Markus 10 - Niu Testament 1956 (Manus PNG)

Heb nongen le bieni nambulen.

¹ Muren su dne su la manan le gor asu Juda le ndran Jordan le horo. Su ndramed mabosanged su la goure ndro i, i henunuen su lie dege bern aden.

² Su Pharisi su me ndro i, su ndemani i, i monen de bugane, hom gamel robuldi nambulen i le iao. Su beg seslaini i.

³ I vong mul le ndro su i boi: Mose gin hondre sa?

⁴ Su boi: Mose i somui homo robuldi nambulen ilgi peper le robulda su bihin le nemen.

⁵ Jesu i boi: Mose i somui, i danen golmu ndoun, mu momen ge.

^6-7 Jehova de hinen dagara bui, i hinen sor, hom gamel hom bihin. Dogoro hom gamel ibdi hom bihin le nambulen i bieni damen e nanen:

⁸ sor nambulen sor habed ge. Sor marmou la ge homo.

⁹ Jehova ibdi sor marmou le goure, gamel i danen de robuldi i bihin bui.

¹⁰ Su la um lie su lao aden su ndemani i leri.

¹¹ Jesu i boi me ndro su: Be homo robuldi bihin aden, gi bo hom lie le surian, i sungsou.

¹² Hom bihin i robieni nambulen, gle bo hom gamel lie i sungsou.

Jesu hengen su mbunana.

¹³ Malabo su la bah su mbunana asu me ndro Jesu, a i gi selbe su. Su lao ad Jesu su bangondrngondr asu.

¹⁴ Jesu i hirong i, ndrnen i ma i boi: Hian su mbunana su gam ndro io, mbue mu ga sendraini su; longu ad Jehova longu asu.

¹⁵ Ndangen, io boi me ndro mu: Homo i de hedi longu ad Jehova bui, dege su mbunana su hedi i, i danen de me ri bui.

¹⁶ Jesu hedi su le berbalen, golnisden su i bogarni su.

Nongen Jesu le ndro hom ulhou.

¹⁷ Muren Jesu i iao le sal, hom hilou me ndro i, me godurhu me ngondrnegen i ndemani i, i boi: Ndorlaben uo hian, sehe longu io ghineni io gu le lundielang muren.

¹⁸ Jesu i boi le ndro i: Uo desa absou io hian e? Hom de hian bui, Jehova ge i hian i homo ge.

¹⁹ Uo danem nongen ad Jehova: Mbue sungsou, mbue rii homo, mbue behena, mbue bahilou, mbue aburei, orgulue dam e nanem.

²⁰ I vong i bode: Ndorlaben, io ma mbunana ge, io gin hinen i sumburdi.

²¹ Jesu i lele le ndro i, voaniso aden, i boi me ndro i: Longu hendre ge uo ma de hinen masou. Uo ala al dou longu adem masi, eruei gle ndro su, heb longu asu bui, Jehova i hanguruen uo, i surien i, boen am drondrbo.

²² I hirong nongen ad Jesu, i gus, ndrnen irgu i iao, memrad aden mabosanged.

²³ Boen Jesu i lele me ndro su lao aden i bode: Hom ndramed aden mabosanged de la longu ad Jehova roud bui, i ndoundoun le aden.

²⁴ Meluasu lao aden i ieb le nongen ogo.

²⁵ Jesu i boi me ndro su lie: Mu nduro, i ndoa le ad homo i hanguruen longu aden ge, a i de me longu ad Jehova bui.

²⁶ Meluasu i ieb lie le nongen aden, su vong le goure su bode: A i dagara, sie gle lundielang?

²⁷ Jesu i lele le ndro su, i boi: Ndramed danen bui, Jehova ge i danen, Jehova ge i danen longu masi.

²⁸ Malabo Petrus i boi: E lele, iou gin bieni longu adu masi iou rndrbom.

²⁹ Jesu i boi: Ndangen io boi me ndro mu: Hom lao ordo i bien um aden, i bien ndernsu, bisonsu, damen e nanen, nambulen e ndurn ma gor aden me ndrbo, voaniso nongen hian ge,

³⁰ io surieni mabersanged. Malabo i hedi um e ndernsu e bisonsu, nanensu e ndursu ma gor aden, e muren i me ndro io me lundielang.

³¹ Nongen hendre ge, su mabosanged su hanu su la muren, su muren su me la hanu.

Heb nongen le ngendian ad Jesu.

³² Su do da sal, su la Jerusalem. Jesu i hanu meluasu i ieb, su do ndrbon su noh. Jesu i loh su masongul e rumou, i boharni me ndro su longu masi gmeher ndro i,

³³ i boi: Du gal Jerusalem, su semani Ndurndramed le ndro su ndurhian su ndremda bohernou, su dieni Jesu na gmed, su Haiden su huri i:

³⁴ su rodi i, su daii i, su rogumbunhi i, boen su daii i na gmed; madolo muren i gedne lie.

³⁵ Muren Jakobus e Johanes ndur Sebedeus sor me ndro Jesu sor bode: Ndorlaben, voaoroiso uo hirong nongen adu oro.

³⁶ Jesu i bode: Gle, uomor leng sa?

³⁷ Sor boi: A uo gin me lundielang lie, homo adu oro gim geiao adem gle nemem sengen, homo gim nemem gameao.

³⁸ Jesu i boi: Uomor danmor nongen ademor bui. Uomor ndoun le longu masi momen, su hinen i ndro io ie?

³⁹ Sor bode: Ehe, dansor. Jesu i boi lie: Ndangen su ghinen uomor momen dege io;

⁴⁰ hendre lie, io dono bui, io ghinen mor, mor gam geiao ordo, aga longu ad Jehova, i ge i gbosou su.

⁴¹ Su masongul su dandon su hirong i ndrnesu i mah asoro Jakobus e Johanes.

⁴² Jesu i loh su masi i boi: Su ndurhian ber gor ogo su ndoun, lao dandendegei asu mabosanged.

⁴³ Bern ademu de hendre. Homo ie lengi i hian ademu na gle lao dandendegei ademu.

⁴⁴ Uomu dagara, homo beg le ndorlaben ademu, i hirong nongen asu masi.

⁴⁵ Ndurndramed de me bui beg le ndorlaben ademu, bugane i me sobani mu ge, i regunha su masi le ndrai aden.

Jesu regurdueni Bartimeus.

⁴⁶ Muren su me Jerigo su iao lie, i e su lao aden e su ndramed mabosanged. Hom ndramed marn bui, ngarn Bartimeus, ndur Dimodeus, i da mandrgos sal i soling.

⁴⁷ I hirong Jesu ber Nasaret me boan, i loholo i boi: Jesu, ndur David, golmgisden io.

⁴⁸ Su mabosanged su habai i, su bode, i ge simge. Ilgi bohon manden lie, i boi: Uo ndur David, golmgisden io.

⁴⁹ Jesu ir lugdo ir boan i bode su geloh i. Su loh ndramed marn bui su bode: Mbue uo noh, edne, i loh uo.

⁵⁰ I bien soubal aden, i dne, le ndro Jesu.

⁵¹ Jesu i boi me ndro i: Voamiso sa, io ghinen gme ndro uo? Ndramed marn bui i boi: Ndorlaben, io beg gu lele lie.

⁵² Jesu i boi: Ala, nongen adem hian gin sobani uo. Malabo i lele lie irndrbo Jesu le sal aden.