Hebru 4 - Niu Testament 1956 (Manus PNG)

Jesu i hanu le ad Josua.

¹ Nongen aden, i da gin vong le asu, su ibdi logna hengang gle asu, i de gin los bui, i dandon. Hian iou ghanguruen i, iou gob mburer gleri debosan homo de homo ademu na glos, de ibdi gor hengang gle aden bui.

² Nongen ber lang hian gin meher ndro du, dege i gin meher ndro su, i gina le ndro su, su da gin hirong i dahed, su de gin somui le nongen bugane.

³ Iou ge, iou da gin boro ndoui aden ge iou ibdi logna hengang me adu, dege Jehova gin bai: Io gin daui nemo le belengan, io gin bai: Mbue su danoni logna hengang asu sidegesi, dandu, Jehova gin hengang le mburer aden be i gin hinen longu masi bomud.

⁴ I gin vong bersi, be i gin hanguruen sabbath, i gin bai: Jehova gin hengeng le bing manondrdolo le mburer aden gane.

⁵ Hanu iou gin hirong i, i vong, i bai: Mbue su ghengang le logna hengang ordo.

⁶ Su holel dansu ibdi logna hengang gle asu, aga ndangen, su ge ber goru, nongen ber lang gin meher ndro su, delengasu le nongen ogo hian bui, dansu de hengang bugane.

⁷ Malabo Jehova i ha bosoui rang si houen, aga eruar. I ha bosoui le bohon ad David, i vong, i bai: Dege iou gin hirong i hanu, eruar, be mu hirong ngasen ordo, mbue ir ndounen bergolmu.

⁸ Be Josua gin dulieni su le logna hengang asu ndangen, Jehova de ha bosoui le rang si ber muren gle hengang bui.

⁹ Dandu, logna hengang ir belengen su lao ad Jehova, be su hengang le mburer asu.

¹⁰ Ar homo gin ibdi logna hengang ad Jehova, i hengang le mburer aden, dege Jehova gin hengang le mburer aden dagara lie.

¹¹ Iou ha leng bo mburer gleri, io ha leng ibdi logna hengang gle adu, debosan homo de homo i los, debosan homo adu dege su ber goru, de delengasu le nongen ad Jehova bui.

¹² Nongen ad Jehova i mamaren ge, i ndoa ge, i maren manden i dege mordo borla i sindrdi, i sehi bergoln e meluan, mandrn ma ndueien ber ndrun, i bo gord le hanguruen ad bergoln.

¹³ Homo de danen gorni heb longu le bormarn ad Jehova bui, i danen longu masigane, i danen ilndri i, bersi muren i gob gord me ndro du le longu adu masigane.

¹⁴ Homo gorbo i gina le lundielang, aga Jesu, Ndur Jehova, aga Ndurhian asu Prister ndangen, iou da gin boharni ngarn aden, iou ha leng boro ndoui aden sidegesi.

¹⁵ I homo ber boan, i danen ibdi gahaloseli me ndro du, i danen, mandru adu i da heb ndoa bui. Beld Satan gin seslaini i le longu hendr e hendr momen, dege i seslaini du lie, i de gin los le longu momen bui.

¹⁶ Iou ha leng hilou le ndro i gle logna aden ge, iou ha leng mugmug le sal adu, be iou hanguruen golnisden aden, i ibdi gahaloseli me ndro du, i golnisden du, i osbani du le rang adu momen, be iou ha soling ndro i.