Lukas 10 - Niu Testament 1956 (Manus PNG)

Jesu rendegien su lao aden manondrdilingul.

¹ Boen Ndorlaben i loh su lao aden manondrdilingul, i rendegien su le gor masi, le gor manden e mandehe, sor marmou gosgoure, sor marmou gosgoure.

² Boen i vong le ndro su: Beleng mandromai, gan mabosanged ge, su holel ge, su da bo mburer leri, soling ndro Ndorlaben ber beleng, i rendegien su lao aden gle beleng aden.

³ Al gle gor manan, io rendegien mu, mu dege ndurmeh le molengasu mui.

⁴ Mbue hedi moni, ndob bugane, sumianegen bui, mbue de mugueni homo le sal ademu.

⁵ Be mu iao le um hom, vong le ndro su hanu: Mandri ad Jehova gme ndro mu.

⁶ Be mbunana ad Jehova homo i da le um, Jehova na ghengen i, dege mu gin bai. Mbunana homo ad Jehova i dari bui, nongen ademu na gmul.

⁷ Mu dandon le um hom, gien, e ilmui gan masi, su hengen le ndro mu, homo, i da bo mburer, i vonei le gan anen, mbue al le um hom lie.

⁸ Ar mu gmeher le gor si, su somui le ademu mu gien gan ansu, su hengen i le ndro mu.

⁹ Gregurdueni su, iab gin hedi su, vong le ndro su ndramed ber gor, gor ad Jehova gin meher bage.

¹⁰ Ar mu gmeher le gor si, su mburesu ademu, mu iao le sal, le marbohongor mu vong mu bai:

¹¹ Iou gbieni gas ber sal i da gina le ndegedu giao, iou sibui ndegedu gle rosan. Gas i dandon le gor admu, hanguruen longu hendr ge, gor ad Jehova gin meher baghege ndro mu.

¹² Io boi le ndro mu: Gor Sodom i horuan ge le gord ad Jehova hanu le gor si i da gin bieni mu dagara.

¹³ Uo gina momen gane, gor Gorasim; uo gina momen gane gor Betsaida; ar su ber Tirus e Sidon, su gin ilndri gelman manden goru, dege mu gin ilndri, su garbelueni bern asu gle houen.

¹⁴ Gor Tirus e Sidon gord asor i hiau hebe, mu gina momen gane.

¹⁵ Uo gor Kapernaum, uo da hanu le su gor masi? Bugane, su gbieni uo le gor moan.

¹⁶ Homo i hirong nongen ademu, i hirong nongen ordo ge, homo i da hangaini mu, i hangaini io leri, homo i da hangaini io, i hangaini Ndorlaben, i da gin rendegien io.

¹⁷ Boen su manondrdilingul su gin mul, su mugmug manden, su vong, su bai: Ndorlaben, su beld lie delengasu le nongen adu, iou da gin robuldi su gle ngarm.

¹⁸ I vong le ndro su, i bodeie: Io gin ilndri Satan i gin me dege ndremla ber lang.

¹⁹ E lele io gin hengen ndoui le ndro mu, mu girgai ndre moad ma ndre sumburungai, io gin hengen ndoui le ndro mu, le ndro su masi, su da bo iil le ndro mu, de dansu bo momen de la ndro mu hebsa bui.

²⁰ Mbue mugmug, su beld delengasu le nongen ademu, mugmug ge su gin hondre ngarmu le Buk, i da gor lundielang.

²¹ Malabo Jesu i ngei, i mugmug ge le Meluan Helian, i vong i boi: Io bamugueni uo, Bo Domo, Ndorlaben ber lang ma ber boan, uo da gin gorni longu ogo le ndro su labenen ma le ndro su ndurbodan, uo gin boharni i le ndro su ndramed molhege, su heb ndoun bui. Ehe Bo Domo, aga uo ie lengi sidesi.

