Evesus 5 - Niu Testament 1956 (Manus PNG)

¹ Hian, mu mbunana ad Jehova, ha dogi monen le bormarn, gorndrbon sal aden ge.

² Aga, sal le golnisden su, dege Kristo golnisden mu, i gin hengen mandrn e ndrai aden, gin dohor me ndro du, aga memrad hian ge, Jehova i mugueni i, dohor aden i dege ngohondonreen, i gin meher le ngohon ad Jehova.

³ Mbue hanguruen longu ber sungsou hendre e hendre i da heb rosan bui, mbue meruamu dsoln. Heb longu dege ogoro i da le hanguruen ademu bui, mbue absou heb nongen gleri. Aga i hian ge le ndro su lao helian be su gbieni longu masigane.

⁴ Mbue mu vong nongen molhege, nongen le bo ndroud, aga i bern asu lao ad Ndorlaben bui, i de hian le ndro mu bugane. Hian gabmugueni Ndorlaben ge.

⁵ Danmu longu hendre ogo: Hom ndramed i da hanguruen longu ber sungsou, homo i da hanguruen memrad ber boan ge, aga ndramed meruan dsoln ge, aga i vonei, dege hom ndramed i dohor le ndro su beld, su gorbo de ngab gle memrad ber lang bui, su de meher le gor lundielang ad Jehova bugane.

⁶ Orgulue meluamu, debosan homo i bahilou ndro mu le nongen molhege, gus ad Jehova i da ndro su, su da bo momen dagara, gord aden ir belengen su, delengasu le nongen ad Jehova bui.

⁷ Mbue al ndro su, su da hinen longu dagara.

⁸ Goru mu ndrogum ge dege su, malabo ge mu sul gle ndoui ad Ndorlaben.

⁹ Ha dogi monen ge mu mbunana ber rang. Aga longu hian ge ber rang, ber sul ad Ndorlaben: Su bo longu hian ge, su bo longu monen ge, su bo longu monen ndangen.

¹⁰ Seslaini longu hendre e hendre, i hian le ndro Ndorlaben de bui. I mugmug leri de bugane.

¹¹ Mbue la born ndro su, su da bo longu momen le ndrogmoan. Gob iil le ndro su gle nongen ademu, mbue ha somui ri.

¹² Su da gorni longu asu momen, su gina momen ge, heb nongen gleri i momen lie.

¹³ Be sul i hinganen le ndrogmoan ogo, longu hendre e hendre i mbsig, sul i gdieni i, longu masi ndrogum su gboharni, irbelueni gle sul.

¹⁴ Dege homo gin hondre: Edne, uo da medir ge, edne, uo da ginmad, boen Kristo i hinganen le ndro uo.

¹⁵ Hian, orgulue meluamu, ha dogi hian munie, monen ge dege su ndramed hian ge.

¹⁶ Gob mburer hian le rang ademu, rang i da ndro mu, aga rang momen.

¹⁷ Mbue hanguruen molhege le bergolmu, ghanguruen longu hendre e hendre, Ndorlaben i ha lengi i.

¹⁸ Mbue ilmui ndrunvain dsoln, su dogi momen ge su da hinen dagara. Hian bergolmu i beb gle Meluan Helian.

¹⁹ Ha mugmug ge, gabmugueni Ndorlaben le Psalm, ma le gagaile absoui le ndro Jehova ge. Gagaile le ndro i le bergolmu.

²⁰ Gabmugueni Jehova, i Damen adu sidesi. Gabmugueni i le ngarn ad Ndorlaben adu Jesu Kristo.

Lo le bern hian asu Kristen le um asu.

²¹ Hian, delengamu le nongen asu labenen dege Kristo i ha lengi i.

²² Su bihin delengasu le nongen asu nambulen, dege su delengan le nongen ad Ndorlaben.

²³ Gamel aga ndorlaben ad bihin, dege Kristo i Ndorlaben asu lao aden. I da gin rumburdi su lao aden.

²⁴ Su lao aden delengasu le nongen ad Ndorlaben Kristo, dagara su bihin delengasu le nongen asu nambulen le longu hendre e hendre.

²⁵ Mu gamel golmugisden su nambulmu, dege Kristo golnisden su lao aden, i gin hengen mandrn e ndrai aden le ndro su.

²⁶ I beg hinen su rosan, beg dohor su le ndro Jehova. I gin surhi su le ndran, gle ndoui aden i da le nongen aden.

²⁷ I gin hinen su lao aden rosan, i gin hinen su mamali ge, heb longu segdan bugane, su gina mamali sumburdi, su helian gane, heb longu asu momen bui.

²⁸ Su gamel golsugisden nambulsu, dege voasuiso mandrsu. Ar homo golnisden nambulen, i golnisden mandrn.

²⁹ Hom ndramed i do da le boan bui, ndrnen i mah le ad mandrn aden, I bogulue mandrn, i gien gan, i voaniso mandrn, i hinen i dege Kristo i hinen i le ndro su lao aden.

³⁰ Iou longu hendre e hendre ber mandrn ad Kristo, sengen ber sengen aden, ndrun ber ndrun aden.

³¹ Hom gamel i bieni damen e nanen, ir ndrbon nambulen sor marmou bersi ge.

³² Longu hian manden ge i do da ri, io hanguruen, aga heb nongen dohongein le ad Kristo ma su lao aden.

³³ I dege ogoro de bui, io ha lengi homo ma homo ademu i golnisden nambulen, dege i voaniso mandrn. Bihin i delengan le nongen ad gamel, i gabmugueni i.