le regunha Jehova su gharngeni me asu mabosanged.

²⁵ Ndangen io boi me ndro mu: Io de ilmui ndrunvain bui lie, muren io gu ilmui lie mahauen le gor ad Jehova.

Soling ad le Getsemane.

²⁶ Su bosoui Nongen Helian, boen su iao la bahali, ngarn Oliva.

²⁷ Jesu i boi me ndro su: Lobing mu masi ndrnemu i mah ordo, dege su hondre goru: Io gu rii hian asu, su masi su vob, su do da masumbue ge.

²⁸ Muren io gedne lie, io gle hanu le Galilea.

²⁹ Petrus i boi lie: A su masi ndrnesu i mah adem, io ge bugane.

³⁰ Jesu i bode: Ndangen, io boi me ndro uo: Lobing ogo goho ma de dang maberuo masou uo bieni io maberdolo, uo abde uo danem io bui.

³¹ Petrus i boi le nongen ndoun: Gle su ga rii io, iour gamed bersi ge, io de bieni uo bui. Su masi su boi dagara.

³² Su me beleng hasl, ngarn Getsemane. Jesu i boi le ndro su lao aden: Mu gim la boan, io gla hebe io gle vong le ndro Jehova.

³³ Hedi Petrus, Jakobus e Johanes su iao, i rerr i noh.

³⁴ I boi me ndro su: Meluo baghege na gmed, mu gorla mu gor belengeni io.

³⁵ I le heb lendi, i godurhu i ndemani Jehova, Jehova na gsobani i le longu momen.

³⁶ I bode: Aba, Domo, uo ndoa longu masi, e rumburdi io, gle uo mbuerem io gorge, i da ge ndro uo.

³⁷ I la ndro su su medir ge, i boi le ndro Petrus: Simon uo da medir? Uo danem bui or belengeni io heb mandehege?

³⁸ Hian mu gor mamed ge, mu gvong le ndro Jehova, debosan Satan i la silieni mu, meluamu hian, mandrmu heb ndoun bui.

³⁹ Jesu i la heb lendi lie, i vong me ndro Jehova lie le nongen dagara.

⁴⁰ Boen me ndro su lie, su medir ge, begmarsu i beb le ge mediriu, dansu nongen asu bui.

⁴¹ I me maberdolo i boi le ndro su: Hisa na mu gmedir eruar? Mosen, su gin meher. Su gilgi Ndurndramed gle nemesu ndramed momen.

⁴² Mu ge dne, du gao. Ndramed i beg i hevani io, gin mehere.

Su hosi Jesu.

⁴³ Malabo i da vong ndon, Judas i homo asu masongul e rumou i meher ma su lao mabosanged asu ndurhian, su ndremda bohernou, su labenen, mordo borla e gagao i da nemesu.

⁴⁴ Judas gin bai me ndro su, gin bode: Homo io bogarni i, aga Jesu, mu boro i, mu ghosi i ndoun.

⁴⁵ I me ndro Jesu, i boi: Ndorlaben, Ndorlaben, i bogarni i.

⁴⁶ Su daui nemesu le ndro Jesu su boro i.

⁴⁷ Homo asu su da baghege hedi mordo borla aden beg rii hom lao ad ndurhian, i sehi delengan ge.

⁴⁸ Jesu i vong me ndro su, i bodeie: Mu gmeher derbe le berlou le mordo borla, io hom daiandramed?

⁴⁹ Bing si rang si io da ge numo lodu ademu, io henunuen mu, mu de boro io bui. Dagara i vonei nongen ad Jehova.

⁵⁰ Su lao ad Jesu su bieni i, su vob.

⁵¹ Hom ge irndrbon, salo hendre ge i da mandrn, be su beg boro i,

⁵² i bieni salo aden i vob ge molhe.

⁵³ Su dulieni Jesu le ndro ndurhian asu, su labenen su ndremda bohernou masi su me ge goure.

⁵⁴ Petrus irndrbo su manan, i me le gor ad ndurhian i lugdo im born ndro su lao asu, su min mandrmoan.

⁵⁵ Ndurhian e su hian masi, su gahi nongen be su ga rii Jesu leri, su de danoni longu hendre bui.

⁵⁶ Su mabosanged su me bahilou ge le Jesu, nongen asu heb monen bui.

⁵⁷ Su holel su dne su bahilou, su bodeie:

⁵⁸ Iou da hirong i, Jesu i boi: Io gu ndumbue numo lodu ademu su huri le nemesu ndramed ge, bing madolo io ghurdi um hom mahouen su de hinen i de la nemesu bui.

⁵⁹ Nongen asu lie de monen bui.

⁶⁰ Ndurhian asu i dne i meher dogrosu i ndemani Jesu i bode: Uo de vong de la ndro su bui?

⁶¹ Jesu i simge, i de vong de la ndro i bui. Malabo ndurhian i ndemani i lie, i bode: Uo derbe, uo Kristo Ndur Jehova du bamugueni?

⁶² Jesu i boi: Io ie! Bersi mu gilndri Ndurndramed i lugdo le nemen sengen ad Jehova, i gmeher le ndoulang.

⁶³ Ndurhian i mbuserei salo i bodeie: Hisa io ndemani su le nongen ad Jesu lie.

⁶⁴ Du masi du gin hirong i, i boii Jehova. Mu bode sa? Su masi su da dieni, na i gmed.

⁶⁵ Su degen su rogumbunhi i, su smoi begmarn le salo, su daii i le budnemesu su boi: Al bohernou me ndro du. Su lao asu su da rii i.

⁶⁶ Petrus i da lobohonum, hom bihilou ad ndurhian i me.

⁶⁷ I ilndri Petrus i min moan, i lele le ndro i, i bode: Uo hom lao ad Jesu ber Nasaret.

⁶⁸ Petrus i boi loldi i boi: Io dono i bui, io dono nongen adem bui. I iao le marbohonum si, goho i reng.

⁶⁹ Hom bihilou ad ndurhian i ilndri, i boi le ndro su lie: Aga homo asu.

⁷⁰ Petrus i boi loldi lie. Heb mandehe muren su masi su boi le ndro Petrus; Ndangen, uo homo asu, uo hom Galilea, nongen adem i boharni.

⁷¹ Petrus i berngai, hinen nongen bolhe i bodeie: Io dono i bui mu do da vong sa?

⁷² Malabo goho i reng lie, Petrus hanguruen nongen ad Jesu: Goho ma de dang maberuo masou, uo gin bieni io maberdolo. Petrus hanguruen i, i reng manden.