MARKUS 15 - Lala NT

Yeso a wii Bilatus wa

¹ Pa a ɗenda naakǝn, kuɓsa nek mbusa sa ma wiina, ma malǝmma fǝɗkǝta Musa sa, ma ɓeta nsaad pepere ɓan kan mara Yahudawa ɓa, ɓǝn kan a ɗaaso ɓoso, mbu kǝɓǝsa tomwa. Pa ɓaa kaa, ɓaa saa ko a Ngomna Bilatus ni.

² Bilatus pa yaa taa me, “Ən ngase kuɓ ɓaa Yahudawa ɓau?” Yeso yaa kak me, “Ngǝ nkeen maaso.”

³ Pa kuɓsa nek mbusa sa ɓaa ntii papara wa a mbusa ɓolɓol.

⁴ Pa Bilatus yǝ ɓaarǝ ya taa, ya nkee me, “A wǝrǝ ɓan nkee ngǝ mbusa ɓolɓol, ngǝ kak mbuka rau?”

⁵ Pa ɗing siso, Yeso yǝ ɓaarǝ yǝ kan mbuka ra, Bilatus aa tom nhiinyanhiinya.

⁶ Nwa ǝn mbun tomsǝ ɓa, a fer Mbukamsa wa, yǝn hik pursuna fin u ɓeta taa sǝ wa.

⁷ Wa yake kǝn ǝn yarsǝ me Barabbas u ɓaa neu ɓǝsǝ ke ma ɓa ɓǝ niksǝ kito ma ngwamnati a ur siso a tod ɓeta fer kito siso.

⁸ Pa ɓeta dem ɓǝ ntii kwauwo ɓǝn kǝna Bilatus me yǝɓǝ tom mbu yǝn tomsǝ nfee ɓa.

⁹ Pa Bilatus yǝɓǝ taa me, “Sǝn taa me nǝsǝ lee kuɓ ɓaa Yahudawa ɓa wau?”

¹⁰ Mbu kwaasǝ ɓa yǝ maan me ndǝ rǝmara kuɓsa nek mbusa sa ɓǝ nasǝ Yeso wa.

¹¹ Pa kuɓsa nek mbusa sa ɓǝ suɗ ɓeta ɓǝ nkee me ɓǝ lee Barabbas a ma Yeso.

¹² Pa Bilatus yǝɓǝ taa, ya nkee me, “Yaa kǝnǝ tomtomni ma yaa sǝn yarsǝsǝ me kuɓ ɓaa Yahudawa ɓa yau?”

¹³ Ɓǝ nik kwaro, ɓǝ nkee me, “Aa kwaakǝ!”

¹⁴ Bilatus yǝ taa ɗǝm, “Meen mbiu? Yǝ tom mbi kwalakwalau?” Pa ɓǝ yauli ma kwaro kokro, ɓǝn nkee me, “Aa kwaakǝ!”

¹⁵ Mee yǝn taa me yǝ hur kuɗa ɓeta, Bilatus yǝɓǝ hik Barabbas. Pa yǝ ti ɓaa hob Yeso ɗǝm yǝɓǝ na me ɓaa kwaakǝ.

Soosamse ɓǝ nhuu Yeso

¹⁶ Pa soosamse ɓa ko ma Yeso a taanda ngomna ni, u ɓan yarsǝ me “Firetoriyum.” wa, Ɓǝ kwau nsaad pepera nsosamse ta.

¹⁷ Ɓaa tung luktu ko welwel u kuɓsa ɓǝn tungsǝ wa, ɓǝ werkǝ kukǝra kǝra u kuɓsutu wa ma tǝute, ɓaa tung a ɗuura.

¹⁸ Pa ɓaa ntii tooma u para ma, ɓǝn nkeesǝ me, “Hurtu nwaango a tom palang, Kuɓ ɓaa Yahudawa ɓa wa!”

¹⁹ Ɓǝ hoɓsǝ a ɗuura ma kumtul, ɓǝn nemsǝ mesa. Pa ɓǝn koɓɓaa wiiyo a sani ɓǝn nkee me ɓǝn nasǝ mbarta.

²⁰ Pa ɓǝ feɗsǝsǝ na mbarta para wa, pa ɓaa hik laulawara welwel ɓǝ tungsǝsǝ wa, ɓaa kang luktu usu ɓaasa ko me ko ɓaa kwaakǝ.

Ɓaa kwakǝ Yeso

²¹ Ɓaa siko, pa ɓǝ wǝr yaake yǝn talǝn talǝ, ǝn yarsǝ me Siman, eɗ Sayirin ya, pap Iskandari ya ma Rufus ya, yǝn kankan a uru, pa soosamse ɓaa tii ma kwakwato me yǝ too kwaakǝra Yeso ra.

²² Ɓǝ wosǝ ma Yeso a hamka ǝn yar me, Golgota (ǝn sen me nkoo ɗuura wa).

²³ Pa ɓaa na mbraa emngwate inabi ma, sautǝse ma matǝma ǝn yar me mur, yǝ yau yǝ wee ra.

²⁴ Pa ɓaa kwaakǝ. Ɓǝ ɓaa laulaura ira ɓǝn tomsǝ pala.

²⁵ Ɓa kwakǝsǝ ma pale kaure.

²⁶ Ɓǝ nyor nyorma ɓǝn nkee me, U NWA ƏN YESO, KUƁ ƁAA YAHUDAWA ƁA WA.

