Lukas 6 - Niu Testament 1956 (Manus PNG)

Heb nongen le sabbath.

¹ Bersi muren le sabbath Jesu irgai le beleng gorn, su lao aden su ian gorn hebe, be su da dogi le sal.

² Su holel asu Pharisi su vong le ndro i, su bai: Desa mu da bo mburer le sabbath, aga momen ge.

³ Jesu i bode: Mu ma de lele heb nongen le Buk ad Jehova, David ie mundrul ma su lao aden?

⁴ I la um ad Jehova i hedi suslong ber um, helian ndro su ndramed, asu ndremda dohor ge, i gin ien, ma i gin hengen le ndro su lao aden leri lie.

⁵ Boen i vong le ndro su: Ndurndramed i Ndorlaben le sabbath lie.

⁶ Bersi muren le sabbath lie, i iao le numohernou, i henunuen su ndramed. Hom gamel do dari nemen sengen irhe ge.

⁷ Su Pharisi ma su ndermo hernou su da gulue Jesu, beg ilndri, Jesu regurdueni le sabbath de bui. Su beg bo gord leri.

⁸ Jesu i danen hanguruen asu, i vong le ndro ndramed, nemen irhe ge, i boi: Edne, am ogo. I dne, i la ndro i.

⁹ Jesu i vong le ndro su, i bai: Io ndemani mu: Aga hian de momen, be homo i da bo longu hian le sabbath, de su bo momen le sabbath, homo i osbani ndramed homo le sabbath, de i bo momen le ndro i?

^10-11 Ndrnen i irgu le asu masi marn ndoun gle ndro su, boen i vong le ndro ndramed ogo: Gilgi nemem gmonen, i hineni, nemen monen lie, horuan ge. Ndrnesu masi i mah le aden manden, su la goure, su vong, be su ga rii i.

Jesu loh su lao aden.

¹² Bersi muren Jesu i ndre bahali, beg lodu. I soling ndro Jehova lobing gane.

¹³ Madourang, i loh su lao aden, su la born ndro i, i loh su masongul e rumou, i bosoui su Apostel. Ngarsu ogoro:

¹⁴ Simon, su bosoui ngarn aden Petrus, ma ndern Andreas, Jakobus e Johanes, Philipus e Bartolomeus,

¹⁵ Mateus e Tomas, Jakobus ndur Alveus, Simon.

¹⁶ Judas ndur Jakobus, ma Judas Isgariot i da gin hevani Jesu.

¹⁷ I bieni bahali, la dogun su lao aden mabosanged, ma su ndramed dsoln ber Juda, ber Jerusalem, ber leng, ber gor Tirus e Sidon.

¹⁸ Su ndramed ogo masigane su gin me, beg hirong nongen aden, su beg i regurdueni iab asu, ngongong i da ndrnesu su horuan lie.

¹⁹ Homo ma homo i beg boro mandrn, ndoui i gin me ri, i regurdueni su masigane.

Heb bohernou ad Jesu.

²⁰ I ilndri su lao aden, i vong le ndro su, i bai: Mu horuan ge, heb memrad ademu bui, memrad ademu i da le gor ad Jehova.

²¹ Horuamu ge, mu da mundrul malabo gu mosemu. Mu horuan ge, mu da reng malabo, mu hal bersi muren.

²² Mu horuan ge be su ndramed su gbieni mu le dogrosu su boii ngarmu, su rodi mu, mu da gin boro ndoui ad ndrundramed.

²³ Mugmug ge gu ngei, hanguruen longu hendre ge: Surian ademu i da manden ge le gor lundielang. Damsu ber goru gin hinen i le ndro su Provet dagara lie.

²⁴ Mu gina momen gane mu labenen, memrad ademu dsoln, surian ademu gina boen.

²⁵ Mu gina momen ge, gan anmu dsoln, mu gu mundrul muren. Mu gina momen ge mu da hal malabo, mu gu reng, mu gu dang, bergolmu gosusngo.

²⁶ Mu gina momen ge, be su gor masi mugueni mu le nongen asu. Su damsu ber goru su gin hinen i le ndro su Provet momen dagara lie.

²⁷ Io vong le ndro mu, mu da baghege ndro io, i boi: Golmgisden su ndremda rah adem, gob hian le ndro su, ndrnesu i mah le ademu.

