Evesus 3 - Niu Testament 1956 (Manus PNG)

Paulus boharni longu ad Kristo.

¹ Io Paulus, hom lao dandendegei ad Jesu Kristo, su gin daui io le kalabus le mburer ad Kristo, io da gin hinen i.

² Mu gin hirong le mburer ordo, golnisden ad Jehova i da gin daui me ndro io, io gob mburer le molengamu.

³ Mu gin hirong i, Jehova gin boharni me ndro io longu hendre, i gin gorni goru, i gin boharni me ndro io malabo, io gin hondre le ndro mu heb leri.

⁴ Be mu ilndri heb nongen, io da gin hondre le ndro mu, danmu, Kristo i gin boharni me ndro io longu ogo.

⁵ Goru su ndurndramed ber boan de gin hirong leri masou. Su Apostel aden helian ma su Provet aden dansu leri, i gin boharni le ndro su le Meluan Helian.

⁶ Io hanguruen longu ogoro: Su Haiden su hilou, su ngab le memrad ber lang, nongen ad Jehova i da gin bai le ndro su Juda, i vonei le ndro su Haiden lie, aga Jesu Kristo gin hinen i. I gin boharni me ndro du longu ber lang.

⁷ Io hom lao dandendegei aden, io bo mburer leri, i gin hengen me ndro io ndoui aden ber lag, io gobharni le ndro su golnisden ad Jehova.

⁸ Ndorlaben gin hengen mburer ogo me ndro io, io hom lao aden molhege, io da muren, io de vonei su lao aden helian bui, i gin daui memrad ogo hian ge me ndro io, i ha lengi, io gobharni le ndro su Haiden le memrad ad Kristo.

⁹ I ha lengi i iou gobharni le ndro su longu hendre e hendre ber lang, goru Jehova, i da gin mengseni longu masigane, gin gorni i.

¹⁰ I ha lengi i, malabo su ndorlaben ber lang dansu gle longu hian ad Jehova, i da gin daui le molengasu lao aden ber boan.

¹¹ I gin hinen longu ogo masi boen le ndoui ad Jesu Kristo, i Ndorlaben adu,

¹² dege i ha leng hinen i goru. Malabo dandu hilou le ndro Jehova, malabo iou ha mugmug le aden, aga le ndoui ad Kristo, iou gin boro i.

¹³ Iou ha soling ndro mu, mbue mandrmu de berad, ar ngendian ad Kristo i da ndro mu, dege i gin meher ndro io. Aga i hian ge le ndro mu, ar ngendian i da ndro mu, Ndorlaben i gabmugueni mu

Paulus i raring le asu Kristen ber lodu.

¹⁴ Io godurhu ngondrnego le ndro Damen,

¹⁵ i Damen asu masi ber lang, asu masi ber boan dagara lie.

¹⁶ Damen adu ogo i hengen le ndro mu gle memrad aden ber gor engerang, mu ndoa gle ndoui ad Meluan Helian.

¹⁷ Boen Kristo danen ibdi bergolmu gle um aden, mu ndoa ge golnisden ad Kristo, i da le bergolmu ndoun.

¹⁸ Boen danmu, dege su lao aden helian masi, longu ber belengan, i da manden ge, i da eluen.

¹⁹ Boen danmu golnisden ad Kristo, aga longu hian hanu le longu masigane. I hengen le ndro mu memrad ad Jehova bulhe, bergolmu, meluamu, hanguruen ademu, mandrmu masigane na gbeb le ndoui ad Jehova.

²⁰ I ge, i da bo mburer le bergolmu, i danen hengen me ndro du bulhe hendre e hendre, dege iou ha soling, dege iou hanguruen gleri.

²¹ Iou gabmugueni i le molengasu lao ad Jesu, iou gabmugueni i gle ndoui ad Jesu Kristo, bing si e rang si, sidegesi. Amen!