Johanes 1 - Niu Testament 1956 (Manus PNG)

Jesu, aga nongen ad Jehova.

¹ Nandugian, nandugian nongen ge i do da. Nongen ogo i da baghege ndro Jehova. Jehova, aga nongen ogo.

² Nandugian nongen ogo i da ndro Jehova.

³ I gin mengseni longu masigane gle nongen ogo, heb longu i do da ri bugane, i de gin hinen i bui.

⁴ Nongen ogo i mamaren, gle ndoui aden, aga sul asu ndramed ber boan.

⁵ Sul ogo ber lang i da hinganen le gor ndrogmoan. Gor ndrogmoan de gin somui leri bui.

⁶ Jehova gin rendegien hom gamel i gin me, ngarn aden Johanes.

⁷ I ogo, i gin me, beg boharni le ad sul ber lang. Su masigane su gboro ndoui gle sul.

⁸ Johanes, aga sul ber lang bui, i beg boharni le ad sul.

⁹ Sul ndangen ber lang, i da beg hinganen le ndro su ndramed masigane, le ndro homo ma homo, i gin meher le boan malabo.

¹⁰ I do da le boan nandugian lie i gin mengseni gor masigane ber boan, gor masi de dansu le aden bui.

¹¹ I gin meher le gor aden, su loun aden de gin somui le aden bui, gin hangaini i.

¹² Su masi ge, su da gin somui le aden i gin hengen le ndro su, su gbosoui su mbunana ad Jehova. Aga su ge, su da gin boro ndoui le ngarn aden.

¹³ Su mbunana ad Jehova, hom gamel de gin ilgi su bui, su de gin meher molhe bugane, Jehova ge i gin ilgi su.

¹⁴ Nongen ogo gin me le boan le gor adu i gin ibdi sengen asu ndramed. Iou gin ilndri engerang aden, engerang ad Ndur Jehova, i da homo ge, dege Damen gin hengen i, engerang le golnisden ad Jehova ndangen.

¹⁵ Johanes gin boharni le aden i vong i boi: I ogo, ber nandugian, io gin boi le aden: Homo i da gmeher muren i hanu me ordo i ber nandugian, io ge, io muren.

¹⁶ Memrad aden i bulhege iou gin hedi gle memrad ogo bersi, ma bersilie le golnisden aden.

¹⁷ Mose gin hengen le ndro su nongen ad Jehova ber goru, Jesu, aga Mesias, i gin daui le ndro du golnisden aden ndangen ge.

¹⁸ Hom ndramed ber boan i de gin ilndri Jehova bersi bugane, Ndurn, homo ge, i da le berlalen ad Damen, i ge, i gin boharni me ndro du longu le ad Jehova.

Nongen ad Johanes le ad Jesu.

¹⁹ Aga nongen ad Johanes, i da gin bosoui le ndro su Juda ber Jerusalem, be su gin rendegien su ndramed dohor ma su ndur Levi le ndro i, su endemani Johanes, i sie?

²⁰ Johanes i boharni le ndro su monen ge, i vong, i boi: Io de Kristo bui.

²¹ Su ndemani i muren: Uo sie? Uo Elias? I bode: Io bui. Su ndemani i: Uo Provet manden i da beg meher? I bodeie: Bugane!

²² Su ndemani i: Uo sie? Iou gbosoui sa le ndro su ndorlaben adu, su gin rendegien du le ndro uo? Uo ge uo hanguruen sa uo sie?

²³ I bodeie: Io ngasen ad homo i da loholo le marboga, i bai: Ghinen sal ad Ndorlaben gmonen, dege Provet Jesaia gin bai.

²⁴ Su da gin meher ndro i su Pharisi.

²⁵ Su ndemani Johanes malabo: Desa uo surhi su, ar uo Mesias bui, de Elias, de Provet bugane?

²⁶ Johanes i vong le ndro su, i bodeie: Io surhi su ge le ndran, homo ge i da le dogromu de danmu le aden bui.

²⁷ I da beg meher muren, io de vonei bui, io dari sumianegen giao.

