Lukas 7 - Niu Testament 1956 (Manus PNG)

Jesu regurdueni lao ad polismaster ber Kapernaum.

¹ Jesu i gin bosoui nongen aden boen le ndro su ndramed masi, su da gin hirong i, i iao le gor Kapernaum.

² Lao ad polismaster baghege na gmed. Polismaster i golnisden lao aden.

³ Be i gin hirong le Jesu, i rendegien su labenen ber gor le ndro i, su soling, Jesu na gmeher, i gregurdueni lao dandendegei aden.

⁴ Su gin meher ndro Jesu, su soling ndro i, su vong: I vonei uo delengam le soling aden.

⁵ I golnisden su Juda, i ge, i gin mengseni numo lodu adu gle moni aden.

⁶ Jesu i dne, i iao le sal, beg dogi la ndro i. I da baghege le um aden, polismaster i rendegien su gous aden le ndro Jesu, i bai: Ndorlaben, mbue meher ndro io, io de vonei bui, uo gmeher le um ordo.

⁷ Io de vonei bui, io meher baghege ndro uo, hian absou nongen hendre ge, muren lao dandendegei ordo i horuan lie.

⁸ Io hom ndramed i da delengan le nongen ad ndorlaben ordo lie, dagara su polisboi ordo su da hinen i dege io lengi. Be io vong le ndro homo, al dogi, i iao; de la ndro homo, am ogo, i me; ma le ndro lao dandendegei ordo, ghinen mburer ogo, i ghinen i.

⁹ Be Jesu gin hirong nongen ogo, meluan i ieb leri, i vong le ndro su, su da le sal, i bai: Io boi le ndro mu, io de gin ilndri homo ber Israel masou, i da gin boro ndoui ad Jehova dege ndramed ogo.

¹⁰ Be su gous ad polismaster gin mul, su gin ilndri lao dandendegei aden i da horuan, i mamaren.

Jesu hingeni hom ulhou i da ginmad.

¹¹ Heb eluen bui muren Jesu i dogi le gor si, ngarn Nain. Su lao aden mabosanged, ma su ndramed dsoln su la born ndro i.

¹² Be su gin meher baghege le gor, e lele, su gin huri hom ulhou, i da ginmad, ndurgamel homo ge ad hom bihin, i hom bihinou. Su ndramed mabosanged su la born ndro nanen, beg doni ulhou le ngad.

¹³ Be Jesu gin ilndri bihinou ogo, i golnisden i, beg ibdi gahaloseli le ndro i. I vong le ndro i: Mbue dang dagara!

¹⁴ I me baghege le numbuen, su da sab leri, de dogi bui, dandon hebe. Jesu i vong le ndro i, i da ginmad: Ulhou, io boi le ndro uo, edne.

¹⁵ Malabo ndramed ogo i dne, i bosoui nongen le ndro su. Jesu i hengen i mul le ndro nanen.

¹⁶ Nohasu masi dsoln, su bamugueni Jehova, su boi: Hom Provet manden i gin me i da dogrodu, Jehova golnisden su lao aden, i gin hanguruen su.

¹⁷ Ngarnongen ogo i hilou le gor asu Juda masi, ma le gor hoger manan.

Heb nongen le Johanes.

¹⁸ Su lao ad Johanes su bosoui longu ogo le ndro Johanes lie. Johanes i loh sor lao aden marmou su la ndro i,

¹⁹ i rendegien sor le ndro Jesu, i ndemani i, uo Kristo i da gmehere, de iou belengen ad homo i da gmeher muren?

²⁰ Be sor gamel la ndro Jesu su bode: Johanes Ndremda Surhi su, i gin rendegien du, le ndemani uo: Uo Kristo i da mehere, de iou belengen ad homo i da gmeher muren?

²¹ Le rang ogo, Jesu i regurdueni su ndramed mabosanged iab i da ndro su, ngongong gin rii su, begmarsu bui, begmarsu gin reu lie.

²² I vong le ndro sor lao ad Johanes marmou, i bai: Mor gal, mor gobharni le ndro Johanes longu masigane, mu da ilndri, nongen masi, mor ha hirong i: Begmarsu bui, dansu lele hian. Ndegesu momen dansu irgai monen. Mandrsu momen, legen ge, su rosan lie. Delengasu bui, dansu hirong. Su da ginmad, su dne lie. Le ndro su ndramed molhe ber boan, nongen hian ber lang gin mehere.

²³ I ge, i horuan, ndrnen i de irgu le ordo bui.

²⁴ Be sor lao ad Johanes marmou gineao, Jesu i vong le ndro su ndramed heb nongen le Johanes, i bai: Mu beg lele sa, be mu gin dogi le marboga, mu beg ilndri lomondriu i da melu be hai i ngoh.

