Lukas 12 - Niu Testament 1956 (Manus PNG)

Heb nongen le ndro su lao ad Jesu.

¹ Su ndramed mabosanged su la born ndro Jesu, su besbas le sal. Malabo Jesu i vong le ndro su lao aden, i bai: Gobgulue meluamu le longu asu Pharisi, gle bahilou asu.

² De hansu gorni longu asu bui, Jehova gobharni i. Dansu de nhui longu asu bugane, heb eluen bui muren su masi su dansu i.

³ Nongen masi su da gin bosoui le ndrogum, gor masi hirong i le rang. Longu masi su da gin bahurhur le lundieum asu, su masi su bohernou leri ndre balndo.

⁴ Io vong le ndro mu, mu gous ordo, mbue mu go noh su ndramed, dansu daii mandrmu ge, de dansu bo momen gle meluamu hebsa bui.

⁵ Io beg bosilieni mu le ad homo, mu noh aden: Go noh homo ge i da ndoa le daii su, ma gbieni su le gor moan, io vong le ndro mu: Ha noh aden ge.

⁶ Mu da semani ndorgan malima gle moni heb ge mandehe. Jehova goln de ndud le ad ndorgan si bugane.

⁷ I gin nemeni lomon ademu masigane. Mbue mu go noh, mu hian hanu le su ndorgan mabosanged.

⁸ Io vong le ndro mu lie: Homo i da boharni ngoro le ndro su ndramed, Ndurdramed i gobharni ngarn le ndro su Angelo ad Jehova.

⁹ Ar mu hangaini io le bormarsu ndramed, io hangaini i le bormarsu Angelo ad Jehova lie.

¹⁰ Homo ma homo i da boii Ndurndramed, Ndorlaben esbui longu aden giao. Homo ma homo i da boii Meluan Helian, Ndorlaben de esbui longu ogo momen bugane.

¹¹ Be su rui mu le numo hernou asu, gle gord asu, mbue hanguruen nongen ademu, mu da vong sa le ndro su le gord.

¹² Meluan Helian i ghengen le ndro mu nongen masigane mu absou le ndro su.

Su lao ad Jesu ma hanguruen asu le longu ber boan.

¹³ Homo asu su da gin be goure i ndemani Jesu, i bai: Ndorlaben, hian bai le ndro ndere, i ghengen memrad ad nano me ndro io.

¹⁴ Jesu i bode: Ndramed, sie i gin loh io le ndremda gord gle memrad ademu ber boan?

¹⁵ Boen i vong le ndro su: Gobgulue meluamu, debosan meruamu dsoln. Ar homo memrad aden bulhege, i de horuan gle memrad aden bui, i da le um aden.

¹⁶ Boen i vong le ndro su heb nongen dohongein, i vong, i bai: Hom ndramed, labenen ge, memrad aden dsoln. Beleng aden hian ge, gan hian mabosanged i dari.

¹⁷ Malabo i da hanguruen le bergoln, i bai: Io gob sa malabo, um ordo i mandehe, i de vonei le gan ono bui.

¹⁸ Boen i bai: Io beg hinen longu hendre, io beg mbuserei um ordo sagen, io beg mengseni um mandromai, io beg daui gan ono masi gle lundie.

¹⁹ Boen io vong gle bergolo: Bergolo, e lele, gan anem mabosanged, gle uru dsoln, hian hengang ge, gien e gilmui, dege uo ha lengi.

²⁰ Jehova ge i vong le ndro i: Uo gouge, lobing ogo io geloh uo, uo na gmed, memrad adem mabosanged uo da gin huri me goure gle ndro sie muren?

²¹ Dagara homo ma homo, i da huri me goure memrad ber boan, de hengen heb de la ndro Jehova bui, heb memrad aden ber lang bugane.

²² Boen i vong le ndro su lao aden: Io boi le ndro mu: Mbue hanguruen mandrmu sidesi: mu gien sa, mu daui salo me oho?

²³ Mandrmu i hian hanu le gan anmu, ma gle salo ademu.

²⁴ E lele su ndorgan ber lang, su de daui hebsa le beleng bui, su de huri heb gan ansu le numesu bugane, Jehova i hengen le ndro su sidesi. Mu hian hanu le su ndorgan ber lang.

^25-26 Sie ademu i da horuan, mamaren bing si ge, be i da hangungerou sidegesi? Ar mu de heb ndoa bui le hinen longu mandehege monen ge, desa mu hanguruen sidesi longu ber boan.

²⁷ E lele su nonou ber lonhou, su de bo mburer le salo asu bui. Io boi le ndro mu: Salo ad Salomo i da hian ge, i dege salo asu nonou ber lonhou hian bugane.

²⁸ Ar Jehova i hanguruen lomondriu ber lonhou le salo asu lomondriu i longu molhege, i da horuan eruar ge, mo su gbieni i le moan, i hengen le ndro mu hanu gle salo ademu, de bui? De danmu boro heb ndoui ber lang bugane.

²⁹ Mbue noh, mbue hangungerou, mbue bai: Iou gien sa, iou gilmui sa.

