Hebru 12 - Niu Testament 1956 (Manus PNG)

Mu ndoa be rang momen gmeher.

¹ Be iou hanguruen su masi ogo, su da gin ibdi ndoui ber belengan, hian, iou la born ndro su, iou ha leng bieni longu hendre e hendre momen, i da beg hosi du, iou ha leng hilou sal adu monen ge, iou ha leng bieni longu hendre e hendre ir ndounen du, i beruan gle hauedu, iou beg hilou ge,

² beg ilndri Jesu, i da gin ilgi ndoui aden le bergoldu goru, i da sobani du gle ndoui aden sidesi. Jesu Kristo i ha mugmug manden le salion ber gor lundielang, Damen beg hengen le ndro i, i gin ha somui ri, be su gin dadhe i le gei, i gin ibdi ngendian masi, de gin hanguruen i bui, boen i lugdo im logna ad Jehova, le nemen sengen aden.

³ Hian ghanguruen i, su ndramed momen gin bo bahun le ndro i dagara, i de gin lug bohon de la ndro su bui, i simge. Hian ghanguruen i, debosan ndrnemu i med, debosan mandrmu i berad le sal.

⁴ Mu de gin bo iil le longu momen hian ndoun masou.

⁵ Golmu gin dud Nongen Helian, su da boharni le ndro su ndurn: Nduro, mbue hanguruen momen le bergolm, be Ndorlaben i rii uo, mbue bieni ndoui aden be i rendegien rang momen le ndro uo, rang ber ngendian adem.

⁶ E lele, be Ndorlaben i golnisden homo, i rii i. I rii ndurn aden, i da gin somui le aden.

⁷ Ha belengeni Ndorlaben, i beg henunuen mu. Jehova i hinen i, dege Damen i hinen le ndro su ndurn. Ndurn homo i da oho, damen i de rii i bui, beg henunuen i le bern hian.

⁸ Be Ndorlaben de rii mu bui, dege i gin rii su lao aden masi, mu mbunana ad Ndorlaben bui, ehe mu ndurn aden monen bugane.

⁹ Longu hendre lie: Su damen adu ber boan su gin rii du, su gin henunuen du le bern hian, iou gin mugueni su. Hi derbe, be delengadu le nongen ad damen adu, aga Damen asu meluan, iou mamaren gleri.

¹⁰ Su damen adu ber boan su gin henunuen du ndoun, su gin rii du eluen bui, dege su gin hanguruen i hian me ndro du. Damdu ber lang i henunuen du, beg bo hian ge me ndro du, i ha lengi, iou ibdi bern aden helian gle bern adu.

¹¹ Be Ndorlaben i rii du, dandu mugmug bui, i ha ngendian ndro du, ndrnedu i gosusngo, heb eluen bui muren su da gin somui ri, i bo hian ge le ndro du i hinen bern asu hian monen ge.

¹² Hian, daui le belengan nememu i gina voiliu, edne, girgai monen mu da gin los.

¹³ Girgai hian le sal ademu, boen su lao ad Jesu su heb ndoa bui, su do ndrbon le sal ademu, su na ge horuan lie.

¹⁴ Voamiso beno le ndro homo ma homo, ghanguruen bern helian ad Ndorlaben. Homo de danen ilndri Ndorlaben bui, be i de ibdi bern helian bugane.

¹⁵ Orgulue su lao ad Ndorlaben, debosan homo i bieni golnisden ad Jehova, debosan ngondrn ngahan i reg le molengamu, i gob momen le ndro mu, i ha dungi su mabosanged ademu.

¹⁶ Orgulue homo ma homo, debosan homo ademu i gbieni Jehova, debosan i dege Esau, hom ndramed momen ge. I da gin semani memrad ad damen gle heb gan molhege.

¹⁷ Danmu i hian be i ha lengi damen i hengen le ndro i, Jehova de gin hengen le ndro i bui, Jehova gin bieni i, bergoln gin gosusngo le longu aden momen dagara, i gin reng i gin dang, Ndorlaben de gin hengen le ndro i bui.

¹⁸ Mu de gin meher baghege le bahali ber boan bui, mu de gin meher baghege le moan ber boan bugane, ndoulang ndrogum, ndrogmoan e barr bui.

¹⁹ Mu de gin hirong ngasen ndah, ma ngasen ber barr bugane dege su gin hinen i, be su gin hirong i, su gin soling, mbue Ndorlaben i vong le ndro su gle ngasen dege ogoro.

²⁰ Su ha noh manden, dansu hirong ngasen ogo bui, be longu hendre ber lonhou gina baghege le bahali, su gdaii i.

²¹ Be Jehova gin mbsig le engermernal aden, Mose i vong, i bai: Io ha noh, io ha rerr manden ge.

²² Mu dagara bui, mu gin meher le bahali Sion, mu gin meher le gor ad Jehova i da mamaren ge, mu gin meher le gor Jerusalem i da lundielang, mu la born ndro su Angelo masobu mabersobu, la born ndro su lao ad Jehova ber lang.

²³ Ndorlaben gin hondre ngarsu le Buk aden, mu dege su ndurn aden. Mu gin meher le ndro ndremda gord, aga Jehova Ndorlaben asu masi, mu gina la born ndro meluasu ndramed, su gina le gor lang. Su da gin dogi monen ge le boan ogo.

²⁴ Mu gin meher ndro Jesu, i da gin daui mburer houen me ndro du, mu gin meher le ndrai aden helian, i da gin vong me ndro du ndoun ndoun, i dege ndrai ad Abel bui.

²⁵ Orgulue meluamu, debosan mu hangaini i, i da beg vong le ndro mu. I gin bo gord le ndro su, su da gin bieni i goru, su gin hangaini nongen aden ge. Ndangen, dandu vob le gord aden bugane, be iou da bieni i, i da vong me ndro du ber gor lang.

²⁶ Goru boan gin nunueie, be i gin hirong ngasen aden. Malabo i vong i bai: Io beg hinen i bersilie, boan e lang na ge nunueie.

²⁷ Heb nongen ogo bersilie i boharni me ndro du, Ndorlaben i belueni longu ber boan i da glos i na ge momen. I gu mengseni boan hian ndoa ge i de rerr bui, i de nunueie bugane.

²⁸ Hian, iou ha leng mugueni Ndorlaben, i da beg hengen me ndro du gor ndoun ndoun. Be iou mugueni i, iou gob mburer le ndro Jehova, dege i ha lengi i voaduiso aden, ha noh aden ge.

²⁹ Ndorlaben Jehova adu aga i moan i da dilmui longu masi.