²⁸ Aga gin meher le gor Betanien, i da le ndran Jordan horo, aga logna ad Johanes i da gin surhi su.

²⁹ Bing si muren, Johanes ilndri Jesu le sal, i me dala. Malabo i vong, i bai: E lele, aga Ndurmeh ad Jehova, i da sab longu momen ber gor masi.

³⁰ Aga i ge, io da gin bosoui le aden: Homo i gmeher muren, i da hanu me ordo. Ndangen i homo ber goru, io ge, io muren.

³¹ Hanu io de dono i bui, Jehova i beg boharni le aden le ndro su Israel, le longu ogo io gin me, io da surhi su gle ndran.

³² Boen Johanes i boharni lie i boi: Io gin ilndri Meluan, i da gin voh le belengan dege bal si, i la ndro i, i giroh.

³³ Hanu io de dono i bui, i ge, i da gin rendegien io le surhi su gle ndran, i gin bai me ndro io: Be uo ilndri Meluan i da voh, i la ndro homo i roh, i ge, i da surhi su gle Meluan Helian.

³⁴ Io ge, io gin ilndri i, io gin boharni: Aga Ndur Jehova.

Jesu ma su lao aden malimou.

³⁵ Si muren, Johanes i da lie ma sor lao aden marmou.

³⁶ Begmarn gle ndro Jesu, i da gin irgai, gin me. I vong, i boi: E lele, aga Ndurmeh ad Jehova.

³⁷ Sor lao aden marmou be sor hirong nongen ad Johanes, sor ndrbon Jesu.

³⁸ Jesu i belueni bormarn le ndrbon, i ilndri sor marmou, sor da muren. I ndemani sor: Mor gahi sa? Su bodeie: Rabi, aga i vonei Ndorlaben, um adem i da oho?

³⁹ I bodeie: Am ndro io, io gobsilieni i ndro mor. Sor la ndro i, sor ilndri um aden, sor dandon le rang ogo le ibia.

⁴⁰ Andreas, ndern ad Simon Petrus, i homo asoro, i da gin hirong nongen ad Johanes, i ndrbon Jesu.

⁴¹ I gin ilndri ndern Simon, i vong le ndro i, i boi: Iou gin danoni Mesias, aga Kristo.

⁴² I dulieni i le ndro Jesu, be i gin ilndri i, i vong i boi: Uo Simon, ndur Johanes, io bosoui garm Kevas, aga i vonei bad.

⁴³ Si muren, Jesu beg dogi le gor Galilea, i ilndri Philipus, i vong le ndro i, i bai: Or ndrbo.

⁴⁴ Philipus i homo ber Betsaida, aga gor ad Andreas sor Petrus.

⁴⁵ Philipus ilndri Natanael, i bai le ndro i: Iou gin danoni i ge, Mose gin hondre le aden, dagara su Provet, Jesu, Ndur Josev ber Nasaret.

⁴⁶ Natanael i bode: Sehe longu hian i gmeher le gor Nasaret? Philipus i bodeie: Am ogo, e lele i!

⁴⁷ Be Jesu gin ilndri Natanael, i da sohal sal le ndro i, i vong le aden, i boi: E lele, aga homo asu Israel monen ge, bergoln de hanguruen momen bui.

⁴⁸ Natanael i ndemani i, uo danem io derbe? Jesu i bodeie: Philipus de gin loh uo masou, io gin ilndri uo behendra gei vovei.

⁴⁹ Natanael i vong le ndro i, i boi: Ndorlaben, Uo Ndur Jehova, uo King asu Israel.

⁵⁰ Jesu i vong le ndro i: Uo danem boro i malabo be io da gin boi, io gin ilndri uo le behendra gei vovei, uo gelndri longu manden hanu gle longu ogo.

⁵¹ Boen i boi lie: Ndangen, ndangen io boi le ndro mu: Malabo mu gilndri gor lundielang i deh, uomu ilndri su Angelo ad Jehova, su la belengan, su la boan.