^27-28 Ɓaa kwaakǝ Nkwiinya raɓ ke ma sase, fin nem seya ya, yaa fin nya a nem kwasa ya.

²⁹ Ɓaa ɓǝn talǝsǝntalǝ ɓa ɓǝn nkeesǝ mbusa kwalakwala, ɓǝn nyaasǝ ɗuura ɓora, ɓǝn nkee me, “Ngase kǝngaa okǝ hit Kaa Urshalima wa, ɗǝm ngǝ mar a tǝro taatǝn, a kon nkweerange! A ham a kwaakǝra sǝra, me ngǝn Au Kaa ya.”

³⁰ yaa a kon nkwerange ngǝ ham rau!”

³¹ Ɗǝm maaso, kuɓsa nek mbusa sa ma malǝmaa fǝɗkǝta Musa sa, ɓaa sa nhuu a ɗaaso ɓoso, ɓǝn nkee me, “Yǝn nkaa yǝ kon nkweera ɓaata, pa yǝ nkaa yǝ kon nkweera ee usu ra!

³² A lee Almaseho sisi, ngase kuɓ Isra'ila wa, a ham a kwaakǝra sǝra, me tǝ wǝrǝ, tǝna ɓongtǝra!” Kwiinya ɓaa kwaakǝ ɓǝsǝ ke ma sase sǝɓǝ ɓa, ɓosa kǝn, ɓaa sǝrǝ.

Wodɗo Yeso wa

³³ Si kaa ɗa, pa handa a tom tebteb put siso nsaad. A ko a fer ɗikira wa.

³⁴ Ma ɗikra kara, pa Yeso yǝ nik kwaro dem yǝ nkee me, “Eloi, Eloi lama sabatani?” ɗaanto usu me, “Kaa ɓǝna Kaa ɓǝna tomtomni ngǝ lee nǝsǝu?”

³⁵ Pa ɓaa ɓǝ nǝɗsǝ ngwang ɓa, ɓǝ kurasǝ wa, ɓǝ nkee me, sǝ kura, “Yǝn yar Iliya.”

³⁶ Pa ete fin ya mon, yǝ nrii mbu soso ɓa ma mbraa sǝusǝu u emngwate inabi ma wa, pa yǝ pak a kwalango yǝ na Yeso me yǝ wee. Pa yaa nkee me, “Saa lee, a lee ndǝ wǝr ko Iliya kiya wo, yaasa hammau.”

³⁷ Pa Yeso yǝ nik kwaro ma kwakwato, pa yǝ woɗɗo.

³⁸ Pa luktu a hit Kaa Urshalima wa, yǝ saatǝ handa raɓ, ntii ɓoti a ham a kunda.

³⁹ A fer kuɓ kwang nsoosa yǝsǝ kǝɗ a wii Yeso wa yǝ wǝrsǝ ɗǝɗa yǝ tomsǝ yǝ wodɗa wa, payǝ nkee me, “Ɓongtǝra, Eɗ ɗa, ǝn Au Kaa ya!”

⁴⁰ Ɓaata toonaka ɗǝm ɓǝ nǝɗ mǝbmǝb kǝnar ɓa sengoo. A ɗaaso ɓoso ndǝ Maryamu Magadaliya, ma Maryamu ma Yakubu koɓ Yusufu ya, ma ɗǝm Salomi.

⁴¹ Toona sǝsa ɓǝ ntiisǝ ɓǝɗɗo Galili ɓǝn kwasisǝ tinima. Ɓaata toona pera ɓa ɓǝ dem ɓǝ wo ke ɓǝ piɗsǝ Urshalima wa, ɓǝ kǝnso kǝn.

Hok Yeso wa

⁴² Pa ɗikira tomsǝ wa, ɓan warkǝ me ɗen ǝn kaa nwiiya Yahudawa ɓa.

⁴³ Pa ate ke ǝn yarsǝ me Yusufu yǝ piɗ Arimatiya. Yǝ fin a ɗaaso ɓan kan mara Yahudawa ɓa, yǝ ma kwangto dem, ya yǝn warsǝ kuɓsutu Kaa wa ya. Yǝ nii yǝ ko a Bilatus ni kokto semra, yǝ kǝna me aa naa maabiri Yeso ya koya hokko.

⁴⁴ Bilatus yǝ kura nhiinyanhiinya to me yǝ kura me Yeso yǝ wee wodɗon. Pa yǝ yar kuɓ kwang soosa kawa ya taa, mee ǝndǝ ɓong ngǝu me Yeso yǝ wee wodɗon nǝu.

⁴⁵ Yǝ kurasǝ ɓongtǝra a kuɓ kwang soosani wa pa yǝ naa Yusufu maabiri Yeso ya.

⁴⁶ Yusufu yǝ tǝri luktu hok woɗɗa wa, ya ham ma maabiri Yeso ya, yaa mbǝrkǝ ma luktu hok woɗɗa wa, yaa tii a tiina ɓaa wǝrkǝsǝ ɗaan a kundara wa. Pa yǝ kǝndǝ ate pera ɗungara ya, yaa liki ee tiina ya.

⁴⁷ Maryamu Magadaliya ma Maryamu maa Yusufu ya ɓaa wǝro, ɓǝ wǝr ham ɓa tiisǝ maabiri Yeso ya ɓan.