Markus 13 - Niu Testament 1956 (Manus PNG)

Nongen ad Jesu le longu momen i da beg mehere.

¹ Boen Jesu i molden um ad Jehova, hom lao aden i boi le ndro i: Ndorlaben, ilndri, bad derbe um ogo hian ge, labenen ge.

² Jesu i vong mul i bode: Uo ilndri um ogo labenen ge. Heb eluen bui, bad maruo de da besbas bui, su ndumbue sumburdi.

³ Boen su im boan le bahali Oliva le horo, Petrus, Jakobus, Johanes e Andreas su ndemani i lie su bodeie:

⁴ Abui gme ndro du, gehere su ghinen longu ogo ma sehe gelman longu ogo na gmehere?

⁵ Jesu i vong le ndro su i bode: Mu do la gulue mu hian, homo a de henunuen mu momen bui.

⁶ Su mabosanged su meher le ngoro, su bode: Su Kristo, su bahilou asu mabosanged su rui su.

⁷ A mu ghirong nongen le iil ma iil manden meher mbue de mu go noh, i dagara ge, de bomud roud bui.

⁸ Gor hoger su bo bahun le ndro su hoger lie, hom ndurhian i bo iil me ndro hom lie, boan i nunue le gor ma gor bosanged: song hilou me ndro su ndramed masi, nohoasu soln, aga gelman longu momen.

⁹ Uomu gorgulue i. Su ndramed me hur mu la ndro su ndurhian, su rii mu le numo hernou asu manua ngoro, muren su momen leri.

¹⁰ Hanu Nongen Helian meher ndro su ndramed masigane le gor ma gor bosanged.

¹¹ Be su ge dulien mu le ndro su ndurhian, mbue mu gu noh, mu de hanguruen nongen ademu bui. Melua Jehova na ghenunuen mu, mu gabsou nongen aden ge.

¹² Ndern ilgi ndern na gmed, ma damen gilgi ndurn, ma su ndurn su bieni damsu e nanesu, su daii su na gmed.

¹³ Su ndramed masigane ndrnesu i mah ademu le ngoro. Homo i ndoa ge le nongen ordo i hian.

¹⁴ A mu ge ilndri longu momen gin me um ad Jehova, dege Daniel gin hondre goru, hian uomu gvob ge, mu gu bieni Juda mu la bahali manden.

¹⁵ Homo i de da lundieum aden bui, mbue gle lundieum le hur salo aden.

¹⁶ Homo i da lonhou, mbue gle gor gle hur salo aden.

¹⁷ Su bihin ndursu i da ndrnesu i da nemesu su da momen ge.

¹⁸ Hian mu gendemani Jehova, ar lengen de me sal ademu bui.

¹⁹ Gor masi momen ge, longu momen dagara i de meher masou mabenan range, i de meher dagara lie bui.

²⁰ A Ndorlaben de sobani su bui, homo danen ndoun bui. Jehova hinen longu ogo heb eluen bui, le sobani su lao aden.

²¹ Homo gme bai me ndro mu: Mu gam ogo, Kristo gorda, mbue mu ghirong nongen aden.

²² Su mabosanged su meher su bahilou su bode: Su Kristo, ma su lao ad Jehova, su bo gelman e longu ndoun be su ghinen mu momen, dansu de hinen mu bui.

²³ Uomu da gulue mu. Io gin bai me ndro mu hanu.

Gelman be Jesu na gmeher lie.

²⁴ Longu momen ogo gin meher gane, boen mernal e vara de hinganen bui.

²⁵ Biri ber lang na glos e longu ndoun ber lang masi na gimbul.

²⁶ Muren su ilndri Ndurdramed na gmeher ndoulang, i henge rang i ndoun.

²⁷ I rendegien su Angelo aden, su hur su lao aden ber gub ber rai ber hai ber ndolou le gor masigane.

²⁸ Mu ge ilndri gei ogo: loun mahauen i meher danmu loumandri i baghege.

²⁹ Uomu dogoro, mu ge ilndri longu ogo danmu heb mandehe longu mehere.

³⁰ Ndangen io boi me ndro mu: Su ndramed ber gor ogo su do dandon, longu ogo masi i meher.

³¹ Lang e boan i mbul na gi momen ge, nongen ordo ndoundoun sidesi.

³² Homo danen bui longu momen ogo i mbsig gehere, su Angelo ber lang bugane, Ndurn bugane, Damen ge.

³³ Hian mu gobgulue mu ge, belengeni io, mu gvong gle ndro Jehova, danmu bui gehere longu momen gmsig.

³⁴ Dege hom ndramed i giao gle gor manan, i bieni um aden i boi le ndro su lao aden, su do da gulue mburer asu, homo i da gulue um.

³⁵ Hian mu masi mu do da gulue longu ademu, danmu bui, gehere ndorlaben ber um na gmul, a i gme ibia de lobing, de madourang, de mernal.

³⁶ A i gmeher roud mu masi mu da medir ge.

³⁷ Longu hendre ogo io gin boi me ndro mu, io boi me ndro su masi: Mu ge belengeni io.