Hebru 3 - Niu Testament 1956 (Manus PNG)

¹ Mu ndere helian, Ndorlaben gin loh mu, mu ber gor lundielang, hian e lele, ghanguruen i ge, Jehova gin rendegien i aga Ndurhian asu Prister ndangen, iou aden ge, iou ad Jesu ge.

² I da gin hinen mburer aden monen gane. Mburer ad Jehova ge dege Mose gin hinen i, mburer aden hian gane le um ad Jehova.

³ I ogo, i manden hanu le ad Mose, i Ndorlaben ber um ad Jehova, i hanu le asu masigane, su da le um aden.

⁴ Su ha mengseni um hom e hom, i ge i da gin mengseni i longu masigane, aga Jehova ge.

⁵ Ndangen Mose i gin hinen mburer aden monen ge le um ad Jehova gane, i hom lao dandendegei aden ge. I gin boharni longu masigane, Jehova ha lengi, su ndramed ghanguruen gleri.

⁶ Kristo i lao dandendegei aden bui, i Ndurn, i gin bo mburer ad Ndur Jehova le um aden. Um aden aga bergoldu, be iou ha belengeni aden, be iou boro ndoui aden sidegesi.

Mbue bieni Kristo.

⁷ Nongen ad Meluan Helian gin meher ndro du: Eruar, be mu hirong ngasen aden,

⁸ mbue ir ndounen bergolmu, dege su gin hinen i le marboga be su gin seslaini io.

⁹ Be su damen ademu gin seslaini io, io da gin sobani su le Kristmas mahangul, be su gin ilndri gelman ordo, io da gin hinen le ndro su.

¹⁰ Be io gin ilndri su dege ogoro, ndrno i mah le asu, io gin vong, io gin bai: Sidegesi su irgai momen, su hanguruen momen le bergolsu. De dansu sal ordo bui.

¹¹ Ndrno i gus le asu, io gin daui nemo le belengan, io gin bai: De dansu danoni logna hengang asu bugane ge.

¹² Mu ndere hian, ghanguruen i, orgulue meluamu, debosan homo de homo i bieni Jehova, i da mamaren ge, debosan bergoln ad homo de ad homo i momen ge.

¹³ Homo i henunuen homo, homo i soling ndro homo le rang ademu, i bieni longu aden momen, debosan bergoln gina ndoun ndoun le longu momen aden.

¹⁴ Iou ad Kristo ge, be iou gin boro ndoui aden, be iou da baghege ndro i sidegesi.

¹⁵ Be Ndorlaben i vong: Eruar, be mu hirong ngasen aden, mbue ir ndounen bergolmu, dege su gin hinen i goru,

¹⁶ su sie, su da gin hirong ngasen aden, bergolsu gina ndoun ndoun ge? Su ge, de bui, Mose gin dulieni su le gor Egipten lendi?

¹⁷ Su sie, Jehova ndrnen gin mah le asu le Kristmas mahangul ie? Su ge, su da gin bo longu momen le marboga, boen su ginmad.

¹⁸ Su sie, Jehova gin daui nemen le belengan le bormarsu, i gin bai, de dansu danoni logna hengang asu bui? Su ge, su de delengan le nongen aden bui.

¹⁹ Malabo dandu, su de gin danoni logna hengang asu bui, bergolsu ndoun ndoun.