Matta 28 - Lala NT

Niinyo Yeso a tina wa

¹ Pa ndiira kaa nwiinya Yahudawa ɓa ma ɗenda a kaa ntiiri tǝro mbutu wa, pa Maryamu Magadaliya ma Maryamu fin nya ɓǝ ko me koɓǝ sengge tina.

² Pa putu a nya dem, me antimira Ankundi ya, yǝ ham sase a liura yǝ wo yǝ tǝng ɗungara yǝ kaɗ a si.

³ Maabiri isi nga weɗweɗɗo, ɗǝm luktu usu pengpeng nga huru.

⁴ Ɓan war ka ɓa, kokto ɓǝ ma ɓǝ madki ɓǝ tom nga ɓǝ woɗɗon.

⁵ An timira Kaa ya, yǝ nkee toona kaɓa me, “Sǝ kura kokto ra, nǝ maan me sǝn kǝr Yeso yaa ɓaa kwaakǝsǝsǝ ya.

⁶ Yǝ sem a hamɓa ra, yǝ niin, nga yǝ nkeesǝ wa. Sau sǝ sengge ham yǝ tǝrsǝ ɓa.

⁷ Pa soo naakǝn, kosǝ nkee emfǝɗkaa ɓisa, ‘Yǝ niin a tiina, ɗǝm yǝn koko Galili a wii waso. Kǝsaa wǝr kǝnso.’ Waso nǝ nkeesǝn.”

⁸ Pa toona kaɓa ɓǝ fiɗ ma haɗɗe a tina kawa, ɓaa kokto, pa ma kuɗa pengpeng ra ɗǝm, pa ɓǝ mon ɓǝ nkee emfǝɗkaa ɓisa.

⁹ Semma ma ɓoso ra, pa ɓǝ pam ma Yeso, yǝɓǝ nkee me, “Sǝ naupa.” Ɓǝ ko ngwang ma sase ɓaa ma a kwelkǝte, ɓaa nyoo.

¹⁰ Pa Yeso yǝɓǝ nkee me, “Sǝ kura kokto ra, so kosǝ nkee ɓaata ɓǝna ɓǝ ko Galili, kǝnso kǝ ɓǝnǝn wǝr wa.”

Mbu ɓan war handa ɓa ɓǝ nkeesǝ ɓa

¹¹ Pa toona sǝ ɓa, ɓǝn faɗsǝn faɗ wa, ɓaata ɓan war handa ɓa, ɓǝ kana uru ko ɓǝ nkee kuɓsa nek mbusa sa nsaad mbu tomsǝ ɓa.

¹² Pa wiina ɓan nek mbusa ɓa, ɓǝ pamsǝ ma wiina ɓeta ɓa wa, ɓǝ kan a ɗaaso ɓoso, pa ɓǝ na koɓaa nsosamse ka ya,

¹³ ɓǝɓǝ nkee me, “Sǝ nkee me, ‘Emfǝɗkaa ɓisa ɓǝ wo a pǝrtǝra ɓaa tanga a fer tǝ saa munda wa.’

¹⁴ Me mara ra, kan a ngwee Ngomna ya ni, kǝtaa ti yǝ yau sase kǝn sǝ fiɗ a kongsa ta.”

¹⁵ Pa nsosamse kaya ɓǝ kon koɓaa kasa ɓǝ tom nga ɓǝ nkee ɓǝsǝ wa. Ɗǝm mara ra kan a ngwee me ɓaa Yahudawa ɓa wo nga nawa.

Mbu kǝɓaa tomɓa ɓaa puu haa fin sǝɓa

¹⁶ Pa emfǝɗkaa puu nhaa fin sǝɓa ɓǝ ko Galili, a yol Yeso nkee ɓǝsǝ me ɓǝ ko wa.

¹⁷ Pa ɓǝ wǝr sǝsǝ wa, ɓaa nyoo, pa ɓaata ɓǝ tomma pǝno.

¹⁸ Pa Yeso yǝ wo a ɓoni, yǝɓǝ nkee me, “Kwangto a liura ma putu wa nsaad ɓaa na nǝn.

¹⁹ Me maaso, soo a put taandi wa nsaad, kosǝ ti ɓeta ɓǝ kaɗ emfǝɗkaa ɓǝna, sǝɓǝ tom baptisma a ɗǝnda Paapara ma Auwe ma Wis ɗekɗek wa,

²⁰ ɗǝm sǝ ɓǝ fǝɗkǝ me ɓǝ ɓǝɗ mbu nǝ nkee sǝ ɓa nsaad. Ɗǝm ɓong nǝ ke ma sase nfee a wo a kaɗo feɗefeɗe ntaandi wa ɓa.”