²² Bo Domo gin hengen longu masigane me ndro io, homo i de danen ndurn bui, Damen ge i danen i. Homo i de danen Damen bui, ndurn ge i danen, dagara homo ma homo, ndurn i boharni le ndro i.

²³ Boen begmarn gle ndro su lao aden ge, i vong i boi: Begmarsu horuan, mamaren ge, su da ilndri longu mu lele i.

²⁴ Io boi le ndro mu, su Provet mabosanged ma su King dsoln, su ha leng ilndri longu mu da lele malabo, su de gin ilndri bui, su ha leng hirong nongen, delengamu hirong i, su de gin hirong i bui.

Heb nongen dohongein le golnisden ad ndramed.

²⁵ Boen homo asu ndremda hernou i me, beg seslaini Jesu, i ndemani i: Ndorlaben, io gob sa, beg dogi le gor lundielang?

²⁶ Jesu i bodeie: Uo de danem Buk Helian bui, sehe nongen i dari?

²⁷ I bode: Golmgisden Jehova, Ndorlaben adem, gle bergolm gane, gle meluam gane, gle hanguruen adem, ma gle ndoui adem masigane, ma hendre lie, golmgisden ndramed i da bage ndro uo, dege voamiso mandrm.

²⁸ Jesu i vong le ndro i, i bodeie: Nongen adem monen ge, ghinen i, boen uo da mamaren sidesi.

²⁹ Malabo i beg gorni nongen aden i da beg seslaini Jesu leri, i vong, i bai: Sie i ndramed goloisden i dagara?

³⁰ Jesu i bode: Hom ndramed ber Jerusalem beg dogi le gor Jerigo. Be i da le sal, su daiandramed gin me, su behena memrad aden masigane, boen su rii i ndoun ndoun, ndrai aden gin muh le boan, baghege ginmad. Boen, su bieni ndramed ogo, su vob la manan.

³¹ Hom ndremda dohor i me dala, be i gin ilndri ndramed ogo le boan, le mandrgos sal, de gin sobani i bui, dogi ge.

³² Homo asu Levi i gin me dala, i da bo mburer le um ad Jehova. Be i gin ilndri ndramed ogo, de gin sobani i bui, i dogi ge.

³³ Homo asu Samaria i gin me, i dogi le sal ogo, i gin me baghege le ndro i, be i gin ilndri i, i golnisden i,

³⁴ i la ndro i, i surhi legen gle ndrunvain, i daui ndrelgei ri, boen i hosi mandern, i daui i ndre donki aden, i dulieni le um hom, i sobani i le gan.

³⁵ Bing si muren, be i beg dogi le gor manan, i hedi moni maruo, i hengen i le ndro labenen ber um, i vong le ndro i: Or gulue i, hengen gan le anen, aga heb moni le surian, be i de vonei bui, heb eluen bui muren io gmul, io surieni masigane.

³⁶ Sie asu madilmou ogo i da golnisden ndramed monen ge?

³⁷ Ndremda hernou i bodeie: I ge, i da gin ibdi gahaloseli le ndro i. Boen Jesu i bai: Al, ghinen i dagara lie.

Marta sor Maria ber gor Betanien.

³⁸ Boen Jesu i dogi le gor manan, i gin me le gor si, i iao le um ad hom bihin, ngarn Marta.

³⁹ Ndern, ngarn Maria i da lugdo im boan baghege ndro Jesu, i hirong nongen aden.

⁴⁰ Marta i da bo mburer le gan anen dsoln, malabo i la ndro Jesu, i vong le ndro i, i boi: Ndorlaben, uo da ilndri bui, io ge homo, io da bo mburer le gan anem, ndere de sobani io bui? Bai le ndro i, i osbani io.

⁴¹ Ndorlaben i bodeie, Marta, Marta, uo da hanguruen longu mabosanged, uo da bo mburer dsoln.

⁴² Longu hendre ge i hian, aga i vonei, Maria i gin hanguruen leri, i da ndro i ge, homo i de hedi i bui.