²⁸ Hengen su, su da boii mu, sobani su le raring ademu, su da rodi mu.

²⁹ Be homo i rii uo nagbeluan horo bai le ndro i, i grii nagbeluam horo lie. Be homo i hedi salo adem, hengen le ndro i, golos adem lie.

³⁰ Hengen le ndro i, i da soling ndro uo. Ar homo gin hedi longu adem, mbue hedi i mul.

³¹ Longu masigane, mu da lengi, su ndramed su ghinen i me ndro mu, ghinen i dagara le ndro su lie.

³² Ar golmugisden su ge, golsugisden mu, sehe surian irbelengen mu, su ndramed momen golsuisden su lie, voasuiso asu.

³³ Ar mu bo hian le ndro su, su bo hian le ndro mu ge, sehe surian i gmeher ndro mu, su ndramed momen, su hinen i dagara lie.

³⁴ Be mu hengen le ndro su ge, su da hengen mul le ndro mu memrad ademu, sehe surian ir belengen mu? Su ndramed momen hengen le ndro su ndramed momen lie, muren su belengen le memrad asu, su da gin hengen i hanu.

³⁵ Mbue hinen dagara, golmgisden su ndremda rah ademu, hengen le ndro su, mbue hanguruen surian asu, muren surien ir belengen mu manden ge, boen uomu mbunana ad Ndorlaben ber belengan, i da bo hian le ndro su ndramed momen, su da hanguruen i hebsa bui.

³⁶ Ibdi gahaloseli le ndro su, dege Damu ber lang i da ibdi gahaloseli le ndro mu lie.

³⁷ Mbue gdieni homo, boen su da dieni mu dagara lie bugane, rumburdi su la kalabus, su da gin bo momen ndro mu, Ndorlaben i grumburdi mu lie.

³⁸ Hengen le ndro su, su ghengen le ndro mu lie, su ghengen le ndro mu bulhe ge, longu masi mu ghinen i le ndro su, su ghinen le ndro mu lie.

³⁹ I vong le ndro su heb nongen dohongein, i bai: Hom ndramed begmarn bui i danen dulieni homo begmarn aden bugane lie derbe? Sor marmou na glos le ngai.

⁴⁰ Lao homo i da manden hanu le ndorlaben aden bugane, lao homo ma homo, be ndorlaben gin henunuen i, i dege ndorlaben aden.

⁴¹ Desa uo ilndri ndomargei i da le begmarn ad ndern, uo de danem ilndri gei manden i da le begmarm bui?

⁴² Uo da bai derbe le ndro ndern: Ndere, io beg rui giao ndomargei i gina le begmarm, e lele, gei manden i da le begmarm uo de danem ilndri bui, aga momen ge, hanu rui gei manden i da begmarm giao, boen lele ndomargei i da le begmarn ad ndern, e rui i giao.

⁴³ Gei heie hian ge, sengen aden hian ge; gei heie momen molhege, sengen aden de hian bui.

⁴⁴ Gei heie e heie su dansu i, i hian de i momen, be sengen aden i hian de i momen. Homo de danen hedi sengen le borndrui bui.

⁴⁵ Hom ndramed hian i bogulue le bergoln memrad e longu hian ge. Hom ndramed momen i bogulue le bergoln memrad e longu momen ge, memrad masi i da le bergoln ad homo, bohon i bosoui ri.

⁴⁶ Desa mu bosoui io Ndorlaben, Ndorlaben, mu de hinen i bui dege io lengi mu ghinen i.

⁴⁷ Homo ma homo i da gmeher ndro io, i hirong nongen ordo, i ghinen i, io beg henunuen uomu i sie.

⁴⁸ I dege hom ndramed i da gin mengseni um aden hian ndoun ndoun ge. Be laben ior gin me, lengen manden i ndrud, hai manden i ngoh, i de bud bui, i da le gor hian ge.

⁴⁹ Be homo i da hirong nongen ordo, de hinen i bui, i dege hom ndramed i da gin mengseni um aden heb monen bui, i soie um aden le doruon, i bondel ge, laben ior gin me, lengen manden gin ndrud, hai manden gin ngoh, su menuneini um, um gin bud, gina boan sumburdi.