²⁵ Bugane, desa mu gin dogi le marboga? Mu beg ilndri ndramed homo, salo aden hian manden ge? Bugane, su ndramed, salo asu hian, gan ansu mabosanged, su da bo gous sidesi, su da le gor asu ndurhian ge.

²⁶ Desa mu gin dogi le marboga? Mu beg ilndri hom Provet? Ehe, io vong le ndro mu, mu gin ilndri homo i da manden hanu le ad Provet homo.

²⁷ I ogo i homo, su gin hondre dugian: E lele, io rendegien lao ordo le sal hanu, i da ghinen sal adem gmonen ge.

²⁸ Io vong le ndro mu, homo ber boan, i da gin meher ndrnen bihin ber boan, i manden dege Johanes bui. Hom ndramed molhege, i da gor lundielang, i da manden hanu le ad Johanes.

²⁹ Su ndramed masi, su da gin hirong nongen ad Johanes, dagara su ndremda moni, su ndramed momen, su da gin meher ndro i, i gin surhi su, su gin hinen nongen ad Jehova ge.

³⁰ Su Pharisi, ma su ndremda hernou de delengasu le nongen ad Jehova bugane, mburesu Johanes i surhi su.

³¹ Su ndramed ber range, su dege sie?

³² Su dege su mbunana, su da lugdo mi logna bah, su holel le horo, su vong le ndro su holel le horo: Iou gin bo ndemi mbure mu ndan, iou gin bo ndemi mbure mu dang.

³³ Johanes, Ndremda Surhi su, gin me, de gin ien suslong bui, i de gin ilmui ndrunvain bugane, mu vong, mu bai, i ndramed gouge.

³⁴ Malabo Ndurndramed gin meher, i ien ma i ilmui, mu vong le aden: E lele, aga ndramed ganiagounun dsoln, ndremda viski, gous asu ndramed momen ge.

³⁵ Su ndursu, su ge, dansu hanguruen monen leri.

Jesu ma bihin momen.

³⁶ Homo asu Pharisi, i ndemani Jesu, i gmeher le gous aden, Jesu i gina la mandrgosgeao aden.

³⁷ E lele hom bihin ber gor i gin hirong le Jesu, su ndramed masi ber gor dansu i, i hom bihin momen gane. Be i gin hirongi, Jesu i da um ad Pharasi, i gin me, bobiri i da le nemen, ndrelgei ngohondonreen i dari.

³⁸ I me le ndrbon Jesu, i los le boan, bage le ndegen ad Jesu, i dang, ndurmarn i muh, i los le ndegen ad Jesu, be i gin ilndri i, i hinen ndegen Jesu bosou gle lomon, i bogarni, i daui ndrelgei ngohondonreen leri.

³⁹ Pharisi, i da gin loh Jesu le gan anen, be i gin ilndri i, i da hanguruen le bergoln: Be i ogo, i hom Provet ndangen, dege su masi su bai, i danen i, bihin ogo i sie, i da gin boro ndegen, i hom bihin momen gane.

⁴⁰ Malabo Jesu i vong le ndro i, i bai: Simon, io beg vong heb nongen le ndro uo. I bode: Ndorlaben absoui.

⁴¹ Jesu i boi: Hom labenen, memrad aden dsoln, i gin hengen le ndro homo moni malimungad, le ndro homo moni malimungul. Dansor surien moni ad labenen bui. I gin hengen i le ndro sor, surian bui.

⁴² Sie asor i da golnisden labenen manden hanu, uo hanguruen sa?

⁴³ Simon i bode: Io hanguruen i ge, i da gin hedi moni malimungad. Jesu i bode: Hanguruen adem i monen ge.

⁴⁴ I belueni bormarn le ndro bihin, i vong le ndro Simon, i bai: E lele bihin ogo, io gin me le um adem, uo de gin hengen heb ndran gle ndego bui, bihin ogo i gin daui ndurmarn le ndego, i gin hinen i bosou gle lomon.

⁴⁵ Uo de gin bogarni io bui, bihin ogo i gin hogarni ndego.

⁴⁶ Uo de gin daui heb ndrelgei le mondro bui, bihin ogo i gin daui ndrelgei ngohondonreen le ndego.

⁴⁷ Io boi le ndro uo: Io gin sibui longu aden momen, su da mabosanged gineao, golnisden aden i manden ge. Homo, io de dono sibui longu aden momen mabosanged bui, de danen golnisden io heb dsoln bugane.

⁴⁸ Boen i vong le ndro bihin, i bai: Io gin sibui longu adem momen gineao.

⁴⁹ Su masi su da le mandrgosgeao, su hanguruen le bergolsu, aga i sie, i danen sibui longu momen giao?

⁵⁰ Jesu i vong le ndro bihin: Uo da gin boro ndoui hian ge, aga i gin rumburdi uo, al gle mandri ad Jehova.