Lukas 2 - Niu Testament 1956 (Manus PNG)

Jesus me boan.

¹ Muren Sesar Agustus, ndurhian asu gor masigane, i bo ndou nongen le ndro su lao aden masi, beg nemeni su, beg nemeni memrad asu, beg hondre ngarsu le buk aden.

² Le rang ogo, Gvirinius i ndorlaben ber gor Siria.

³ Dogoro su ndramed masi gane, su iao le gor ad damsu, su habed do da gor hoger.

⁴ Josev ber Galilea, i da le gor Nasaret, i iao le gor ad David, ngarn Betlehem, i da le gor Judea. I hom ndur David, ndurhian asu Juda.

⁵ Maria, nambulen, ndurn i da ndrnen i la born ndro i.

⁶ Sor la le gor, rang i gin me Maria i belengeni ndurn.

⁷ I gini ndurn hom gamel, i nhui i la salo, i ilgi i le ndregei bulmagou, heb logna sor le um hom bui.

⁸ Su ndramed ber gulue meh, su do da marboga, su da gulue meh lobing.

⁹ Malabo Angelo ad Jehova meher ndro su, i dege rang ge, su noh manden.

¹⁰ Angelo i boi le ndro su: Mbue mu go noh. E. lele, io bosui nongen hian ge me ndro mu, le ndro su ndramed masigane.

¹¹ Jesu, i ndur Jehova, gin meher Betlehem, gor ad David eruar. I bolumia mu.

¹² Gelman i ogo: Mu gal danoni su nhui mamemei le salo i da ndregei bulmagou.

¹³ Malabo su Angelo mabosanged su me gane, su da lang, su bamugueni Jehova, su bai:

¹⁴ Du gabmugueni Jehova, i da le belengan, goln le asu ndramed, i hengen su ndramed hian ge.

¹⁵ Nongen boen, su Angelo su mul le belengan lie. Su gineao, su da gulue su meh, su hivane, su bode: Du gedne, du gal Betlehem, du gilndri longu ogo, Jehova gin boharni le ndro du.

^16-17 Su hilou roud, su danoni Maria sor Josev, ma mamemei, i da le ndregei bulmagou. Su ilndri i, boen su bosoui nongen ogo le ndro su gor mabosanged.

¹⁸ Su masi, su hirong i, meluasu i ieb.

¹⁹ Maria goln de dud nongen ogo bui, i hanguruen leri sidesi.

²⁰ Su ndremda meh, su mul, su mugueni Jehova, le longu masigane su gin ilndri, ma su gin hirongi, dege su Angelo su da gin boharni le ndro su.

Su hurdi Jesu le um ad Jehova.

²¹ Manondruo muren, su sindrdi mandrn ad ndurn, boen su hasouni ngarn ad ndurn Jesu, dege Angelo gin bai, gina le ndro Maria mahanu.

²² Mahangul muren rang ad Maria gina boen, beg hinen mandern rosan, dege Mose i gin bai goru, su ha huri Jesu me le um ad Jehova, su gobad le gor Jerusalem, beg bosilieni mbunana le ndro Jehova,

²³ dege Mose gin hondre le Buk Helian: Ndurgamel homo i da hanu, i ad Ndorlaben Jehova ge.

²⁴ Su beg dirhor le ndro Ndorlaben Jehova, dege Mose gin bai: Bal maruo, de ndurbal maruo.

²⁵ E lele, hom ndramed i barmanda, i da le gor Jerusalem, ngarn Simeon. I hom gamel, voaniso Jehova ge i da dogi monen le sal aden. I belengeni le rang, be Jehova beg rederhi su lao aden. Meluan Helian gin vong le ndro i.

²⁶ I gin boharni le ndro i, i de somad bui, na gi lendri Jesu, Jehova gin hinen i le Kristo.

²⁷ I ogo, i gin meher le um ad Jehova, Meluan Helian i gin rui i, i gin me be damen sor nanen Jesu ha huri ndurn, beg dirhor, dege Mose gin bai.

²⁸ I hedi Jesu le barnemen, i bamugueni Jehova i bai:

²⁹ Ndorlaben, malabo uo geloh lao adem, dege uo gin bai.

³⁰ Begmoro gin ilndri Jesu, i da Bolumiadu,

³¹ uo do gin ilgi le ndro su gor masi.

³² I sul ber lang, i da hinganen le ndro su Haiden, i engermernal asu lao aden ber Israel.

³³ Damen, sor nanen Jesu, meluasor i ieb le nongen aden i da gin bosoui le ad mbunana ogo.

³⁴ Simeon i hengen sor, boen i vong le ndro Maria, nanen Jesu: I ogo na glos boen i gedne lie, i gelman le ndro su mabosanged ber Israel, ma su gob iil le ndro i.

³⁵ Bersi muren mordo borla la bergolm. I gobharni hanguruen asu mabosanged.

³⁶ Hom Provet bihin ngarn Hanna, ndurbihin Vanoel, homo asu Aser, i da le um ad Jehova, i barmanda lie. Goru i gin ibdi hom gamel le nambulen, i da le um aden uru manonderdolo, boen nambulen i ginmad.

³⁷ I bihinao le uru manondrungul e hahu. I do da le um ad Jehova sidesi, i da bandri, i da lodu, lobing e lorang.

³⁸ I gin meher lie le lundieum, i bamugueni Jehova, i bosoui le mbunana ogo le ndro su masi, su da belengeni rang hian, i da beg meher le gor Jerusalem.

³⁹ Be su gin hinen mburer asu boen, dege Mose gin bai, su iao mul Galilea, le gor Nasaret,

⁴⁰ Mbunana Jesu i menda, i ndoa, hanguruen aden i monen ge. Golnisden ad Ndorlaben Jehova i da ndro i.

Mbunana Jesu la um ad Jehova.

⁴¹ Uru si uru si, damen sor nanen Jesu, sor la Jerusalem, le gous asu Juda.

⁴² Jesu, uru aden masongul e ruo, i la born ndro sor,

⁴³ i da ndro sor le gor Jerusalem. Gous asu boen sor dogi mul, mbunana Jesu de la born ndro sor bui, i dandon, dansor bui.

⁴⁴ Sor hanguruen i gina hanu la born ndro su masi. Sor dogi si, sor gahi i la dogrosu loun, e gous asor.

⁴⁵ Dansor danoni i bui. Malabo sor mul Jerusalem, sor gahi i la.

⁴⁶ Madolo muren, su danoni i le um ad Jehova, i da gin lugdo mi molengasu ndremda hernou, i hirong henunuen asu, i ndemani su le longu hendre e hendre.

⁴⁷ Su masi su hirong i, meluasu i ieb le nongen aden, i da gin bosoui.

⁴⁸ Sor gin ilndri i, ndrnesor i irgu. Nanen i vong le ndro i, i bai: Nduro, desa uo gin hinen i dagara? E lele, damem ma io iouoro gin gahi uo, gin noh le adem.

⁴⁹ I bode: Desa mor gin gahi io ie? Danmor bui, aga um ad Bo Domo?

⁵⁰ Dansor nongen aden bui.

⁵¹ I la born ndro sor, su dogi mul gor Nasaret, i delengan le nongen asor. Nanen i bogulue nongen aden le bergoln hian ge.

⁵² Jesu i menda, le mandrn ma gle meluan, golnisden ad Jehova i da ndro i, su ndramed voasuiso aden.