³⁰ Su Haiden ge su hanguruen dagara. Damu ber lang i danen le longu ogo masi.

³¹ Hanguruen hanu gle memrad ber lang, muren i ghengen le ndro mu memrad ber boan lie.

³² Mbue mu go noh, mu holel ordo ge, Damu ha lengi, beg hengen le ndro mu gor aden.

³³ E gbieni memrad ademu, ghengeni le ndro su, memrad asu bui, mengseni ndob ber moni le ndro mu, i de mud bui, ndob gle memrad ber lang, homo de danen behena i bui, ul de ndumbue i bugane.

³⁴ Bergolmu i da sidesi, gle memrad ademu.

Heb nongen dohongein le lao hian e momen.

³⁵ Gogen gle salo ademu, sul gle nemu.

³⁶ Mu dege su ndramed su da belengeni ndorlaben asu, i da gina manan gle gous, i beg mehere, be i da reregdi le um aden, su audi babi roud.

³⁷ Su horuan ge, su monen ge, be ndorlaben asu i da gin mul, i ilndri su lao dandendegei aden, su mamed ge. Ndangen io boi le ndro mu: I hedi salo ber mburer, i daui i, boen i dulieni su lao dandendegei aden le mandrgosgeao aden, i sueri gous le ndro su.

³⁸ Ar ndorlaben de meher roud bui dogrobing ge, de madourang, i ilndri su lao aden, su mamed ge, su horuan ge.

³⁹ Danmu hanguruen hian ge: Ar labenen homo i danen i, gehere ndremda behena beg mbuser um aden, ir bogulue um aden, de medir bui, i mamed ge.

⁴⁰ Mu dagara lie, mu mamed, Ndurndramed na gmehere, de danmu rang aden bui.

⁴¹ Malabo Petrus i ndemani Jesu i bai: Ndorlaben, nongen dohongein ogo le ndro du ge, de gle ndro su masi lie?

⁴² Ndorlaben i bode: Sie ademu i lao dondendegei ad ndorlaben hian monen ge. Ndorlaben gin loh i le bogulue su lao aden masi, i ghengen le ndro su gan monen ge.

⁴³ Lao dandendegei ogoro i horuan ge, ar ndorlaben aden i gmul, i ilndri mburer aden i hian monen ge.

⁴⁴ Ndangen io boi le ndro mu: I hinen i le ndremda bogulue memrad aden masigane.

⁴⁵ Be lao aden i hanguruen le bergoln: Ndorlaben ordo de meher roud masou, boen i iao, i rii su lao ad ndorlaben, ma su bihilou aden, i sueri gous ge, ilmui sidesi de hinen mburer bui.

⁴⁶ Ndorlaben aden i gmeher bersi roud, i de belengeni i bui, i de danen rang ad ndorlaben bugane, i ogo, i gmeher, i hengen le ndro i surian le mburer aden momen, i rii i ndoun ndoun.

⁴⁷ Hom lao dandendegei, i da danen mburer ad ndorlaben aden, i de hinen i bui, ndorlaben i grii i ndoun ndoun.

⁴⁸ Homo i de danen mburer ad ndorlaben bui, i gin hinen i momen, ndorlaben de rii i ndoun ndoun dagara bugane. Homo ma homo, ndorlaben gin hengen le ndro i mabosanged, i ha lengi mabosanged, homo ma homo ndorlaben gin hengen le ndro i heb ge mandehe, i lengi ge mandehe gle aden.

⁴⁹ Io gin me le bieni moan gle boan, io ha lengi i da iad manden le belengan.

⁵⁰ Su beg surhi io gle ngendian, ndrno i gosusngo leri manden.

⁵¹ Mu hanguruen sa, io gin me le lug benu le dogrosu? Io boi le ndro mu: Bugane, io daui bahun le ndro su.

⁵² Malabo su malimou su da le um hom su bo iil ge: Su madilmou su bo iil le ndro su marmou, ma sor marmou gob bahun le ndro su madilmou.

⁵³ Damen i bo iil le ndro ndurn, ndurn i gob bahun le ndro damen, nanen i gob iil le ndro ndurbihin aden, ndurbihin i gob bahun le ndro nanen. Naloson i gob iil le ndro naborson, naborson i bo iil le ndro naloson.

⁵⁴ Boen i vong le ndro su masigane, ar mu ilndri ndoulang i da gobad le hai, mu vong, mu bai: Legen na gmehere, ma i gmeher ndangen.

⁵⁵ Ar gub i ngo, mu bai: Range mernal ge, ma i gmeher dagara lie.

⁵⁶ Mu ndramed momen ge bahilou ge, danmu gelman ber lang ma ber boan derbe, danmu gelman ber range heb hian bui?

⁵⁷ Desa danmu hanguruen heb monen le bergolmu bui?

⁵⁸ Ar ndremda rah adem beg bo gord le ndro uo, mor da le sal, ghinen longu adem gmonen, debosan i rui uo le ndro su ndurhian, so gob gord le ndro uo, su daui uo le kalabus.

⁵⁹ Ndangen io boi le ndro uo, uo da le kalabus, mabenan uo gin surien longu aden masi sumburdi.