Hebru 8 - Niu Testament 1956 (Manus PNG)

Jesu, Ndurhian asu Prister gin dohor mandrn.

¹ Longu ogoro iou beg hanguruen: Ndurhian asu Prister adu i da le gor lundielang, i lugdo le nemen sengen ad Jehova.

² I bogulue um helian ad Jehova, aga um hian ndangen, hom ndramed de gin mengseni i bui, i ge, gin hinen i.

³ Homo ma homo ndurhian asu Prister su gob mburer le dohor le ndro Jehova, gan ndrai i do da ri, dagara gan ber beleng asu ndramed. Prister adu i gin dohor longu hendre lie.

⁴ Be i ber boan, i de danen ibdi mburer ad hom Prister bui, Jehova gin daui mburer ogo le ndro su ndur Levi.

⁵ Su ogo, su bo mburer le um ad Jehova, um ogo ad Ndorlaben aga sameluan ber um i da gor lundielang. Jehova i ha lengi, Mose i ghinen um ad Jehova, dege i gin ilndri i, i vong le ndro i, i bai: E lele, longu hendre e hendre ber um ogo, gu mengseni i dege uo gin ilndri um ordo ndre bahali.

⁶ Mburer ad Prister adu i hian hanu, i sobani du le memrad hian ge ber gor lundielang, ber um houen.

⁷ Be mburer asu Prister ber goru i hian monen gane, Jehova de daui mburer houen le nemen bugane.

⁸ Jehova i vong le mburer ber goru, i bai: Ghanguruen i, rang i gmeher, io ha leng bo kontrakt le ndro su Israel ma le ndro su ber um ad Juda kontrakt houen ge.

⁹ Kontrakt dege goru, io gin bo le ndro su damen ademu bugane, be io gin boro nemesu, io gin dulieni su, io gin rumburdi su le nemesu Egipten. Su de gin hirong nongen ordo bui, io gin bieni su, io de gin hanguruen su hebsa bui. Aga nongen ad Ndorlaben.

¹⁰ Kontrakt houen io bo le ndro su ber um Israel bersi muren: Io beg daui nongen ordo le bergolsu, io beg hondre nongen ordo gle meluasu, io Ndorlaben asu, su lao dandendegei ordo. Aga nongen, Jehova gin bosoui ri.

¹¹ Boen homo de henunuen homo longu le ad Ndorlaben bui, homo de vong le ndro homo bui: Io beg henunuen uo le longu ad Ndorlaben. Su masi dansu io. Su mbunana ma su labenen.

¹² Goloisden su, io esbui longu asu momen, io de hanguruen longu asu momen bui.

¹³ Be Ndorlaben i vong le longu ogo houen, i hanguruen, longu aden ber goru gina sagen, gina molhege. Longu hendre e hendre i gina sagen, su gbieni i giao.