Lukas 5 - Niu Testament 1956 (Manus PNG)

Gelman ad Jesu gle ni.

¹ Bersi muren su ndramed su me goure, su besbas le sal, beg hirong nongen ad Jehova be i da le leng, ber ndran Genesaret.

² I ilndri ndol marie, su da len leng, su ndremda ni su gin bieni ndol asu, su sasngeni gahu asu.

³ I la lundiendol heie ad Simon, i ndemani i, i na gle heb ndran. Boen i lugdo mi ndol, i henunuen su ndramed.

⁴ Nongen aden boen, i vong le ndro Simon, i bai: Al gal sal, or bieni gahu ademu gle bor ni.

⁵ Simon i bode: Ndorlaben, iou gin bo mburer lobing gane, de gin bor hom ni bui. Be uo abui, iou gbieni gahu adu gle nongen adem.

⁶ Su hinen i dagara, su hur ni mabosanged, gahu asu beghege i mud.

⁷ Su ha gemi su gous asu su do da ndol heie, su gmeher roud le sobani su, be su beg rui gahu asu. Su gin me, su ha somui ndol marie i beb, baghege na glol.

⁸ Be Simon Petrus gin ilndri i, i godurhu ngondrnegan la boan, i vong le ndro Jesu i bai: Ndorlaben, al bieni oi, io hom ndramed momen ge.

⁹ I noh manden, noh asu dsoln, su da gin bor no diga.

¹⁰ Jakobus, sor Johanes ndur sor Sebedeus, su da ndro Petrus lie. Jesu i vong le ndro Simon, mbue uo go noh, io beg loh uo, le rui su ndramed le gor lundielang.

¹¹ Su hur ndol le leng, su bieni memrad asu masi, su ndrbon Jesu.

Jesu regurdueni mandrn legen ge.

¹² Boen i dogi le gor hoger, i ilndri ndramed homo, mandrn masi legen ge. Be i gin ilndri Jesu, i los le boan, i nhui bormarn, i soling le ndro i, i boi: Ndorlaben, be uo lengi, gregurdueni io.

¹³ Jesu i daui nemen lendi, i doro i, i bai: Io ha lengi mandrm rosan ge. Legen adem gineao gane malabo.

¹⁴ Boen Jesu i vong le ndro i, i bai: Maiu, al ndro su lao ad Jehova e dirhor le ndro Ndorlaben gle gan anem, dege Mose gin bai.

¹⁵ Ngarnongen le longu aden i hilou le gor manan. Su ndramed dsoln su la ndro i, beg hirong nongen aden, su ha lengi i, i gregurdueni su.

¹⁶ Jesu i la marboga, i lodu le ndro Ndorlaben.

Jesu ma su labenen ber gor.

¹⁷ Bersi muren i henunuen su ndramed, su Pharso, ma su ndremda hernou ber Galilea, ma ber Judea e ber Jerusalem su la born ndro i, ndoui ad Ndorlaben ber belengan i regurdueni su.

^18-19 Su huri hom ndramed ndrun aden masi momen ge, i da le berle aden, su beg huri i berle bage ndro Jesu. De dansu i bui, su la ndra um, su la mbusere balndo, su luluendi berle be boan la dogrosu masi, baghege le ndro Jesu.

²⁰ Be i gin ilndri su, su da gin boro ndoui ad Jehova hian ge, i vong le ndro ndramed, i da le berle: Io gin sibui longu adem momen gineao.

²¹ Su ndremda hernou, ma su Pharsi, su da hanguruen le golsu su bai: I ogo i sie, i da boii Jehova. Sie danen esbui longu momen, Jehova ge, i ge, danen i.

²² Jesu i danen hanguruen asu, i vong le ndro su: Ma da hanguruen sa le bergolmu?

²³ Sehe longu i ndoun, be io da bai: Io gin sibui longu adem momen gineao, de io vong. Edne, girgai!

²⁴ Io beg henunuen mu ndur ndramed i ndoa le esbui longu momen asu ndramed ber boan. Boen i vong le ndro ndramed ogo: Io vong le ndro uo: Edne, hedi berle adem, al um adem.

²⁵ Malabo ndramed ogo i dne le bormarsu masi, i i bamugueni Jehova.

²⁶ Su masi, meluasu i ieb, noh asu dsoln, su mugueni Jehova, su bai: Iou gin ilndri longu ndoun ndoun ge eruar.

Jesu loh Levi.

²⁷ Boen i bieni um, i ilndri hom ndremda moni ngarn Levi, i da lugdo mi logna moni aden, i vong le ndro i, i bai: Or ndrbo.

²⁸ Levi i bieni memrad aden masigane, i dne, i ndrbon Jesu.

²⁹ Muren Levi i sueri gous manden, i da um aden, le ndro Jesu, ma su ndremda moni mabosanged, dagara su ndramed dsoln su ha lugdo le mandrgosgeiao aden.

³⁰ Su Pharisi, ma su ndremda hernou, su la ndro su lao aden, ndrnesu i irgu, su vong su bai: Hi derbe, mu da ien gan la born ndro su ndremda moni, ma su ndramed momen?

³¹ Jesu i vong le ndro su, i bodeie: Su ndramed horuasu, su de loh doktor bui, su ge, su da med su ha lengi i.

³² Io de gin me le la ndro su ndramed hian bui, io eloh su ndramed momen ge, su garbelueni bern asu.

Heb nongen le bandri.

³³ Su lao ad Jesu su vong le ndro i: Su lao ad Johanes su bandri mabosanged su lodu sidesi, dagara su lao asu Pharisi, su lao aden ge, su ien, ma su ilmui.

³⁴ Jesu i bodeie: Su da gin me lo gous manden ad hom ndramed su gabandri derbe, be gous asu i da le mandrgosgeao asu.

³⁵ Rang na gmehere be su rui gous asu giao, muren su gabandri.

³⁶ Muren i bosoui le ndro su heb nongen dohongein, i bai: Homo i de sindrdi heb le salo aden houen bugane i sueri heb salo ogo houen gle golos sagen. Golos aden sagen i mbuserei, ma golos aden houen gina momen lie.

³⁷ Hom de daui ndrunvain houen de la boged sagen bui ndrunvain houen i ndumbue boged, vain gi muh, boged gina momen lie.

³⁸ Su ha lug ndrunvain houen le boged mahouen aga hian.

³⁹ Homo i da gin ilmui vain sagen, i mburen ndrunvain houen, i vong: Vain sagen i hian hanu.